Ads by Google Ads by Google

Molia ni ali’i se to’alua umia fa’asolitulafono fualaau fa’asaina

E to’alua ni ali’i ua tu’uaia nei e le malo i moliaga mamafa o le la umia fa’asolitulafono lea o vaega o le laau fa’asaina o le mariuana.

 

O le alii o Michael Mikaele na taofia faapagota mai e leoleo i tafatafa o le fale kalapu o le Night Hawks i Iliili, ina maua ia te ia se sikaleti mariuana, ae o Calvin Tupuola na taofia mai e leoleo i luma o se faleoloa i Iliili, ina ua maua e leoleo se lala mariuana i totonu o lana ta’avale.

 

E tusa ai ma fa’amaumauga a le fa’amasinoga o lo o taua ai e fa’apea, o le po o le aso 20 Tesema, na maitauina ai e leoleo i se vaega o Iliili se pikiapu lanu pa’epa’e o lo o aga’i atu i le itu i sisifo, ae leai se fusipa’u a le ave ta’avale o fai.

 

Na faaola e leoleo fa’ailoilo o le ta’avale leoleo e fa’ailoa atu ai i le ave ta’avale ua tatau ona afe i tua lana ta’avale, ma afe atu ai loa le ta’avale a Tupuola ma paka i luma o se faleoloa Asia i Iliili, ma vaaia ai se ali’i sa oso mai i le itu a le pasese ua savali aga’i atu i totonu o le ta’avale, ae nofo ai na o Tupuola i le nofoa o le ta’avale.

 

A o aga’i atu leoleo i le ta’avale a Tupuola, sa vaaia e leoleo le faia e le ua molia o ni gaioiga vavave i totonu o le ta’avale, e foliga mai o lo o tau aapa i se mea o lo o i totonu o le ta’avale e aveese.

 

Ao talanoa leoleo ma le ua molia, sa maitauina le mumu o ona mata, e foliga mai fo’i o lo o fefe o ia, o lea na fa’atonu ai loa o ia e leoleo e oso i fafo ma le ta’avale, ma amata loa ona sailia e leoleo totonu o le ta’avale, ma maua ai se lala mariuana ua mago ona lau i totonu o le ta’avale, o se paipa e ula ai le aisa sa maua i tua o le nofoa o le pasese.

 

Ina ua fesiligia e leoleo le ua molia e tusa ai o le lala mariuana, sa ia ioeina ai o ana mariuana sa fa’atau mai i se isi tagata i le tau e $20, ae ina ua fesiligia e leoleo le ali’i sa to’alua ma Tupuola i totonu o le ta’avale, sa ia fa’ailoa ai i leoleo e fa’apea, ina ua piki e le ua molia o ia i lana ta’avale, sa te’i ina ua fa’aali atu e Tupuola ia te ia le lala mariuana ma fai atu ia te ia, o lana laki sa maua mai i le isi ana uo.

 

O le alii o Mikaele na taofia mai e leoleo i le fale kalapu o le Night Hawks i Iliili, i le mae’a ai lea ona fa’ailoa e le pule o le fale kalapu i leoleo i le taimi na latou ta’amilo ai e siaki autafa o le lotoa o le fale kalapu, o lo o i ai se alii o lo o ula sana sikaleti mariuana i le isi itu o le fale kalapu.

 

Na agai atu leoleo i le itu na taua e le pule o le fale kalapu ma latou maua ai Mikaele o lo o ula mai sana sikaleti, i le vaveao o le aso 21 Tesema 2014.

 

E latalata atu loa leoleo e to’atolu i le vaega tonu o lo o tu mai ai Mikaele, ae latou vaaia loa ua togi ese e le ua molia se mea sa u’u i lona lima, o lea na savali atu ai loa le isi leoleo ma toe piki i luga le mea sa tia’i e le ua molia i luga o le mutia, ma iloa ai, o se afa sikaleti o lo o mumu pea e le’i pe.

 

Ina ua fesiligia e leoleo Mikaele poo le a lea afa sikaleti, na tali le ua molia, “o le afa sikaleti mariuana”, sa ia fa’atauina mai i se tasi o ana uo, ae o lo o i ai fo’i le isi sikaleti atoa i totonu o le taga o lona ofu.

 

Na ta’utino Mikaele i leoleo ina ua fesiligia o ia e fa’apea, e lua ana sikaleti sa fa’atau mai i sana uo o lo o i totonu o le fale kalapu, ma alu atu ai loa ula le isi tasi i tua o le fale kalapu.

 

Sa ia taua fo’i le tigaina o galuega sa feagai ma ia i le aso atoa, ma ua mana’omia fo’i sina malologa mo le afiafi, ma alu atu ai loa ua tafao i le fale kalapu, e inu ai sana pia ma ula ai sana sikaleti mariuana.

 

Na teena uma e Tupuola ma Mikaele moliaga mamafa ta’itasi o le la umia fa’asolitulafono lea o vaega o le laau fa’asaina o le mariuana fa’asaga ia te i laua, ina ua la tutula’i i luma o le fa’amasinoga maualuga i le taeao ananafi, ma ua fa’atulaga ai loa le isi a la iloiloga i le masina fou o Ianuari 2015, lea o le a iloa tonu ai tulaga o a laua mataupu, i le faia lea o ni maliliega ma le malo, po o le tu’u sa’o atu loa e fa’ataunu’u ni a laua fa’amasinoga autu i luma o tagatanu’u o le atunu’u.

 

E ta’i $20,000 lea ua fa’atulaga e le fa’amasinoga e totogi ona fa’atoa mafai lea ona tatala Tupuola ma Mikaele i tua mai le toese i Tafuna.

 

Afai ae mafai ona totogi lea vaega tupe, ua poloaina i laua ina ia aua ne’i o la toe solia se tulafono a le malo, pe la te toe umia vaega o fualaau faasaina, a ia avea i laua ma tagata nuu lelei e tausisi i tulafono a le malo.

 

Ua poloaina fo’i laua ina ia aua ne’i o la toe tagofia le ‘ava malosi po o ni fualaau fa’asaina, pe afai ae mafai ona tatala i laua i tua mai le toese i Tafuna.