Ads by Google Ads by Google

Molia Rev. Filioali’i fa’alavelave na maliu ai se teineititi

O le vaiaso nei na tulai ai i luma o le Faamasinoga Faaitumalo a le malo o Amerika Samoa, le susuga i le alii faifeau ia Rev. Ali’ioaiga Filioali’i mo le tuuina atu o lana tali, e tusa ai o le moliaga lea ua tuuaia ai o ia e le malo, ona o le faalavelave lea na maliu ai se teineititi e 12 tausaga le matua i le tausaga na tea nei.

O le faafeagaiga a le ekalesia EFKAS i Faleniu ua tu’ua’ia e le malo i le moliaga mamafa o le ave ta’avale fa’atamala ua mafua ai ona o’o le maliu i se tagata, ma ua ia te’ena foi i lea moliaga.

I lona te’ena ai o le moliaga mamafa, ua faatulaga ai loa lona uluai iloiloga e faia lea i le aso Gafua o le vaiaso fou, lea o le a iloilo ai e le faamasinoga molimau a le malo, pe lava mau e faamaonia ai sa soli se tulafono, ae poo le alii faifeau foi o loo tuuaia i le solia o lea tulafono.

Afai ae faamaonia e le faamasinoga mau a le malo, ona tuu sao atu loa lea o lenei mataupu i luma o le Faamasinoga Maualuga, e faataunuu ai se faamasinoga autu o le alii faifeau, poo le faia foi lea o nisi maliliega mal e malo e faamuta ai lenei mataupu.

I faamaumauga a le faamasinoga o loo taua ai e faapea, o le faalavelave na maliu ai lenei alualutoto na tulai mai i le aso 19 Setema 2010 i Faleniu.

Pe tusa o le itula e 5:35 i le afiafi o le aso lea, ao savalivai atu le alualutoto  ua maliu ma lana uo i luga o le aualatele i Faleniu, sa alu atu saoasaoa le taavale na uli atu e Rev. Filioali’i, ma so’a ai le na aafia.

Fai ai le ripoti a le  tamaitai leoleo ia Malia Leiato sa suesueina lenei mataupu, sa toatele foi isi fanau laiti sa i ai i le vaega lea o le nuu i le taimi na tulai mai ai lenei faalavelave.

Na taua e se molimau i leoleo e faapea, na tipi e le taavale a le alii faifeau lana taavale, ma ia maitauina ai le saoasaoa tele o le alu o le taavale a le alii faifeau pe tusa o le 35 maila i le itula sa alu ai.

Na faanatinati atu i le falemai le alualutoto na aafia mo togafitiga ma i’u ina coma ai o ia, ae o le te’a laititi o le itula e 12:00 i le vaveao o le aso na sosoo ai, le aso 30 Setema na faailoa aloaia mai ai loa e le fomai le maliu o lenei alualutoto.

Sa faia se taotoga e faamaonia ai le mafuaaga o lona maliu ma faamaonia mai ai i se ripoti a le fomai ia Ivy T. Clement e faapea, o le  tuaga o manu’a na aafia ai le ulu o lenei alualutoto na mafua ai ona oo le oti ia te ia.

E $5,000 le tupe na faatulaga e le faamasinoga e totogi ona faatoa mafai lea ona tatala le alii faifeau i tua, peitai i le maea ai o faafinauga a loia, na toe faaitiitia ai loa i le $2,500 le tupe e tatala ai le ua molia, i lalo o poloaiga a le faamasinoga e ao ona ia usitai i ai.

O le moliaga mamafa lea ua tuuaia ai e le malo le alii faifeau, e mafai ona faasala ai se tasi i le toese mo le umi e le silia mal e 5 tausaga i le falepuipui, pe faasala foi i le salatupe e le ova atu ma le $5,000, poo le faasala foi i faasalaga uma ia e lua.