Ads by Google Ads by Google

Molia i le faia o amioga mataga ma fanau talavou

Ua faila nei e le ofisa o le Loia Sili, ia ni moliaga e fa’asaga i se ali’i na faiaoga i le Kolisi Tu’ufa’atasi a Amerika (ASCC), o James Barlow, ua tu’ua’ia ai o ia i lona tu’uina atu i ni ali’i talavou, ia mea inu malosi (pia), fa’amatamata o tamaiti i ata tifaga mataga, atoa ai ma lona faia o feusua’iga fa’aleulugali’i, ma ni alii talavou se to’atolu.

O le taeao ananafi na tula’i ai Barlow i luma o le fa’amasinoga, ona o moliaga o le aveta’avale ae o lo o fa’asuaava, ae toe fa’aopoopo atu i ai ma moliaga e pei ona ta’ua i luga.

Ua molia nei Barlow, lea o lo o loka i le falepuipui se’i vagana ua ia totogia le $100,000, i le faia o amioga fa’asotoma,  faia o amioga mataga i fanau talavou, i lona tu’uina atu o ni ata mataga i ni fanau talavou,  i lona tu’uina o ava malosi i fanau talavou, tu’uina o fanau talavou i se tulaga e ono lamatia ai o latou ola, aveta’avale ona, aveta’avale le fa’autauta ma le aveta’avale e aunoa ma se laisene.

O lo o ta’ua i fa’amaumauga a le fa’amasinoga e fa’apea, i le aso 25 o Oketopa, 2011, na i ai se ali’i talavou i le fale o Barlow, ma o lo o tu’ua’ia le tu’uina i ai e Barlow, o se pia i lenei ali’i talvou, ma ia fa’aali ata tifaga mataga.  Na fa’amatala e lenei ali’i talavou, lona le mautonu ona sa na’o le nofonofo o Barlow ma tilotilo atu ia te ia.  O lo o tu’ua’ia le o o Barlow ma lenei ali’i talavou i le faleoloa e toe fa’atau mai nisi pia, ma o i’ina na fetaui ai le ali’i talavou lona lua, o lo o a’afia i lenei mataupu.

O lo o ta’ua i fa’amaumauga a le fa’amasinoga e fa’apea, na vala’aulia le ali’i talavou lona lua i le fale o Barlow, ma o lo o masalomia le toe amata o le inuga a nei ali’i ina ua taunu’u i le fale o Barlow, ae e le’i umi, ae taunu’u le ali’i talavou lona tolu, o lo o a’afia i lenei mata’upu.

Na fa’amatala e nei ali’i e to’atolu i leoleo, na fa’aauau ona fa’aali e Barlow ia tifaga mataga ma sa ia fa’ailoa atu ia i latou, e na te tu’uina atu le $5 mo i latou, pe a o latou faia tulaga tau feusua’iga.

O lo o ta’ua i fa’amaumauga a le fa’amasinoga, le alu o Barlow i totonu o lona potu moe, ae vala’au ta’itasi mai nei ali’i.

Ua le gata ina molia Barlow ona o lenei fa’alavelave ma tamaiti talavou nei e to’atolu, ae ua molia fo’i o ia i le aveta’avale ae o lo o fa’asuaava.  E tusa ai ma ripoti a le malo, na faia se pati i le fale o le ua molia, lea na aofia ai ma nei ali’i talavou e to’atolu.  Ma na fa’aauau le pati i luga o le alatele i totonu o le ta’avale a le ua molia.

O lo o tu’ua’ia le taofia e leoleo o le ta’avale a lenei ali’i i le amataga o Novema, i Fogagogo, a’o i ai nei ali’i talavou i totonu o le ta’avale, e onana uma.  E le’i umi ona molia Barlow i le tulafono, ae fa’ate’a loa o ia mai i lana galuega i le ASCC.

Ina ua tula’i Barlow i luma o le fa’amasinoga i le aso ananafi, na ta’ua e lana loia, o Mark Ude, i luma o le fa’amasinoga, o le a ia fa’amavae mai i le avea o ia ma loia mo Barlow.  Ae peita’i, na fa’atonu e le ali’i fa’amasino ia John Ward ia Ude, o ia lea o lo o i luga o fa’amaumauga, o le loia mo Barlow.  Ma ua toe fa’aauauina mai lenei mata’upu i le aso.