Ads by Google Ads by Google

Molia i le tulafono faiaoga a Fagaitua High School

E 48 tausaga o se ali’i faiaoga mai se tasi o Aoga Maualuga i le atunuu sa taofia i le toese i Tafuna, ona o tu’uaiga i lona faiaiga lea i se teineitiiti o lana vasega e 16 tausaga le matua.

 

O moliaga mamafa e fa ua faia fa’asaga i le ali’i faiaoga ia Rose ‘Lose” Auva’a e aofia ai le faiaiga ma se teineititi e laititi i lalo o le tulafono; faia o gaioiga mataga fa’a feusuaiga i se teineititi; faia o amioga faa sotoma; fa’aoolima mataga; atoa ai ma le moliaga mama e tasi o lona faia lea o ni gaioiga e ono lamatia ai le saogalemu o fanau laiti.

 

O le mataupu lenei na tofu atu i le Ofisa o Leoleo i le aso 4 Aperila, 2014, ina ua su’esu’eina e leoleo se mataupu e fa’atatau i le faatupu vevesi na a’afia ai le ali’i faiaoga ua molia nei, ae alia’e ai loa fa’amatalaga e fa’atatau i lenei mataupu, ma tofia ai loa le tama’ita’i leoleo ia D. Utu na te su’esu’eina lenei mataupu.

 

E tusa ai o fa’amaumauga a le fa’amasinoga o lo o taua ai e fa’apea, o le afafine o Auva’a na ia iloaina le mataupu, ina ua ia maua ni fetusiaiga i le va o lona tama ma le teineititi o lana vasega o lo o a’afia i luga o le ‘facebook account’ a le ua molia.

 

Na fa’amatala e le teineititi i leoleo e fa’apea, e fou le vaaiga na ia iloa i lona tama, o le ala lea i le leva o le po e siaki lana ‘facebook’, ae ina ua maua le avanoa o le teineititi na te tatalaina ai le ‘facebook account’ a lona tama, sa ia maua ai la fetusiaiga ma le teineititi o lana vasega o lo o a’afia.

 

O ni isi o nei fetusiaiga e pei ona taua e le teineititi i leoleo, o lo o taua ai fa’amatalaga e fa’atatau i feusuaiga ma uiga mataga sa fa’atinoina e le to’alua lea, ae ina ua fesiligia e leoleo le teineititi o lo o a’afia, sa ia fa’amaonia ai mea uma e fa’atatau i le la mafutaga ma le ali’i faiaoga, lea na amata mai i le aso 12 Fepuari 2014, ina ua ia talosagaina le fesoasoani a le ali’i faiaoga i taimi o aoga pese.

 

Na taua e le teineititi na aafia i leoleo e faapea, o le aso muamua lea na talosaga ai i le alii faiaoga mo se fesoasoani i le aoina o le pese, na amata mai ai le le mafutaga e pei ona tuuaia ai le faiaoga, ina ua loka e le ua molia le faitoto’a o le potu ae sogi atu ia te ia, ae o le aso loa na sosoo ai na la faiaiga ai loa i totonu lava o le potu aoga.

 

O le isi po o le aso lava lea na tusi atu ai le ua molia ia te ia i luga o le ‘facebook’, pe mafai ona la fetaui i le faleaoga, lea fo’i sa ia alu ai i le faleaoga i le po lava lea ma la toe faiaiga ai fo’i ma le ua molia.

 

I le po o le aso 1 Aperila 2014, na toe ‘facebook’ ai fo’i le ua molia i le teineititi, pe maua sona avanoa la te fetaui ai, lea na alu ai loa le ua molia ma piki le teineititi ma la ti’eti’e aga’i i Aoa, o iina na ta’u ai loa e le ua molia i le teineititi, ua iloa e lona to’alua le la mafutaga fa’alilolilo o lo o fai.

 

O le mae’a ai o le la ti’eti’ega atoa ai ma le talanoaga i lea po, na la faiaiga ai loa fo’i i totonu o le ta’avale e pei ona taua i fa’amaumauga a le fa’amasinoga.

 

Na mafai ona maua e leoleo kopi o fetusiaiga i le va o le ua molia ma le teineititi na a’afia, ina ua fa’ataga e matua o le teineititi leoleo latou te lolomiina mai kopi o nei tusitusiga mai totonu o le ‘facebook account’ a le teineititi na a’afia.

 

E $35,000 le vaega tupe lea ua fa’atulaga e le fa’amasinoga e totogi ona faatoa mafai lea ona tatala le ua molia i tua, e fa’atali ai taualumaga o lona fa’amasinoga lea ua amata fa’agasolo i luma o le fa’amasinoga i le taimi nei.