Ua molia nei le tamaitai lea e pulea se fale kalapu i Satala, o Fa’asaina Park, i tuuaiaga o le faaoolima ma lona faamalosia o ni tamaitai e faia uiga talitane ma o le aso ananafi na tula’i ai Park i luma o le Faamasinoga Faaleitumalo mo ona ulua’i iloiloga.

O lea iloiloga e faamautu ai pe na solia e le ua molia se tulafono e tu’uina atu ai lenei mataupu i luma o le Faamasinoga Maualuga.

O moliaga ua molia ai Park, e aofia ai le faamalosia o uiga talitane lea e mafai ona nofosal ai se tasi i le falepuipui e o’o atu i le fitu tausaga, se sala tupe e $5,000 po o faasalaga uma e lua.  O lo o molia foi o ia i faitauga e lua i le faaoolima i le tulaga e tolu, e mafai ona nofosala ai i le falepuipui i le tausaga e tasi ma se sala tupe e o’o atu i le $1,000.

Na mafai ona toe tatalaina i tua ia Park ina ua mae’a ona ia totogia se tinoitupe e pei ona faatonuina e le faamasinoga, e $10,000.

E tusa ai ma faamaumauga a le faamasinoga, na faafesoota’i e leoleo o le malae vaalele ia le ofisa o leoleo, ina ua sulufa’i atu i ai ni tamaitai se toalua ma se faamatalaga, o i la’ua ua “fefefe e o ese mai i le ofisa o leoleo.”

Ina ua taunuu sui o le ofisa a leoleo ma faatalanoaina nei tamaitai, sa faailoa i ai e nei tamaitai, o i la’ua o lo o sauaina e le la “sponsor” i totonu o le falekalapu i Satala.

O lo o ta’ua i faamaumauga a le faamasinoga e faapea, i se faatalatalanoaga a leoleo ma “ILM” le tamaitai lea o lo o a’afia, sa faamatala e lenei tamaitai, o ia na malaga mai i Samoa ma le manatu e galue i se faleaiga.  Ae ina ua taunuu mai i le aso 10 o Oketopa, 2012, sa ia nofo malamalama ai, e le o se faleaiga o le a galue ai, ae o se fale kalapu (bar).

O lo o ta’ua foi i faamaumauga a le faamasinoga e faapea, na faamatala e “ILM” lona va’aia o ni isi tamaitai o galulue i lea lava fale kalapu, ma o a latou tiute e aofia ai le tautuaina o le mamalu lautele i taimi o taumafataga, ae le gata i lea, sa faatonuina i latou e le latou pule/sponsor (o le ua molia), e nonofo faatasi ma tagata e ulufale atu i totonu o le fale kalapu, aemaise lava alii faifaiva mai i vaa fagota, ma taumafai e u’una’i latou ina ia fa’aalu a latou tupe i totonu o le fale kalapu.

O lo o ta’ua foi i totonu o faamaumauga a le faamasinoga e faapea, i taimi o le a tapunia ai le fale kalapu, e tuu atu ai le faatanaga a Parks i nei alii faifaiva e avea ai tamaitai e latou te tafafao.  Na ta’ua e “ILM” lona ulua’i tete’e i nei faiga,a e peitai, sa faamalosia o ia e Park e o ma nei alii.  Ona totogi lea e nei alii o se potu i le faletalimalo a Scanlan i Fagatogo, e momoe ai i le po, ona o’o lea i le taeao e soso’o ai pe a toe fo’i le tamaitai i Satala, e tu’u i ai e le alii na la o ia se $50 pe $60.

O lo o ta’ua foi i faamaumauga e faapea, na faailoa e ILM i leoleo, e na te le iloa pe tapa e Park se tupe ae e le’i o ese ia tamaitai nei ma alii, ma sa faailoa e ILM i leoleo, e na te le’i vaai lava o aoina e Park se tupe ma e na te le iloa foi pe i ai se tupe faatulagaina, e totogi e se alii pe a o ma se tamaitai i po.

Sa faamalamalama e ILM e faapea, o le o ma se alii e pati (party), o lona uiga, o le o latou o ma alii pe a tapuni le fale kalapu, i se nofoaga e faia ai uiga faaleulugalii po o lo latou faia foi o ni uiga faafeusuaiga i se alii e alu atu i le fale kalapu.  Na faailoa e ILM le tele o ni alii faifaiva ua o latou o faatasi, talu ona ia galue i le fale kalapu i Satala ma le tele o taimi ua ia faia ai uiga faafeusuaiga ma le tele o alii faifaiva.

Sa ta’ua e ILM e le maua sona totogi i lona galue i totonu o le falekalapu seia vagana ai le $50 e tuuina atu e faatau ai ni ona lavalava, ma a i ai se tupe e totoe, ona fa’atau ai lea o ni ana meaai tuuapa.

O le tamaitai lona lua, o MW, sa ia faamatala i leoleo e faapea, na amata ona galue i le fale kalapu i lona tautuaina o tagata e ulufale atu mo taumafataga,a e peitai, e le’i umi fo’i ae amata ona u’una’ia o ia e le ua molia, e nonofo ma alii sa o atu e inu i totonu o le fale kalapu ina ia mafai ai ona fa’aalu a latu tupe mo pia, ma a latalata foi ina tapunia le fale kalapu, ona uunaia foi lea e le ua molia ia nei tamaitai e o ma alii faifaiva.

Na ta’ua e MW, le tele o alii faifaiva na o latou o ma faia uiga faafeusua’iga, ona o lona fefe i le ua molia.  Ae i le aso 20 o Aperila o le tausaga nei, na musu ai MW e o ma se alii faifaiva, ma o i’ina na sauaina ai o ia e le ua molia.  Na ta’ua e MW i leoleo, na pu’e se la taxi ma le alii faifaiva, ae na mana’o foi le alii faifaiva e alu atu ma ILM, ae na avea lea ma itu na musu ai le ua molia, e tu’u uma mai i la’ua e o.

Na ta’ua e MW le tu’i o lona patua e le ua molia ae ona tosoina le ulu o ILM ma po o ia.

Na ta’ua foi e MW i leoleo, e leai foi sona totogi ua maua talu ona galue i le fale kalapu.  O lo o ta’ua i totonu o faamaumauga le aveina o MW i le falema’i mo togafitiga i ni ona manu’a.

Na mafai ona sulufa’i atu nei tamaitai i le ofisa o leoleo a le malae vaalele, ina ua o latou aga’i atu i le malae vaalele ma le ua molia, mo le toe faafo’i o nei tamaitai i Samoa.  O lo o ua i ai nei ia nei tamaitai i lalo o le va’avaaiga a le ofisa o le Social Services.

saunia A. Tuna