Ads by Google Ads by Google

Molia i le faaaoga o le agaese fa’ao’o ai manu’a

O le ali’i lea o lo o tuuaia i lona faaaoga o se agaese e faaoo ai manu’a i se isi alii i le afiafi o le aso na sosoo ma le Kerisimasi, ua molia nei e le malo i le moliaga mamafa o le faaoolima i le tulaga lua, atoa ai ma le moliaga mama o le faatupu vevesi i nofoaga faitele.

 

O lo o taofia pea le alii o Viliamu Segio i le toese i Tafuna, e faatali ai le isi ana iloiloga lea ua faatulaga i le faaiuga o le masina nei, i luma o le faamasinoga maualuga.

 

O le mataupu lenei na tofu atu i le Ofisa o Leoleo i Leone, ina ua logo e le aiga o le alii na manu’a le ofisa o leoleo mo se fesoasoani, ma tofia ai loa le tamaitai leoleo ia Deevon Matau na te suesueina lenei mataupu.

 

Na taua e se molimau i leoleo e faapea, o le afiafi o le aso 24 Tesema 2013 a’o sauni e aga’i atu i le lotu o le kerisimasi, na te’i ina ua faalogo atu o valaau atu lona uso mai le latou fale, o lona toalua ua manu’a i se agaese.

 

Na tamo’e atu le molimau i fafo ma le fale ma ia vaaia ai le toalua o lona uso o lo o sisina mai le toto i ona foliga (tulou), ma o lo o ia faaaoga se ofu e taofi ai le sisina mai o le toto i lalo.

 

Na faanatinati gaioiga a le aiga mo le momoliina atu o le alii na manu’a i le taavale mo le falema’i, ma latou fetaui ai ma le taavale a le EMS i luga o le auala i Leone, ona latou tuu lea i ai o le tino o le alii na manu’a ma faaauau atu ai loa e le taavale o le tino o le alii sa manu’a i le falema’i mo togafitiga.

 

I se ripoti mai le falema’i na taua ai e faapea, e 7.5 senitimita le lautele o le manu’a sa i le ulu o le alii na aafia, ae 5.5 senitimita le loloto, o lea na mafua ai ona mana’omia ni filo e tapuni ai lea manu’a.

 

Na fiu leoleo e saili le alii o Segio i le taimi na maea ai le faalavelave, ae i le aso 26 Tesema, na alu atu ai loa Segio i le Ofisa o Leoleo i Leone ma faailoa i ai lona tagata, ma taofia ai loa o ia i le toese i Tafuna.

 

Ina ua taumafai leoleo e saili le mafuaaga o le faalavelave, na taua ai e le alii na manu’a i le agaese e faapea, o le faalavelave na amata mai i se flash drive o lo o i ai ni pese sa fia faalogologo ai Segio.

 

Na taua e le alii na manu’a e faapea, ao latou sauni e o i le lotu o le Kerisimasi, na te’i ina ua alu atu Segio e manao i le flash drive o lo o i ai pese e fia faalogologo ai, peitai sa fai le alii na manu’a i lona toalua, e taofi mea uma ae sauni muamua e o i le lotu.

 

Na avea le faatonuga a le alii na manu’a na fai i lona toalua ma itu na ita ai loa Segio ma alu atu ai loa ua fai la tauiviga ma le alii na manu’a, peitai na mafai ona toe taofi ma savali ese ai loa Segio mai totonu o le fale.

 

E lei umi ae vaaia loa e le alii na manu’a Segio ua toe alu atu i totonu o le fale, ma se naifi o lo o uu atu i lona lima, ma ia sasau atu ai loa le ta ma tau i lona ulu ma manu’a ai, ona ia taumafai lea e togafiti lona manu’a ae o le taimi lea ua sola ese ai Segio mai le fale.

 

Na taua e Segio i leoleo e faapea, ina ua uma ona inu ana fagupia vailima lapopo’a e ono, sa alu ai loa i le fale o le alii na aafia e aumai le flash drive e faalogologo ai, ae na avea le tali atu o le alii na aafia ia te ia ma itu na ita ai, ma toe foi ai loa i lona fale ma aumai le agaese ma ia faaoo ai loa manu’a ia te ia.

 

Na taua e Segio i leoleo e faapea, na te le’i iloaina le mea sa tupu, pau le mea sa ia iloaina, sa i ai se tagata na manu’a i le agaese na ia uuina.

 

Afai ae mafai ona tatala i tua le ua molia, ua poloaina o ia ina ia aua ne’i toe taumafai e faafesootai le na aafia i lenei mataupu.