O le faalavelave lea na mafua ai ona maliu se alii i le masina o Oketopa 2010, na faatoa faila e le malo i le vaiaso na tea nei moliaga faasaga ia Curtis Yandall, ma tuuaia ai o ia i le moliaga o le fasioti tagata pa’ivale, faapea ai ma le faatamala faaletulafono ua mafua ai ona oo le maliu i se isi tagata.

Na teena e Yandall moliaga e lua faasaga ia te ia ina ua tulai i luma o le Faamasinoga Faaitumalo i le Aso Faraile na tea nei, ma ua faatulaga le isi ana iloiloga mo le taeao nei.

E $7,500 le tupe lea ua faatulaga e le  faamasinoga e tatala ai Yandall i tua mai le toese, i le maea ai lea ona faaitiitia e le faamasinoga mai le$10,000 sa muai faatulagaina.

I faamaumauga a le faamasinoga o lo o taua ai e faapea, o Darren Smith Tualaulelei na auina atu i le falemai, ua le iloa se isi, ona o se faalavelave na aafia ai o ia.

Na agai atu leoleo ma taumafai e saili le mafuaaga o lenei mataupu, ma faailoa atu ai e se tasi o molimau e faapea, o le faalavelave na tulai mai ina ua maea se fiafia sa faia, ma agai atu ai Yandall e momoli nisi o ana uo teine sa latou i ai faatasi i le pati, ma le faamoemoe a fo’i mai, ona alu lea e momoli tama.

Ae na faailoa e se tasi o molimau sa i ai i le taimi lea i leoleo, sa ia vaaia ia Darren o tamo’e atu ma u’u le pa’u pito i tua o le taavale ao alu le taavale.

Pe tusa o le 20 minute talu ona alu ese atu le taavale, ae toe vaaia e le molimau, ua toe aga’i atu le ta’avale, ma o iina na ia faamaonia ai e sa’o lava o lo o manu’a Darren. Sa faailoa atu foi e nisi o ana uo sa i ai i luga o le taavale ia te ia e faapea, sa pa’u Darren mai le taavale a’o alu.

Na ta’ua i fa’amaumauga e fa’apea, na fai le molimau ia Yandall  e momoli laua ma Darren i lona fale, atonu o lo o moe o ia ona o lo o ‘ona, peitai ina ua o’o i le aso na soso’o ai, na fiu le molimau e fafagu i luga Darren, ae ua le ala, o le taimi lea na ia aveina ai loa le na aafia i le falemai.

E toatolu isi molimau sa latou faailoa i leoleo e faapea, sa latou vaaia Darren o pa’u mai i tua o le taavale a Yandall.

Ina ua fesiligia e leoleo Yandall, sa ia faamaonia ai i leoleo e faapea, sa latou inu pia ma nisi o alii i le po na tulai mai ai le faalavelave, i se taimi o le po lea, sa alu ai e momoli nisi o ana uo i o latou fale, peitai ina ua toe foi mai le taavale, sa ia faalogoina se fagu o ta’e, peitai sa lei manatu o ia o loo i ai se tagata i tua o lana taavale.

I lana faamatalaga sa tuuina atu i leoleo na taua ai e Yandall e faapea, sa lagona lona tei ma le le mautonu ina ua ia vaaia Darren ua manu’a e ui o loo ia vaaia o ia o loo manava pea.

Sa ia faailoa i leoleo e faapea, e lei manao e momoli Darren i lo latou fale i le taimi lea ina nei manatu ona matua o ia sa faainupiaina o ia, sa musu foi e ave o ia i le falemai ina nei fai ai e le falemai se ripoti i leoleo ona loka ai lea o ia i lona faainupiaina o Darren.

O le aso 29 Oketopa 2010 na auina atu ai Darren i le falemai e aunoa ma sona iloaina o se tasi. Sa faia se faata ma iloa ai manu’a na aafia ai lona ulu, ma aafia atu ai ma lona faiai e mafua mai i le taimi na manu’a ai o ia.

O le tamaitai loia fautua ia Donna Clement o loo tulai mo Yandall ae o le tamaitai loia fautua ia Cecilia Reyna o lo o tulai mo le malo i lenei mataupu.

O le moliaga o le fasioti tagata pa’ivale, e mafai ona faasala ai se tasi i le toese mo le umi e le silia i le 7 tausaga, ae o le faatamala faaletulafono ua mafua ai ona oo le maliu i se tagata, e mafai ona faasala ai se tasi i le toese mo le umi e le silia i le 5 tausaga.

O moliaga uma foi ia e tai $5,000 salatupe e mafai ona faasala ai se tasi e le faamasinoga pe afai e faamaonia nei moliaga.