O le ali’i lea na ulufale fa’amalosi i totonu o le fale a le tama’ita’i sa la nonofo muamua ma ia fa’ao’olima ia te ia, ua molia nei e le malo i le moliaga mamafa o le talepe fale i le tulaga muamua, fa’apea ai ma moliaga mama e lua o le fa’ao’olima i le tulaga tolu.

E $10,000 lea ua fa’atulaga e le fa’amasinoga e totogi, ona fa’atoa mafai lea ona tatala le ali’i o Kalaikona Auelua i tua mai le toese i Tafuna, a o fa’agasolo ai taualumaga o lana mataupu lea ua i luma nei o le fa’amasinoga maualuga.

O le aso Lua na te’a nei na fa’atulaga e faia ai le ulua’i iloiloga o le mataupu a Auelua i luma o le fa’amasinoga fa’aitumalo, peita’i e le i fa’ataunu’uina lea iloiloga, ina ua mana’o le ua molia e tu’u sa’o atu loa lana mataupu e fa’ataunu’u i luma o le fa’amasinoga maualuga.

O le taeao ananafi na teena ai e Auelua tu’uaiga fa’asaga ia te ia, ma ua fa’atulaga ai loa lana ulua’i iloiloga i luma o le fa’amasinoga i le masina fou o Ianuari 2015.

Afai ae tatala le ua molia i tua mai le toese i Tafuna, ua poloaina o ia e le fa’amasinoga e aua nei ona toe taumafai e fa’afeso’ota’i le tama’ita’i o lo o a’afia i lenei mataupu, pe toe taumafai fo’i e alu i lona fale, a ia avea o ia ma tagata nu’u e tausisi i so o se tulafono a le malo i taimi uma.

O le mataupu lenei na tofu atu i le ofisa o leoleo i Tafuna, ina ua talosagaina e le tama’ita’i na a’afia se fesoasoani a leoleo, i le mae’a ai lea ona fa’ao’olima le ua molia ia te ia i totonu o lona potu.

E tusa ai ma fa’amaumauga a le fa’amasinoga o lo o taua ai e fa’apea, o le tama’ita’i na a’afia o le to’alua fa’aipoipo lea a Auelua, peita’i ua fai si umi o valavala i laua e le o toe nonofo.

I se taimi o le vaveao o le aso 18 Tesema 2014 na te’a nei, na ulufale fa’amalosi ai Auelua i totonu o le potu a le tama’ita’i na a’afia, e ala i lona fa’aaoga o le screen wire e oso atu ai, ma ia maua atu ai le tama’ita’i na a’afi o lo o moe i luga o lona moega.

Ina ua iloa e le tama’ita’i ia Auelua i totonu o lona potu, sa taumafai e e ma fai i ai e toe fo’i i lona aiga, peita’i e le i fa’alogo i ai le ua molia, ae sa tago atu ua toso mai le lau ulu o le tama’ita’i na a’afia.

Na avea le e e i luga o le tama’ita’i na a’afia ma itu na lagona mai ai o ia e lona tausoga tama, ma tamo’e atu ai loa o ia e vaai le mafua’aga ma ia vaaia ai Auelua o lo o ia toso mai le ulu a lona tausoga.

Na avea le ita o Auelua i le fa’alavelave atu o le tausoga tama a le tama’ita’i na a’afia ma itu na fa’asaga atu ai ma fa’ao’olima ia te ia, e ala i lona ta tu’i o ona foliga, ma avea ai ma itu na malepe ai le moega o lo o fai ai i luga fusuaga a le au ali’i ia, a o fa’aauau pea ona e e i luga le ua molia ma palau vale.

Na taunu’u leoleo ma latou vaaia ai Auelua i totonu o le fale o le aiga na a’afia, o lo o e e ma lafo upu palauvale fa’asaga i le tama’ita’i na ia fa’ao’olima i ai.

Ina ua fesiligia e leoleo le ua molia i le mea sa tupu, sa ia e e leo tele i luga le ua molia ma ta’utino i leoleo, na mafua ona alu i le fale o le tama’ita’i na a’afia, na alu e fasi le ali’i sa ia vaai o lo lo momoe ma lona to’alua i totonu o le potu.

Na fa’amaonia e le tama’ita’i na a’afia i leoleo, e le gata ua leva ona la le toe nonofo ma Auelua, ae na te le i fa’atagaina fo’i o ia e alu atu i totonu o le fale.