Molia se ali’i i lona faia uiga mataga i lona niece

O le ali’i lea o lo o tu’uaia i lona faia o uiga mataga i le tama a lona tuafafine e 17 tausaga le matua i Pago Pago, sa ia faailoa i leoleo e fa’apea, ua leva tele ona i ai lagona ia te ia e fia avea lona lava ‘niece’ ma ana pa’aga, ae na taua e le niece i leoleo, o le ulua’i taimi lea ua a’afia ai lona olaga i tulaga tau feusuaiga e pei ona a’afia ai i gaioiga sa faia e le tuagane moni a lona lava tina.

 

O le vaiaso nei na tula’i ai le ua molia i luma o le fa’amasinoga faaitumalo, ma ua faamoemoe o le aso Gafua o le vaiaso fou e tula’i ai i luma o le fa’amasinoga maualuga mo le faaauauina ai o lana mataupu.

 

O lo o tuuaia o ia e le malo i moliaga mamafa e fa e aofia ai le faiaiga faamalosi ma se teineititi; tagofia o itutinosa o se teineititi: faia o amioga faafeusua’i i se teinitiiti: faapea ai ma le fai’aiga i se teineitiiti e aiga i ai.

 

I fa’amaumauga a le fa’amasinoga o lo o taua ai e faapea, o le po o le aso Lua na te’a nei, Iulai 16 2013 na vili ai e le tina o le tama’ita’i na a’afia le Ofisa o Leoleo mo se fesoasoani, ona o lona tuagane o lo o ‘ona ma faatupu vevesi i totonu o le latou aiga, ae ina ua taunuu leoleo, na manino ai e ese le mataupu o lo o tula’i mai i totonu o le aiga ma tofia ai loa le tama’ita’i leoleo ia Kimberly Mau na te su’esu’eina lenei mataupu.

 

I fa’amaumauga a le faamasinoga o lo o taua ai e faapea, o le fa’alua ai lea ona tula’i le fa’alavelave lenei i le va o le ua molia ma le tama a lona tuafafine moni lava.

 

O le po o le aso Tofi, Iulai 11 na tula’i mai ai le faalavelave muamua, ma le faalavelave lona lua na tula’i mai i le aso Lua na te’a nei.

 

I le po o le aso Tofi na tula’i mai ai le fa’alavelave muamua, na ‘ona atu ai le ua molia ma alu i totonu o le potu a lona niece e aumai le uaea (charger) e fafaga ai le iPod, ma e taunu’u atu le ua molia o lo o moe lona niece ae o lo o aliali mai le itu o lona manava, ma o iina na amata ai loa ona oso lagona tu’inanau o le ua molia i lona niece, ma alu atu ai ma taumafai e tagofia itutinosa o le tama’ita’i ina ia faamalie ai ona lagona tu’inanau.

 

Na taua e le tama’ita’i na a’afia i leoleo, e leai se mea na tupu i le va o ia ma lona uncle i le po muamua lea, ae i le po lona lua, na alu atu ai le ua molia e ‘ona atu fo’i ma ia vaaia ai lona niece o lo o si’i mai si ona tei laititi, ona fai lea i lona niece a momoe le latou aiga ona alu atu lea i lona fale.

 

E eseese fale e nofo ai le ua molia ma lona niece ae felata’i lava e pei ona taua i fa’amaumauga a le fa’amasinoga.

 

Na fiu le ua molia e nofonofo ma faatalitali mai i lona niece e le’i alu atu se isi, o lea na toe alu ai loa i le fale a lona tuafafine ma fafagu mai lona niece o lo o moe i totonu o lona potu ma i ai la te o i lona fale, ma o le fale a le ua molia na faatino ai loa le solitulafono e pei ona tu’uaia ai o ia e le malo.

 

Na taua e le tina o le tama’ita’i na a’afia i leoleo e faapea, a’o moe i le po lea, na te’i ina ua ia faalogoina le pao o le faitoto’a o le latou fale, ma ia vaaia ai lana tama teine o lo o savali i fafo ma le fale, ona ia manatu lea ai o alu lana tama e fa’aaoga le Fale Taele (tulou), ae ina ua fiu e fa’alogo e le o pao mai lava le faitoto’a o le Fale Taele, o lea na tu ai loa i luga ma uu lana afi penisini ma savali i fafo o le fale e vaai lana tama.

 

Sa manatu le tina atonu e fai se uo tama a lana tama teine fua i le alu i fafo i le leva o le po, e aunoa ma le i ai o sona masalosaloga i lona tuagane, ae ina ua taunuu i totonu o le fale a lona tuagane, sa ia ki le afi penisini ma ia vaaia ai lona tuagane ma lana tama o lo o nonofo telenoa mai i totonu o le fale.

 

Ina ua fesiligia e leoleo le ua molia e tusa ai o lenei faalavelave, sa ia ioeina ai lona fai’aiga i le tama a lona lava tuafafine moni. Sa ia taua fo’i e faapea, e tele aso o mana’o e avea le tama’ita’i na a’afia ma ana uo, o le mafuaaga lea o lona faatinoina o le solitulafono.

 

E $50,000 le tupe lea ua faatulaga e totogi ona faatoa mafai lea ona tatala le ua molia i tua mai le toese i Tafuna.

Comment Here