Molia Arthur Blake i le fasioti tagata i le tulaga muamua

O ananafi na faila ai e le malo le moliaga o le fasioti i le tulaga muamua faasaga i le ali’i o Arthur ‘Afa’ Blake, ma ua faatulaga e le faamasinoga le $500,000 e totogi ona faatoa mafai lea ona tatala o ia i tua mai le toese i Tafuna.

 

Ina ua valaau le igoa o Blake i luma o le fa’amasinoga faaitumalo ananafi, na savali punou le ua molia i luma ma nofo i tafatafa o lana loia fautua ia Karen, a’o loka uma ona lima e lua.

 

Ina ua fesiligia o ia e le ali’i faamasino ia John L. Ward II pe ua malamalama i le moliaga ua molia ai o ia, na tali Blake ‘ioe’, ae ina ua fesiligia e le faamasinoga le loia a le malo ia Camille Phillipe pe o mafaufau le malo e finau mo le faasalaga o le oti faasaga i lenei mataupu, na tali le loia, e le o i ai se manatu o le malo e finau mo le faasalaga o le oti i le taimi nei.

 

Na pau le taimi na finau ai le malo i luma o le faamasinoga mo le faasalaga o le oti, o le mataupu faasaga ia Siaumau Siaumau Jr lea o lo o tuuaia i le moliaga o le fasioti tagata i le tulaga muamua, ona o le fa’alavelave e pei ona tu’uaia ai o ia i lona tagatavaleina o le ali’i leoleo o Lt. Det. Lusila Brown ia Iulai 2010.

 

Ae i faamaumauga a le faamasinoga faasaga i le mataupu a Blake o lo o taua ai e faapea, e toatolu molimau na logoina le Ofisa o Leoleo i le taeao o le Aso Sa na te’a nei, 23 Iuni pe tusa o le 9:51 mo se fesoasoani, i le mae’a ai lea ona vaaia o se tagata o lo o taatia i fafo o lona fale e foliga mai ua maliu, ma tofia ai loa le alii leoleo suesue ia Det. Filemoni Amituana’i na te su’esu’eina lenei mataupu.

 

I faamaumauga na maua e leoleo na manino ai, o le ali’i ua maliu o Lopeti Kakala Veukitau, o se alii Tonga e nofo i Iliili.

 

Na taua e le toalua o Lopeti i leoleo e faapea, a’o i ai i totonu o le fale, na te’i ina ua tamo’e atu lana tama e 7 tausaga ma valaau atu ia te ia, ua fasioti e Afa ia Lopeti. Na taua e le tina i leoleo lona vaaia o le fatafata o lana tama e pisia uma i le toto.

 

Na tamo’e mai i fafo le tina ma ia vaaia ai lona toalua o lo o taatia atu i fafo, ma ona foliga ua lilo uma i le toto.

 

Na saili e leoleo le alii o Blake ma latou maua o ia i se tasi o fale tuufua, tusa ma le maila le mamao ese mai le vaega na tupu ai le faalavelave, ma ina ua fesiligia o ia pe aisea ua sola ai, na ia faailoa i leoleo e faapea, sa ia iloa e o atu nei leoleo ia te ia ona o le faalavelave lea na tupu.

 

Sa maitauina fo’i e leoleo le pisipisia o lavalava o Blake i le toto i le taimi na o latou mauaina ai o ia.

 

Na taua e Blake i leoleo e faapea, na ita ina ua fafagu e Lopeti o ia i luga e alu e fai mai ni manioka e fai ai le latou meaai, pe tusa lea o le va o le 7:30 ma le 8:00.  Sa ia fesili ia Lopeti mo se sapelu e faaaoga e fai mai ai manioka ma lona faamoemoega o le naifi lea na te fasiotia ai Lopeti, peitai ina ua tuu atu se tama’i naifi sa ia manatu ai e le mafai ona ia fasiotia Lopeti i le tama’i naifi lea.

 

Na faasasa’o Blake i tua i le umu kuka ma ia maua ai le kolopa, ma ia manatu ai o le a ia faaaoga le kolopa e fasioti ai Veukitau, o lea na ia savali atu ai, ao u mai le tua o Lopeti, ma ta le pito i tua o lona ulu ma pau ai i lalo.

 

A’o taatia i lalo Lopeti, na taua e Blake lona sasaina o lona ulu pe tusa ma le faafa, ae talu ai sa ia vaaia o lo o ola pea o ia, sa ia manatu ai loa ua tatau ona faaoo le oti ia te ia, o lea na ia sasaina ai loa le isi itu o lona ulu seia oo ina sau i fafo lona faiai (tulou).

 

Na taua e Blake i leoleo e faapea, o lona ita tele ia Lopeti i le faiga o ia pei o se pologa, na mafua ai ona mafaufau e fasioti o ia, ma e tusa ma le vaiaso atoa o tau mafai e saili se auala e fasioti ai.

 

Comment Here