O lo ua fa’ailoa mai se ali’i e fai pisinisi o tupe inivesi ua saisaitia nei i ni moliga o le fa’aaogaina fa’aletatau o tupe a tagata na tu’uina atu e Inivesi i lana kamupani. O le aofaiga o lea tupe ua matauina ua fa’apea ona faia e le ali’i lenei e $2.5miliona NZ.

O le faiga ua matauina ua ia faia sese, o le fa’aaogaina lea o tupe na tu’uina atu e Inivesi i lana kamupani, ma ua toe fa’aaogaina fo’i e totogi ai nisi o tupe a isi tagata inivesi ua manana’o e tala a latou tupe fa’asili o latou Inivesi.

Ua tu’uina atu le sailigama le su’esu’ega auiliili o nei solitulafono uma ua molia ai le ali’i faipisinisi o Gregory Alan Arnott i le SFO a le Malo o Niu Sila, o i latou ia e sailia tulaga tau fa’aaoga sese o tupe Inivesi.[Serious Fraud Office].

O lenei ali’i faipisinisi e na’o le 49 tausaga o lona soifua, ma e fa’atuina lava e ia lana lea pisinisi ua fa’aigoaina o le Derivatek New Zealand, ma sa avea lea pisinisi ma ala e fefa’ataua’i ai Niu Sila  i le fefa’ataua’iga o tupe ma le Malo o Ausetalia “Australian Stock Exchange ASX.”

I le aso ananafi, ua molia ai o lea ali’i milionea a Niu Sila i moliga e lima o le gaoi, ma le isi lima o moliga e afua mai lona pelogia o tagata lautele ma e fa’aputu a latou oa i lana pisinisi ina ia fa’aola atili ai lana pisinisi.

Ua masalomia, aua e le’i fa’amaonia, ua fa’aaogaina e Arnott le $2.5miliona o tupe a tagata Inivesi e sapaia ai lana nogatupe e $20miliona e toe totogia ai tupe o lo ua tatau ona ia fa’afo’ia ia i latou ua mae’a i ai a latou inivesi i totonu o lana Kamupani.

Ua fa’aalia fo’i e le SFO[Serious Fraud Office] ua ia avatu fo’i tala o tupe tau fa’asese, i e o teu a latou tupe i lana pisinisi, ma e le o talafeagai ma tulaga moni o i ai latou teugatupe fa’aputu. O lea faiga ua manatu ai, e le alia’i ai le fa’afitauli o lo’o ua fesaga’i ma lana pisinisi.

O se tala mai le sui pule o le SFO a le Malo o Niu Sila,  Simon McArley, ua ia fa’ailoa mai ai, “O lenei fa’afitauli ua tula’i mai, o le a matua afaina ai lava ituaiga pisinisi fa’apea i le lumana’i, aua o le a leai se mau fa’atuatuaga lea i tagata lautele o lo’o inivesi a latou tupe i lo latou va ma le pisinisi, pe o a mea o lo’o fa’aaoga tonu i ai latou tupe.”

Ua fa’atulaga nei e tula’i Arnott i luma o le fa’amasinoga i Aukilani i le aso 13 Novema 2012 e tali i ona moliga nei. Ae ua fautua mai lava le SFO i le mamalu lautele, “Aua lava ne’i manatu e faia sau inivesi ona o tulaga o e masani ai oe, pe ete manatu fo’i o le sui o lou aiga e ona le pisinisi, ae taga’i toto’a i tatou uma i ala e fa’atautaia ai pisinisi pe o moni pe leai.”

O le sui lenei ua lauiloa i Niu Sila ma Ausetalia i fefa’ataua’iga o siea mo pisinisi tetele ma tupe inivesi talu mai le tausaga e 2006. Ua ia te ia le pulega o le Australian Securities LTd i Niu Sila ma le Derivatek NZ Ltd i lea vaitaimi atoa.

saunia: Leua Aiono Frost