Molia se ali’i i lona faia uiga mataga teineititi 5 tausaga

Pe a ma le 40 tausaga o se ali’i ua taofia nei e le malo i le toese i Tafuna, ona o tuuaiga i lona faia lea o ni uiga mataga i se teineititi e 5 tausaga le matua.

 

E tusa ai ma faamaumauga a le faamasinoga, e nonofo faatasi le ua molia ma le aiga o le teineititi na aafia.

 

O moliaga ua faia faasaga i lenei alii e aofia ai le moliaga o le faia o uiga faasotoma, faia o uiga mataga i fanau laiti, faapea ai ma le moliaga mama e tasi o lona faia lea o ni gaioiga e ono lamatia ai le ola saogalemu o fanau laiti.

 

O le mataupu lenei na tofu atu i le Ofisa o Leoleo i Tafuna, ina ua faila e le tina o le teineititi na aafia sana tagi i le aso 28 Novema faasaga i le alii ua molia, i lona faia lea o uiga mataga i lana tama, ma tofia ai loa le alii lieoleo ia Lawrence Sagapolutele na te su’esu’eina lenei mataupu.

 

Na taua e le tina o le teineititi i leoleo e faapea, na amata ona popole lona mafaufau o lo o i ai se mea o lo o tupu i le va o lana tama ma le ua molia, ina ua fo’i atu i le fale sa alu e fai lana tagamea, ae faafuase’i ona oso ese le ua molia mai luga o le nofoa (couch) o lo o i le potu malolo o le fale sa la nonofo to’alua ai ma lana tama.

 

O iina na amata ai loa ona fesiligia e le tina lana tama, pe sa i ai se mea sa tupu i le va o ia ma le ua molia, ae sa tali le teineititi e leai se mea, ae ina ua tauanau pea e le tina lana tama e aua le fefe e ta’u atu ia te ia le mea sa tupu, na i’u ai loa ona faamatala e le teineititi i lona tina, sa tago tago atu le ua molia i lona itutinosa (tulou), faatasi ai ma isi uiga le taupulea.

 

Na faamatala e le teineititi i leoleo e faapea, na te’i ina ua alu atu le ua molia i totonu o le potu malolo o le latou fale, ona saofa’i atu lea i ona tafatafa a’o nofo i luga o le sofa, ona aapa atu lea o lona lima ma tago i lona itutinosa, pe tusa e faa fa ona fai lana amio lea, ae pe tusa ma le ta’i 2 minute le umi o le taimi e tuu ai lona lima i lona itutinosa (tulou).

 

Ina ua uma ona siaki e le fafine lana tama i le aso lea, sa auina atu loa o ia i le falema’i mo le faia i ai o se isi siaki, faapea ai ma lona logoina o le Ofisa o Puipuia Fanau laiti (CPS) e tusa ai o le mea ua tupu.

 

Ina ua fesiligia e leoleo le ua molia e tusa ai o lenei faalavelave, sa ia ioeina ai lona faia o nei uiga mataga i le teineititi na aafia.

 

Na taua e le ua molia i leoleo e faapea, a’o fai lana falai i’a i le afiafi lea, sa ia vaaia le teineititi na aafia o lo o nofonofo mai na o ia i le potu malolo o le latou fale, e le’i umi ae ona toe vaaia le teineititi ua taoto i luga o le sofa, o lea na savali ane ai loa e vaai o ia.

 

Ina ua oo ane i le vaega o lo o taoto ai le teineititi, na oso a’e loa iina ma ni lagona ese ia te ia i le taoto mai o le teineititi, ma aapa atu ai loa ua tuu lona lima i lona itutinosa, ina ua maea, sa ia toe savali i tua i le umukuka ma faaauau le kukaina o lana meaai.

 

E le’i umi ae savali atu loa le tina o le teineititi ma fesili atu ia te ia, pe sa ia tago i lana tama, ae sa ia tali i ai e leai.

 

Na taua fo’i e le ua molia i leoleo e faapea, e le o le taimi muamua lea na ia tago ai i le teineititi, sa ia tago ai foi i le masina o Oketopa a’o lumana’i le Lotu Tamaiti na te’a nei, ma pe tusa o vaiaso uma lava o le masina lea e faatasi ai lava ona ia tago tago i le teineititi, ae o isi fo’i taimi na te faia ai uiga mataga nei i le teineititi pe afai na o laua i isi taimi.

 

O le aso Lua na te’a nei na tula’i ai le ua molia i luma o le faamasinoga maualuga, ma ia teena ai moliaga faasaga ia te ia.

 

I lona teena ai o tuuaiga faasaga ia te ia, ua faatulaga ai loa lana ulua’i iloiloga e faia i le masina fou o Ianuari, 2014, ma o lo o taofia pea o ia i le toese, sei vagana ua totogi le $50,000 ua faatulaga e le faamasinoga ona faatoa mafai lea ona tatala o ia i tua.

Comment Here