Ads by Google Ads by Google

Molia i le umia aisa faasaina

O le alii lea o lo o tuuaia i lona umia faasolitulafono o vaega o le pauta faasaina o le aisa, atoa ai ma lona tuuina atu o vaega o lea pauta oona e ulaula ai ni tamaitai se toalua e laiti i lalo o le tulafono, ua tofu atu nei i luma o le faamasinoga maualuga lana mataupu ma le faamoemoe e faataunuu ai sona faamasinoga autu, po o le faia o se maliliega ma le malo ma faamuta ai lana mataupu.

O le taeao nei lea ua faamoemoe e tulai ai Fetai Auleafe i luma o le Faamasinoga Maualuga, mo le faaauauina o lana mataupu.

I faamaumauga a le faamasinoga o lo o taua ai e faapea, na logo e ni tagata ia le ofisa a leoleo, ina ua vaaia le faia o se latou evaga ma ni teineiti talavou i se fale tuufua i Tafuna.

Na taunuu leoleo ma latou maua ai ni alii se toafa ma se tamaitai se toatasi i totonu o le fale tuufua, ae maua tamaitai talavou e toalua o lo o lalafi i totonu o le taavale a Auleafe.

Na pelogia e nei tamaitai ia leoleo i o la tausaga, ae na maua mulimuli ane, e fa’ato’a atoa le 17 o leisi ae 16 tausaga o leisi.  O lo o faanofovaavaaia uma i laua i luma o le Faamasinoga Faaitumalo, ona o ni solitulafono sa tausala muamua ai i laua.

Ina ua faatonu e leoleo nei tamaitai, e o mai fafo ma le taavale, na vaaia le uuina e leisi o i laua se tamai ato lanu uliuli ma fesiliai ai o ia e leoleo po o ai e ana le ato, na tali le tamaitai, o le ato a Auleafe.

Na maua e leoleo i totonu o le ato se tamai pepa iila lea e masani ona utu i ai pauta oona o le aisa, faapea ai ma se “straw” ua uma ona tipi le pito, o mea ia e faaaoga e ula ai le aisa.

Na fesiligia e le alii leoleo suesue ia Det. Amani Fatuesi ia Auleafe e faatatau i le tama’i ato uliuli, peitai na tete’e le alii e le o sana ato, ae ina ua faatonu o ia e aveese uma mea o lo o i totonu o taga o lona ofu o lo o fai, na vaaia ai e le alii leoleo le togi ese e Auleafe o se mea sa aumai i totonu o lona ofu.

Na maua e leoleo se pepa iila o lo o i ai vaega o le pauta faasaina o le aisa, o le taimi foi lea na taofia faapagota ai loa le ua molia. Ina ua fesiligia o ia, sa ia taua ai e faapea, o le taga pepa sa ia te ia sa ia maua i luga o le mutia, o lea na ia tago ai loa ma tuu i totonu o lana taga.

Sa faailoa foi e le ua molia i leoleo, o le isi alii e igoa ia Romeo Peretania sa tuuina atu vaega o le pauta oona ia te ia ma tamaitai laiti e toalua.

Na fesiligia e leoleo tamaitai laiti e toalua e uiga i fualaau faasaina sa ia Auleafe, lea na la taua ai e faapea, na alu atu le ua molia ma piki mai laua i lo fale, ma latou agai atu ai i Tafuna ma eva ai.

Na taua e tamaitai ia e toalua i leoleo le alu atu o le ua molia ma ula lana aisa i o la luma, mulimuli ane sa tuu atu e le ua molia le aisa ia laua ma fai atu la te ulaula ai, ona la ulaula atu ai foi lea ma laua. Na faailoa foi e tamaitai ia e toalua i leoleo e faapea, o le nofoaga lava foi lea na ula ai foi a latou aisa i le aso 18 Oketopa, o ia aisa na avatu i le tagata e igoa ia Romeo Peretania.

Na maua i suesuega a leoleo e faapea, o le isi tamaitai o le toalua lea e uo ma le ua molia, ae o le isi tamaitai e uo ma Peretania.

Na faia se suega faapitoa e leoleo i vaega o le pauta oona sa maua ia Auleafe ma faamaonia ai, o ia mea o ni vaega lea o le pauta faasaina o le aisa.

O le alii oi Peretania o lo o taua i faamaumauga a le malo, o lo o i ai sana mataupu tau solitulafono mamafa i luma o le faamasinoga maualuga, lea o lo o tuuaia ai o ia i lona umia faasolitulafono lea o vaega o le pauta faasaina o le aisa.

Ua maea ona sainia se maliliega i le va o Peretania ma le malo, ma o lo o faatali le aso e fofogaina ai lea malilieg i luma o le faamasinoga maualuga.

O lo o taofia pea Auleafe i le toese i Tafuna ina ua le mafai ona ia totogiina le $50,000 ua faatulaga e tatala ai o ia i tua.