Ua taofia nei i le falepuipui i Tafuna se ali’i e 19 tausaga le matua e aunoa ma se tupe e tatala ai i tua, ona o tu’uaiga i lona faia lea o uiga mataga i se teineititi talavou e 13 tausaga le matua i le vaiaso na te’a nei, e ala i lona ulufale fa’amalosi i totonu o le fale o le aiga ma fai uiga mataga i le teineititi a o moe.

O lenei mataupu na tofu atu i le ofisa o leoleo i Ofisa o Leoleo i Fagatogo, ina ua logo e le tama o le teineititi na a’afia le ofisa o leoleo mo se fesoasoani.

O le fa’alavelave na tula’i mai i le fale o le teineititi na a’afia i Nu’uuli i le vaveao o le aso To’ona’i na te’a nei, Oketopa 11, 2014, ina ua alu atu le ua molia ma faia uiga mataga i le teineititi na a’afia, ae o lo o momoe ma lona tuagane laititi e 11 tausaga le matua i le fale, e aunoa ma ni isi o la matua o i ai.

Na taua e le teineitiiti na a’afia i leoleo ina ua fesiligia o ia, o lona tina sa alu i ni isi o fuafuaga a le ekalesia, ae o lona tama sa alu e inupia, ma o ia sa taoto i luga o se tasi o nofoa umi i totonu o le fale.

Na taua e le teineititi, le fa’ateia o ia ina ua ia fa’alogoina se tagata ua tago atu i ona vae ma taumafai e toso atu o ia i le tulimanu o le moega o lo o taoto ai, ae na toe so so i luga ina ua ia manatu, o lona tuagane lea e taalo atu ia te ia.

E le i umi ae ona toe fa’alogoina le taumafai o le tagata e toe toso atu ona vae i le pito i lalo o le moega, ona taumafai lea e tatala lona ofuvae o lo o fai, e le i umi ae ona fa’alogoina loa le tagata ua tago atu i ona vae ma faasolo atu ai lava i lona itutinosa (tulou), ma avea ai loa ma itu na ia nofo fa’afuase’i ai loa i luga ina ua ia fa’alogoina le tiga, ma ia vaaia ai le ua molia, o Tausilinu’u Lokeni, o lo o tu mai i le pito i lalo o le moega, ma ua musumusu atu ia te ia e aua le pisa

Na taua e le teineititi lona fa’alogoina o le malosi o le manogi pia sa sau mai le tino o Lokeni, o lea na ia fa’ataga tu ai loa i luga ma savali i fafo, e fa’afoliga o lo o savali aga’i i le faletaele o lo o tu i fafo o le fale, ae le iloa o le taimi lea na ia taumafai ai e fa’afeso’ota’i ona matua, ae o le taimi lea na ia vaaia ai Lokeni o lo o fealua’i solo mai i fafo o le latou fale o lo o tau su’e po o fea o lo o i ai o ia, o lea na tamo’e ai loa ma lafi i se pupu vao sa fa’asaga mai i le isi pito o le fale nei toe maua o ia e Lokeni.

Na ona vaaia lava e le teineititi na a’afia ua toe savali Lokeni aga’i atu i le stand taxi o lo o fa’asaga mai i le itu o le auala, o le taimi lea na toe alu ai loa i totonu o le fale ma taumafai e toe fa’afeso’ota’i lona tama e tusa ai o le mea sa tupu, ma ia fa’amatalaina loa i lona tama gaioiga a Lokeni sa fai atu ia te ia.

Ina ua fesiligia e leoleo le teineititi, pe aisea na lafi ai i le pupu vao, ae sa ia taua, o lona fefe tele ia Lokeni ina nei ona toe faia se isi mea leaga ia te ia na mafua ai ona lafi.

Ina ua maua e leoleo Lokeni, sa ia malie ai loa e fai sana fa’amatalaga e tusa ai o tu’uaiga fa’asaga ia te ia, lea na ia ioeina ai tuuaiga faasaga ia te ia.

Na taua e Lokeni e fa’apea, o ia sa inupia i le po o le aso Faraile, 10 Oketopa 2014, ae i se taimi o le vaveao na alu ai i le fale o le teineititi na a’afia ma tu’itu’i i le faitoto’a o le fale, ma tatala mai ai e le tuagane laititi o le teineititi na a’afia le faitoto’a ma mafai ai loa ona ulufale i totonu.

Na taua e Lokeni lona alu atu ma saofa’i i luga o le nofoa lea o lo o moe ai le teineititi na a’afia, ma ona vae o lo o u atu i le vaega tonu o lo o nofo mai ai, o lea na ia taumafai ai loa e toso atu vae o le teineititi na a’afia e fa’alatalata atu ia te ia, sosoo ai loa lona faia o uiga mataga e pei o lona tagofia o lona itutinosa.

Na taua fo’i e Lokeni i leoleo e fa’apea, ina ua tu i luga le na aafia ma savali i fafo ma le fale, sa ia mulimuli atu ai loa ma taumafai e su’e o ia, ae ina ua ia le maua, sa ia manatu ai loa e toe fo’i i lona aiga.

Ina ua fesiligia e leoleo le tuagane laititi o le teineititi na a’afia, sa ia taua ai lona vaaia o Lokeni o alu atu i totonu o le latou fale, ma taumafai e toso ese le ieafu o lo o afu ai lona tuafafine o lo o moe, e le i umi ae ona vaaia lona tuafafine ua ala i luga ma savali i fafo, e lei umi ae mulimuli atu ai Lokeni, ae ina ua tuana’i ni nai minute, sa ia toe vaaia lona tuafafine ua toe alu atu i totonu o le fale o lo o tagi atu.

O moliaga e 8 ua tu’uaia ai e le malo le ua molia e aofia ai moliaga mamafa e fa e pei o le talepe fale i le tulaga muamua, tagofia o itutinosa o se tamaitai laititi, faia o uiga mataga faafeusuaiga, faapea ai ma le faia o amioga faasotoma.

O moliaga mama e fa e aofia ai lona faia o ni gaioiga e ono lamatia ai le saogalemu o fanau, inupia ae lei atoa le 21 tausaga, faatupu vevesi i nofoaga faitele, atoa ai ma le leai o sona ID sa ia te ia i le taimi na fesiligia ai o ia i sona ID.