Ads by Google Ads by Google

Moemiti NUS - Sa'ilia ai PhD

Ua fa’ailoa mai e le susuga le Pule Sili o le Iunivesite o Samoa i Papaogalagala, la latou fa’alepo ua tauau ina tino mai, o le gafatia lea ona sa'ilia fa’ailoga pito i maualuga i o latou potu a’oga ma a’oa’oga fa’atautaia e o latou polofesa ma faia’oga, o fa’ailoga Ph.D po ’o Doctrate Degrees i mata'upu ese’ese.

O se fa’amatalaga a le susuga Polofesa, Lau Fui Leapai Asofou So’o na ia fa’ailo ai, “Ona o le fa’atuai lava ona i ai  o sosia e mo’omia ai e le Iunivesite ona ofoina mai vasega nei i le mamalu o lo ’o manana’o e sa'ilia o latou nei fa’ailoga, o le tuai fo’i lea ona mautinoa le to’atele o i latou e fia maua fa’ailoga nei.”

“O lo o ua to’atele lava tagata ua tusi mai ma fa’ailoa lo latou naunauta’iga e sa'ilia o latou tusi pasi nei i le Iunivesite, ae maise lava le to’atele o alo o Samoa o lo ’o alaala tumau ma soifua a’e i atunu’u tetele i fafo, ae paga lea, e le’i mafai e le Iunivesite i le taimi nei ona a’oa’oina ma sapaia lea ituaiga o a’oa’oga i le taimi nei, ae o lo ’o aga’i atu i ai le tapenaga a la tatou iunivesite i le taimi nei.”

O le mea muamua lava i le fa’ateleina lea o le vasega o faia’oga ua i ai agava’a e a’oa’oina ai nei ituaiga o a’oa’oga maualuluga i le iunivesite, soso’o lea ma le lava tapena i le tulaga i tusi ma sosia mo sa'iliga ina ia mautinoa e le na’o komipiuta e maua mai ai e le fanau na ituaiga o atamai, ae ia mautu lava sa'iliga ma su’esu’ega i tulaga o tusi. O le fuafuaga fa’ata'oto e ao ina tino mai i le isi lima tausaga o lumana’i.”

Ua fa’aalia e Polofesa So’o, “Afai o le a gafatia le a’oa’oina fo’i o nei ituaiga o fa’ailoga i lo tatou Iunivesite, o le a le matele le malo i le auina atu uma o le to’atele o fanau i isi iunivesite i fafo, ae sa'ilia lava i'inei o latou fa’ailoga e agava’a ai i so ’o se galuega. O le faigofie fo’i lea ona fa’asao mai o se isi vaega tupe o lo ’o fa’aalu i sikolasipi a le Malo, ae fa’auia mai pea lea tamaoaiga i lo tatou lava Iunivesite.”

I le taimi nei, o le fa’ailoga maualuga lava o lo o ua mafai ona maua i la tatou Iunivesite o Samoa o le “Masters” i le Samoan. O isi sa'iliga e soso’o ai o Bachelors o so ’o se matata, BA’s, BEd ma BSc. O le fuafuaga o i ai, e gafatia lava ona sa'ilia fa’atasi le Masters ma Ph.D pe a o’o i le taimi e o’o ai le tapenaga a le NUS i le PhD e sa'ilia i ona lotoa e lua, Tekonolosi ma le BA & BSc.

Pe a o’o fo’i le tapenaga a le NUS i le sa'iliga o le Ph.D o le a mafai fo’i ona latou taliaina le vasega o fanau a’oga e apalai mai so ’o se isi lava atunu’u o le pasefika, Ausetalia, Niu Sila ma Amerika. “O le isi lea 'auala, e atili vave ai fo’i le fa’alauteleina o le tomai ma le sosia tau le tamaoaiga, pe a o’o ina toe a’oa’oina alo o tagata Samoa i alaala i atunu’u i fafo, ma atili 'aumaia ai le tupe e sasa’a mai i le lotoifale o Samoa ona o avanoa e tatala atu i tagata mai fafo.”

“O lo ’o misia e le NUS nei alamanuia e tatau lava ona tatou maua e afua mai avanoa e tu’uina i tagata mai fafo e a’oa’oina ai, ae maise i le gagana, tu ma agaifanua, le manana’o tele ai tagata Samoa ua alaala tumau i fafo, e maua e latou fanau se avanoa e a’oa’oina ai i le lotoifale o Samoa lava.”

“O le aoga fo’i o le tu’uina o avanoa fa’apea i fanau mai fafo, e tauva ai le atamai o fanau sa ‘ese o latou a’oa’oga ma o tatou alo i totonu o Samoa lava i so ’o se ituaiga o fa’ailoga ma atamai fa’aonaponei.” O lo o ua mae’a fa’ailoa mai i ni i’ugafono mai le fonotaga na faia i le vaiaso na te’a a le ali’i polofesa ma ni isi mai Trinidad, ua mae’a tapena ai ni sikolasipi e auina mai e fa’aulufale i le tausaga a’oga 2017.

O se tasi lea o polokalama o lo ’o fa’atupeina mai e le Iuni a Europa, e fa’aigoaina o le CarPIMS Carribbean/Pacific Isalnds Mobile Scheme.

O lea fuafuaga fa’ata'oto, ina ia mafai ona fa’aa’ogaina ai ni tamaiti e sa'ilia Masters e to’aono ma se sikola e to’atasi e sa'ilia lona Ph.D i Iunivesite ‘ese’ese ae fesuia’i Iunivesite e a'oa'oina ai. O Iunivesite ua aofia i lea polokalama ua lisia ai: Iunivesite o Papua Niu Kini, NUS, Este Moore, mai le vasa pasefika, ae o isi o lisia o Caribbean University o le West Indies, University of Belez, ma le University of Haiti.

O lo ’o i ai fo’i le isi polokalama ua aofia ai ma le NUS i Iunivesite e agava’a ai se sikolasipi mo a’oa’oga  pe sa'ilia sona Masters mai le Iunivesite o Caribbean po ’o se Iunivesite i so ’o se malo lava o Europa i lalo o le polokalama lea o le Erasmas Mundus.

Peita’i, o le fa’afitauli lea e alia’i mai, afai ae malaga 'ese atu i latou ua maua Masters ina ia sa'ilia o latou Ph.D e mafai ai ona faia’oga mo le Ph.D & Masters Degree, ua amata ai la ona le toe lava faia’oga mo a’oa’oga lea e fa’agasolo nei mo fa’ailoga ia e sa'ilia, peita’i, ua taumafai le pulega ma le Komiti Fa’afoe ia tino mai le miti taua lea mo le aga’i i luma o le Iunivesite o Samoa.

“E le tatau lava ona misia lenei avanoa lelei, e tele fo’i lona vaega tupe e sapaia e lea avanoa mo le fa’aleleia atili o itu uma lava o le Iunivesite pe a to’ai taunu’u lea fa’amoemoe.”

“E le o faigofie ona maua mai ni isi faia’oga fou mo le Iunivesite, ma e tatau lava ona sa'ilia mai fo’i i fafo, ae maise i alo o le atunu’u, pe tupuga mai fo’i i o tatou tagatanu’u, ina ia taliu mai e tautua le atunu’u na tupuga atu ai, ae se’i atina’e lea itu tau le atamai sa'ili ae a le lumana’i o le malo ma ona tagata lautele.”

saunia: Leua Aiono Frost