Ads by Google Ads by Google

Molia se ali’i faifeau fa’ao ’olima i se tamaititi tauaso

O le aso Gafua na te’a nei na taofia fa’apagota ai e leoleo i le toese i Tafuna se alii faifeau, ona o tu’uaiga i lona fa’ao’olima lea i se tamaititi tauaso sa savali i luga o le auala i le afiafi o le aso lava lea, e pei ona taua i fa’amaumauga a le fa’amasinoga.

 

O le taeao ananafi na tula’i ai le susuga a Pr. Ioane Tyrell i luma o le fa’amasinoga fa’aitumalo, ma ia teena ai tu’uaiga fa’asaga ia te ia, ma ua toe tatala nei o ia i tua e aunoa ma se tupe na totogi, i lalo o poloaiga a le fa’amasinoga e ao ona ia usita’i i ai.

 

O le mataupu lenei na tofu atu i le Ofisa o Leoleo i Leone i le afiafi o le aso Gafua na te’a nei pe tusa o le itula e 4:35, ina ua talosagaina e le ali’i tauaso na a’afia ma lona grandmother se fesoasoani a leoleo e tusa ai o lenei mataupu.

 

Na fa’ailloa e le grandmother i leoleo e fa’apea, na fa’ateia o ia ina ua fo’i atu si ana tama tauaso i le fale o lo o tagi atu, o lea na ia fesili ai pe aisea ua tagi ai, ae na tali lana tama, sa fasi o ia e le faifeau a le Ekalesia Aso Fitu e ala i lona po o lona gutu i luma o le faleoloa o lo o fa’afesaga’i ma le gym a le aoga maualuga a Leone.

 

O le susuga Pr. Tyrell, o se faifeau a le Ekalesia Aso Fitu Tuto’atasi i le afioaga i Leone.

 

Na taua e le tamaititi tauaso na a’afia ina ua fesiligia o ia e leoleo e fa’apea, ina ua ia tuua le faleoloa lea e fa’afesaga’i ma le fale taalo a le aoga maualuga a Leone o le a toe fo’i atu i le fale, sa fa’afuase’i ona alu atu saoasaoa se ta’avale ma pisi atu ai vai ia te ia, o lea na ia palauvale ai i le ave ta’avale ma fai i ai e fa’a alu lemu lana ta’avale.

 

E le i umi, ae ona iloa se tagata ua aga’i atu ia te ia ma fa’afuase’i loa ona ia po ina ona foliga.

 

Na taua e le tamaititi i leoleo, na te le iloa foliga o le tagata na po ina o ia, ae sa ia fa’alogo o fa’apea atu se tamaloa ia te ia, e aua ne’i toe faia lana mea sa fai, ma tau loa le po ia te ia.

 

Na savali atu se molimau sa i luma o le faleoloa ma fesili i le tamaitiiti na a’afia pe aisea na po ai o ia e le ali’i faifeau, ae ina ua uma ona fa’ailoa e le tamaitiiti tauaso i le molimau le mafua’aga, na alu ai loa le molimau ma ta’u i le grandmother le mea sa tupu.

 

Na pu’e e leoleo ata o le alafau o le tamaititi na tau ai le po, lea sa iloga ai tulaga lima, sa valaau fo’i le vaega a le EMS mo le faia o se siaki faapitoa i le tamaititi na a’afia, mulimuli ane sa auina atu loa o ia i le falema’i i Fagaalu mo togafitiga, ma toe te’a mai ai i tua ina ua mae’a ona siaki o ia e se foma’i, ma fa’amaonia ai le leai o ni manu’a tuga na a’afia ai ona foliga, se’i vagana ai le niniva o lona ulu.

 

Na taumafai leoleo e fa’afeso’ota’i le ali’i faifeau e tusa ai o lenei mataupu, peita’i e le i maua ona sa pisi o ia i se sauniga a le ekalesia i Ottoville, sa mafai fo’i ona feso’ota’i i lana telefoni mo se avanoa e o o atu ai i le Ofisa mo le fa’atalanoaina o le mataupu, ae sa fa’ailoa e le faifeau i leoleo, latou te fetaui i le aso e soso’o ai ona o lo o pisi lava o ia i le taimi lea.

 

Na taumafai fo’i leoleo e fesiligia le ali’i faifeau i le nofoaga tonu o lo o i ai le falesa, ina ia fa’a faigofie ai ona latou fetaui, peita’i sa le’i manino lelei le nofoaga na fa’asino atu e le faifeau, ona o lo o pisi lava o ia, ma ia fa’ailoa ai loa i leoleo latou te fetaui pe a tuua le sauniga i le aso lava lea.

 

E tusa ma le 5 itula talu ona fa’atali le tamaititi tauaso ma lona grandmother i le ofisa o leoleo i Leone, ae fa’atoa alu atu le ali’i faifeau, ae taunu’u atu lava i le leai o se salamo i lana mea sa fai, ae alu atu ma fai i le granmother o le tamaititi tauaso na a’afia, ua tatau le mea ua oo i lana tama, mulimuli ane ai loa fa’atoese i le tina pe afai ua sese lana gaioiga ua fai.

 

Na fa’ailoa fo’i e le ali’i faiteau i le grandmother, na te iloa e sa’o le mea sa ia faia i lana tama, ina ia mafai e lana tama ona a’oa’o se lesona.

 

Sa ia fai fo’i i le grandmother, e le tatau ona ia taumafai e ufiufi le mea sa fai e lana tama, ae tatau ona ave i ai se lesona e tusa ai o le mea sese sa ia faia.

 

Ona o ia tulaga uma, sa manatu ai loa le tamaitiiti tauaso ma lona grandmother ina ia fa’aauau pea le la tagi fa’asaga i le ali’i faifeau, ma taofia fa’apagota ai loa e leoleo le ali’i faifeau i le afiafi lava o le aso Gafua na te’a nei, e fa’atali ai lona tula’i i luma o le fa’amasinoga i le taeao ananafi.

 

O isi poloaiga ua tu’u atu i le ali’i faifeau e usita’i i ai, e aofia ai le fa’asa lea ona ia toe solia se tulafono a le malo, fa’asa ona ia taumafai e tuua le atunu’u, ua fa’asa fo’i ona ia toe taumafai e fa’afeso’ota’i le tamaititi tauaso na aafia, o lona grandmother, po o molimau fo’i a le malo.

 

O le aso 5 Mati 2015 lea ua fa’atulaga e toe tula’i ai Pr. Tyrell i luma o le faamasinoga fa’aitumalo, mo le fa’aauauina o lana mataupu.