Ads by Google Ads by Google

Molia pagota fasioti tagata i le sola i tua mai le toese

O se ali’i pagota o lo o soloatoa i le toese i Tafuna, ina ua ta’usala o ia e le fa’amasinoga maualuga i le moliaga o le fasioti tagata i le tulaga muamua atoa ai ma le faaoolima i le tulaga muamua, ua toe molia nei o ia i lona sola i tua ma le toese e aunoa ma se faatanaga faaletulafono.

 

O le moliaga e tasi ua tuuaia ai Maeli Pitolua po o Isumu e pei ona lauiloa ai o ia e le to’atele, na afua mai i se faalavelave na tula’i mai i le masina o Iulai 2013 i Nuuuli, ina ua faila e se alii sana tagi i le Ofisa o Leoleo faasaga ia Isumu, i le alu atu lea ma momoe ma lona to’alua a’o alu lea alii e faigaluega, ma tofia ai loa le alii leoleo suesue ia Sgt. Det Foma’i Paepule na te su’esue’ina lenei mataupu.

 

I le aso 17 Iulai 2013, na fesiligia ai e leoleo le fafine o lo o aafia i lenei mataupu, i le mea tonu sa tupu.

 

Na taua e le fafine i leoleo e faapea, o le la mafutaga ma lona toalua (lea o lo o tagi i lenei mataupu) ua faamutaina, o le mafuaaga lena na amata ai loa le la mafutaga ma Isumu, o ia o se alii pagota.

 

Fai mai le fafine, o le aso 2 Iuni 2013 na sese atu ai le vili a Isumu i lana telefoni, peitai na avea lea sese ma itu na amata ai loa ona la talanoa ma faamasani, ma faia ai loa le tonu o le a sola atu Isumu i tua mai le falepuipui ae alu atu la te mafuta i lona fale i Nuuuli.

 

I le po la o le aso 28 Iuni seia oo atu i le vaveao o le aso 29 Iuni lava, e pei ona taua e le fafine i leoleo, na sola ese mai ai Isumu mai le falepuipui, ae alu atu i lona fale i Nuuuli ma la mafuta faaleulugali’i ai.

 

Na taua e le fafine i leoleo, pe tusa o le ta o le 7:00 i le afiafi o le aso lea na taunuu atu ai Isumu i lo fale, ae na faatoa alu ese pe tusa o le 3:00 i le vaveao, ma ina ua taunuu Isumu i le falepuipui, sa toe telefoni atu ia te ia e faailoa atu o ia lea ua toe taunuu i totonu o le falepuipui.

 

O se molimau e tuaoi ma le fale o le fafine o lo o aafia, sa ia faamatala i leoleo lona vaaia o se tagata i totonu o le fale i le po o le aso 28 Iuni.

 

Na taua e le molimau i leoleo e faapea, o ia na alu e ave le cash power i le fale o le fafine na aafia, ae na te’i ina ua ia tatala atu le faitoto’a ae ona vaaia ai se tagata i totonu o le fale.

 

Sa ia fesili i le fafine na aafia poo ai lea tagata, ae na tali le fafine, “o le pagota e igoa ia  Isumu, ae ina ua alu le molimau e asi lona tuagane o lo o taofia i le falepuipui, sa ia vaaia ai Isumu o i ai i le toese, o ona foliga uma lava fo’i ia sa ia vaaia i le po lea, e ta solo pe’a i ona foliga.

 

O le aso 15 Iulai na aveese mai ai e leoleo se telefoni feavea’i, mai le ua molia, ma amata ai loa ona saili numera sa ia viliina i le masina o Iuni ma Iulai.

 

Na taua e le pule o le falepuipui i leoleo e faapea, i se taimi o le masina o Iuni, sa ia talia ai se talosaga na tuuina atu i le ua molia, mo se avanoa e fesoasoani ai i le tusiaina o se ie (banner) mo se tasi o ana uo, mai le itula e 6:00 i le afiafi e oo atu i le 6:00 i le taeao o le aso e sosoo ai.

 

Na saili e leoleo faamaumauga o telefoni uma sa faia i le telefoni a le fafine na aafia ma maua ai, sa i ai le taimi na vili atu ai le numera sa ia Isumu i le numera o le telefoni a le fafine na aafia, i se taimi o le 10:00 i le po o le aso 15 Iuni, ma se taimi o le itula e 4:00 i le vaveao o le aso 16 Iuni.

 

O tuuaiga e pei ona alia’e mai faasaga ia Isumu, e tutupu a’e a’o taofia le ua molia i le toese, mo le tuliina o sona faasalaga soloatoa.

 

O ananafi na tula’i ai Isumu i luma o le faamasinoga faaitumalo mo le taimi muamua, ma ua faamoemoe e toe tula’i i le taeao nei mo le faatulagaina o le aso e faia ai lana ulua’i iloiloga.