O le taeao ananafi, na tula’i ai i luma o le Faamasinoga Faaitumalo, se alii e galue i le Ofisa o Femalagaaiga a le malo, e tali i ona tuuaiga o lona tuuina atu o ni ID pepelo, i ni tamaitai Saina se toalua.

O Savea Polone, ua molia i le moliaga e lua o le faia o faamaumauga pepelo ma le moliaga lona tolu, o lona fa’aaoga o lona malosi o se tagata faigaluega a le malo, na te maua ai se taui mai i se isi tagata.

O lo o molia faatasi Polone ma le tamaitai o Matagi Leilio, lea o lo o tu’uaia i lona faia o ni faiga fa’aalatua i se tagata faigaluega a le malo.

O le mataupu lenei na alia’e mai i le masina o Setema 2011 ina ua masalomia e ni tamaitai Saina se toalua, o lo o la umia ni ID pepelo mai le Ofisa o Femalagaaiga.

I faamaumauga a le faamasinoga o lo o taua ai e faapea, o le aso 7 o Setema 2011 na malaga ai tamaitai Saina ia e toalua ma Lelilio i Samoa, ma latou toe fo’i mai i le afiafi o le aso lava lea, o le isi foi lea mafuaaga na ala ai ona masalomia ID o lo o faaaoga e i laua ia e toalua.

Na fesiligia e leoleo tamaitai Saina e toalua o lo o aafia e faatatau i la ID, ma la faailoa i leoleo e faapea, sa la talosagaina ia Lelilio, lea e latou te galulue faatasi i se faleaiga, mo se fesoasoani i a la pepa nofomau, ma la tuuina ia Lelilio se tinoitupe e $2,500 mo la pepa.

O le aso 9 o Setema 2011 na fesiligia ai e leoleo ia Lelilio e uiga i lenei mataupu, ma ia taua ai e faapea, ina ua manaomia e tamaitai Saina ia e toalua lana fesoasoani, sa telefoni ai ia Polone ma faatonuina ai o ia e Polone e avatu tamaitai Saina i le aso e sosoo ai mo le pu’eina o la ID.

Na faatoa piki ID i le isi aso na sosoo ai, ma faatonuina ai e Polone ia Lelilio ina ia latou malaga ma tamaitai Saina ia e toalua i Samoa, ona latou toe fo’i mai lea i le aso lava lea, ina ia aua ai nei tulai mai se faaletonu i le aumau ai a i laua ia i le teritori.

E le o mea uma na tutupu na faailoa e Lelilio i leoleo ina ua fesiligia o ia i le aso 9 o Setema, 2011, ae ina ua toe fesiligia o ia i le aso 23 o Setema, sa ia faamatala ai loa mea na tutupu, e aofia ai ma le $600 na tuu ia Polone mo le pu’eina o ID o tamaitai mai Saina.

Fai mai Lelilio, e faatele ona fautua atu Polone ia te ia, e aua nei ona faailoa i se isi gaioiga uma sa latou faia, e aofia ai le tupe sa tuuina atu ma ID o tamaitai Saina, ui o lea, sa ia iloa lelei lava o ID sa tuu atu e Polone i tamaitai Saina, o ID pepelo.

O le aso 13 o Setema na fesiligia ai e leoleo ia Polone e uiga i lenei mataupu. I lea faatalatalanoaga, na faamaonia ai e le ua molia tulaga uma e pei ona faamatala e tamaitai Saina ma Lelilio i leoleo.

Na faamaonia e Polone i leoleo, o ID sa ia tuuina atu i tamaitai Saina, o ID pepelo. Sa ia faailoa e faapea, ina ua valaau atu Lelilio ia te ia mo se fesoasoani, sa ia faatonuina le avatu o tamaitai Saina i le Ofisa mo le pu’eina o laua ID.

Ina ua maea ona pue la ID, sa ia faatonuina ina ia latou malaga i Samoa ma toe foi mai i le aso lava lea, ina ia taofia ai le ono tulai mai o ni tulaga faaletonu i la pepa nofomau i se taimi o i luma.

E lei faailoa e Polone i leoleo le t$600 lea na ia maua mai ia Lelilio i le uluai faatalatalanoaga o lenei mataupu, ae ina ua toe fesiligia o ia i le aso 27 o Setema, sa ia faamaonia ai loa lona mauaina o le $600 mai ia Lelilio mo le faia o ID a tamaitai Saina.

Sa ia faailoa foi e faapea, na mafua ona ia le ta’uina le tupe i le ulua’i taimi na fesiligia ai o ia, ona e musu e alu i le falepuipui, peitai o le tupe lea sa ia faaaoga mo ia lava.

E $20,000 le tupe lea ua faatulaga e tatala ai i tua ia Polone, ae $5,000 ua faatulaga e tatala ai i tua Lelilio.