Ads by Google Ads by Google

Molia ni alii se toalua ona o a la ta’ifau feai

E toalua ni alii ua molia e le malo i le moliaga mamafa, ona o a la taifau feai, lea na osofaia ni isi i luma o la fale i le tausaga na te’a nei.

O le taeao ananafi, na tutula’i ai i luma o le Faamasinoga Faaitumalo ia Ioane Passi o Vatia ma Leneuoti Tuaua o Faga’alu.

O nei mataupu na tofu atu i le Ofisa o Leoleo, ona o se ripoti mai le falema’i o le LBJ i se tamaititi e 10 tausaga ma se tamaitai foma’i na osofaia e ni ta’ifau.

I le mataupu faasaga ia Passi o lo o taua ai e faapea, o le aso 6 o Setema 2012 na osofaia ai e se ta’ifau se tamaititi e 10 tausaga ao savavali ma lona aunty i luga o le auala i Vatia.

Na faamatala e le atalii na ‘ai e ta’ifau i leoleo e faapea, a’o la savavali atu ma lona aunty i luga o le auala, na faafuase’i ona taufetuli atu ni taifau ia te ia ma u lona vae, o le mafuaaga lea na ia ee ai i luga i le tiga, a’o osofa’i pea o ia e ta’ifau ia e lua.

Ae ina ua fesiligia e leoleo le aunty o le alii na manu’a sa ia taua ai e faapea, na faateia o ia ina ua ia vaaia ni ta’ifau se fa o taufetuli atu ia te ia ma lana fanau. Fai mai le tina, e leai se isi o i latou ma lana fanau na mafai ona taofia le o atu o ta’ifau.

Fai mai le tina lea, e lua ta’ifau na osofaia le atalii na manu’a, a’o tu tu le ua molia ma lana fanau i luma o le latou fale ma matamata atu i ai e aunoa ma se gaioiga na latou faia.

Sa ia taua foi e faapea, na osofa’i e ta’ifau a le ua molia lona tuagane i le tausaga na te’a nei, ma e masani lava ona osofa’i e ta’ifau nei tagata e uia le vaega lea o le alatele.

E lima filo na su’i ai le manu’a sa i le vae o le alii na aafia, ina ua togafitia o ia i le falemai i Fagaalu, ae ina ua fesiligia e leoleo le ua molia e uiga i lenei mataupu, na ia taua ai e faapea, na mafua ona tulioso ana ta’ifau, ona sa i ai isi ta’ifau na mulimuli atu i tua o le aiga.

O le aso 22 o Setema na faatamaia ai e leoleo ma se sui o le Ofisa o Faatoaga le ta’ifau na osofaia le tamaitiiti na manu’a.

Ae i le mataupu e pei ona tuuaia ai Tuaua, na mafua mai lea ina ua osofa’i e sana ta’ifau se tamaitai foma’i sa ui ane i luma o lona fale e agai atu i lana galuega i le falema’i.

Na taua e le tamaitai foma’i na aafia i leoleo e faapea, e tolu ta’ifau na taufetuli atu ia te ia ina ua ui ane i tafatafa o le fale o lana tuaoi e agai atu i lana galuega i le aso 6 o Novema 2012 i Fagaalu.

Sa mafai ona ia tete’e atu i ta’ifau e lua, peitai o le ta’ifau lona tolu na alu atu ma u lona vae, lea na manaomia ai filo e tolu.

Ina ua fesiligia e leoleo le ua molia e uiga i lenei mataupu, sa ia ioeina, o ta’ifau na osofaia le tamaitai foma’i o ana ta’ifau.

O le aso 27 o Novema 2012 na agai atu ai leoleo ma se sui o le Ofisa o Faatoaga ma faatamaia ta’ifau na osofaia le tamaitai foma’i.