Molia Kovana Itumalo a Manu’a i le fa’ao’olima

O le amataga o le vaiaso nei na tula’i ai i luma o le Fa’amasinoga Fa’aitumalo le Kovana Itumalo a Manu’a, le afioga ia Misaalefua John Hudson, ona o tu’uaiga fa’asaga ia te ia, i lona fa’aoolima lea i ni ali’i faigaluega se to’alua a le Ofisa o Paka Fa’asao i Manu’a i le masina o Setema 2013.

 

O le mataupu lenei na tofu atu i le Ofisa o Leoleo mo lona su’esu’eina, ma tofia ai le ali’i leoleo ia Lt. Paniani M. Ta’afua e fesoasoani i le sui o le Ofisa o Paka Fa’asao ia Neil P. Akana mo le suesueina o lenei mataupu.

 

E tusa ai o faamaumauga a le fa’amasinoga o lo o taua ai e faapea, o le mataupu e pei ona aafia ai ali’i faigaluega e to’alua o Paka Fa’asao na tula’i mai lea i le uafu i Ofu, ona fesiligia lea e Akana o alii e toalua, ma tuuina atu ai loa faamatalaga uma i le Ofisa o Leoleo.

 

Na taua e Akana i leoleo e faapea, i le po o le aso 9 Setema 2013, na vili ai Misaalefua i le isi alii faigaluega na aafia, ma talosaga i ai mo se avanoa e lifi atu ai i le va’a a le Ofisa o Paka Fa’asao mai Ofu e aga’i atu i Ta’u, Manu’a.

 

Na faamatala e le alii faigaluega na aafia ia Akana e fa’apea, e leai sana tala na fai ia Misaalefua o le a maua sana lifi i le va’a, pau lana faamatalaga na fai i ai, e fa’atali se’i talanoa muamua i lona ta’ita’i pe mafai ona latou o i le vaa.

 

Pe tusa o le itula e 11:00 i le taeao na sosoo ai e pei ona taua e Akana i leoleo, sa vaaia ai e le alii faigaluega na aafia ia Misaalefua i luga o le uafu i Ofu ma ona foliga ua matua ita lava, ona alu atu lea o Misaalefua ma talanoa ma le ali’i faigaluega na a’afia, ona i ai lea o se fetali’aiga o upu i le va o i laua.

 

Na taua fo’i e le ali’i faigaluega ia Akana, sa ee atu le ua molia ia te ia ma lafo atu ni ana upu, peita’i na te le i lagonaina lelei po o a upu sa valaau atu ai, e le i umi ae savali atu loa le ua molia i le itu o lo o nofo mai ai le ali’i faigaluega na a’afia ma toso i tua lona ulu ae titina lona ua.

 

Na taua e le alii faigaluega e faapea, sa ia taumafai e aveese lima o le ua molia mai lona fa’ai, ae ona vaaia loa se tama’ita’i ua savali atu ma taumafai e fa’ato’a filemu le mataupu.

 

Sa faia se siaki i le tino o le alii faigaluega na aafia pe le o i ai ni manu’a, ma faamaonia ai e le i afaina o ia i ni manu’a, e ui sa taua e le ali’i na aafia le tiga o le vaega o lona ua na titina e le ua molia.

 

O le alii faigaluega a le Ofisa o Paka Fa’asao sa tu ai i tafatafa o le vaega na tula’i mai ai le fa’alavelave, sa ia valaau ia Misaalefua e aua ne’i ona tu’iina le ali’i o lo o ia titina ina, ma sa avea lea ma itu na liliu atu ai Misaalefua ma toso mai le lima o le ali’i lea na valaau atu ia te ia, mulimuli ane ona ia toe faamamulu lea o lona lima.

 

Na taua e ali’i faigaluega e to’alua na a’afia faapea, ina ua maea le gaioiga sa faia e le ua molia, sa ia faia ni folafola tau faafefe faasaga ia te i laua, fai mai, e mafai ona ia faatonuina soo se tagata o le nuu e fasi laua, ina ua maea ona faia e le ua molia ia folafolaga, ona ia savali ese loa lea.

 

E le i umi ona alu ese atu le ua molia e pei ona taua e le ali’i faigaluega, ae vaaia loa ua toe fo’i atu, ma alu atu ua fusi le ali’i sa ia titina ina ma faatoese i ai e tusa o le mea sa tupu.

 

E to’atele molimau na fesiligia e tusa ai o le faalavelave sa tupu, ma latou faamaonia ai faamatalaga e pei ona taua e i laua na a’afia. Na taua e le isi molimau e faapea, sa ia faalogo o palauvale le ua molia i le ali’i sa ia titina ina.

 

Ina ua fesiligia e Akana ma le ali’i leoleo ia Lt. Taafua le afioga ia Misaalefua e tusa ai o le mea sa tupu, sa ia taua ai e faapea, i le po na sosoo ma le taeao na tula’i mai ai le fa’alavelave, sa ia talosaga ai i le ali’i sa ia titina ina mo se avanoa e lifi atu ai i le va’a i Ta’u.

 

I le taeao na sosoo ai ina ua ia alu atu i le uafu i Ofu ma ia vaaia ai le ali’i sa la talanoa i le telefoni, sa ia fesili i ai pe o le a le mea ua tupu, ae sa leai se tali a le ali’i lea, ona ia toe fai lea i ai, “mai le tele o tausaga faatoa ou tapa atu lava lea ia te oe mo se fesoasoani a’o lea e leai sau tali.”

 

Na taua e Misaalefua, a’o fa’aauau pea ona ia talanoa atu i le ali’i lea, sa ia vaaia le palauvale atu o le ali’i lea ia te ia ma tago ua ato ese le tane ma savali ese.

 

O le taimi lea na taua e Misaalefua na savali atu ai loa i le itu o lo o i ai le ali’i faigaluega lea ma fai i ai e faaeteete lona gutu ma ana tala o lo o fai atu ia te ia, ona toe savali ese lea.

 

Na ioe Misaalefua sa ia titina ina le ua o le ali’i lea, ina ua ia manatu ua le fa’aaloalo ma le palauvale atu ia te ia, mulimuli ane, sa ia toe alu ma faatoese i ai e tusa ai o le mea sa tupu.

 

Na ioeina fo’i e Misaalefua lona faia o ni folafolaga tau fa’amata’u i ali’i faigaluega na aafia, e ala i lona fai i ai, e mafai ona ia faatonu tagata o le nuu e fasi laua.

 

Sa ia taua fo’i e faapea, sa ia lagona le fefe ina ua ia vaai ua tau sauni atu alii e toalua latou te fufusu, o le mafuaaga lea na ia faia ai loa folafolaga tau faafefe ia.

 

E lua moliaga mamafa o le faaoolima i le tulaga tolu, atoa ai ma le moliaga mama e tasi o le faatupu vevesi i nofoaga faitele ua molia ai le afioga ia Misaalefua.

Comment Here