O le Aso Gafua na te’a nei na faila ai e le malo moliaga e 4 faasaga i se seila o le Lady Naomi i luma o le Faamasinoga Faaitumalo, ona o se faalavelave na tulai mai i le Aso Tofi o le vaiaso na te’a nei, lea o lo o tuuaia ai o ia i lona faia o uiga mataga i se teineititi e 15 tausaga le matua.

O moliaga ua tuuaia ai Feagaiga Siilata e aofia ai moliaga mamafa e tolu o le faiaiga ma se teineititi e laititi i lalo o le tulafono; faaoolima mataga; atoa ai ma le tagofia o itutinosa o se teineititi, faapea ai ma le moliaga mama e tasi o lona faia o ni gaioiga e ono lamatia ai le saogalemu o fanau laiti.

O moliaga ua tuuaia ai Siilata na afua mai ina ua logo e le tina o le teineititi na aafia le Ofisa o Leoleo, ma faailoa atu i ai se faalavelave ua aafia ai lana tama teine ma le ua molia.

I faamaumauga a le faamasinoga o lo o taua ai e faapea, i le taeao o le Aso Tofi, Tesema 27, 2012, na logo ai e le tina o le teineititi na aafia le Ofisa o Leoleo i Fagatogo, ma faailoa i ai se faalavelave sa tulai mai i luga o le vaa a’o malaga mai, ina ua faia e se Saila o le vaa uiga mataga i lana tama e 15 tausaga le matua.

Ina ua fesiligia e leoleo le teineititi na aafia sa ia taua ai e faapea, ina ua ia faalogoina lona ma’i a’o aga’i mai le vaa i Tutuila, na savali atu i le isi itu o le vaa ma faasavili ai, ae faateia o ia i le alu atu o le ua molia ma talanoa atu ma i’u ina la o ai i totonu o se potu i le pito i lalo o le va’a, o iina na la faiaiga ai ma le ua molia.

Ina ua fesiligia e leoleo le ua molia e tusa ai o lenei mataupu, sa ia faamaonia ai sa la fai’aiga ma le teineititi na aafia i totonu o se potu o le vaa, tusa o le itula e 4:00 i le vaveao, ina ua latalata mai le vaa o le Lady Naomi i le motu o Tutuila.

E $25,000 lea ua faatulaga e totogi ona faatoa mafai lea ona tatala le ua molia i tua, ma afai ae mafai ona tatala o ia i tua, ua faasa ona ia toe taumafai e faafesootai le teineititi o lo o aafia i lenei mataupu, poo se isi foi o lona aiga.

Ua poloaina le taofia o lona tusi folau e le itu a le malo, faagasolo ai taualumaga o lana mataupu, lea ua faamoemoe e toe fofogaina i le taeao nei, ma iloa ai loa pe faataunuu lana ulua’i iloiloga pe tuu sa’o atu loa lana mataupu e faataunuu sona faamasinoga autu, poo le faia foi lea o se maliliega ma le malo e faamuta ai lenei mataupu.