Ads by Google Ads by Google

Moe sese le fai’ava moega tina o lona to’alua

O le fai’ava lea na maua atu o moe sese i le moega o lo o momoe ai le tina o si ona toalua faatasi ai ma uso laiti e toalua o le fafine, ua faasa e le alii faamasino ia John Ward II ona toe alu i le fale o le fafine ma lana fanau, pe taumafai foi e toe faafesootai i latou i soo se auala ao faagasolo ai lana mataupu i luma o le Faamasinoga Faaitumalo.

Na teena e le alii o Fauatea Asiata le tuuaiga o le faatupu vevesi i nofoaga faitele ua tuuaia ai o ia e le malo, ina ua tulai i luma o le faamasinoga i le amataga o le vaiaso nei mo le taimi muamua.

I le tulai ai o Asiata i luma o le faamasinoga, na talosaga ai loa le malo ina ia toe tolopo lana mataupu, ae se’i faaauau suesuega a leoleo i le mea sa tupu, ma iloilo ai pe faamata e i ai ni moliaga faaopoopo e ono faila faasaga i le ula lea.

O lenei faalavelave na tofu atu i le Ofisa o Leoleo i le amataga o le vaiaso nei, ina ua te’i a’e i luga le tina o le toalua a le ua molia ma vaaia le ua molia o lo o moe i le va o ia ma lana fanau teine e toalua i luga o le moega.

Na agai atu leoleo i le fale ma aumai le ua molia ma fesiligia i le mea sa tupu, ma maua ai sa inupia o ia i le ao a’o le’i oo i le taimi na tupu ai le faalavelave.

I faamaumauga a le malo, o lo o tuuaia ai Asiata i lona sasaeina lea o le screen wire o le faamalama o le potu, ona a’e lea i luga o le faamalama ma ulufale ai i totonu o le potu.

E tusa ai ma faamaumauga a le faamasinoga, o le ua molia, o le tane faaipoipo lea a le isi tama teine a le fafine na aafia, ae o lo o i ai nei o ia i Alaska, ae o lo o faamuli atu lona tina ma le ua molia.

O le vaiaso fou lea ua faamoemoe e toe tulai ai le ua molia i luma o le faamasinoga mo le fofogaina o lana mataupu.

O le tulai mai ai o lenei mataupu i luma o le faamasinoga, na mapuna a’e ai manatu ma finagalo faaalia o ni isi o le atunuu, ma latou fesiligia ai le va tapui o fanau ma matua, aemaise ai foi va o tama i o latou tuafafine.

E lei mamao atu foi na tofu atu ai i luma o le faamasinoga faaitumalo se mataupu e tai foliga tutusa ma lenei mataupu, lea o lo o tuuaia ai se alii i le soli tofaga lea i lona tuafafine, ma ia faia ai ni uiga mataga i luga o le moega a lona tuafafine a’o momoe ma si ana tama pepe (tulou).

O le iuga na oo i lea alii e pei ona taua i faamaumauga a le faamasinoga, na matua fasi faamo’amo’a lelei lava o ia e le toalua a lona tuafafine ma papatu ai mata ona o le amio valea.

Na taua e se tasi o tamalii o le atunuu e lei finagalo e faalauiloa lona suafa, o le tele o mataupu ua tutupu mai i ona po nei ua fesiligia ai le va tapui o fanau ma matua aemaise ai o tuagane i o latou tuafafine.

Sa ia taua aafiaga i mafaufau o tagata e mafua mai i fualaau faasaina o le isi lea auala o le tutupu o faafitauli nei, e le gata i lea, o le vaivai o mafutaga i le va o aiga aemaise ai lava le vaivai o tagata e saili i le Alii i le ao ma le po, ma le malosi o le tagofia o le ava malosi.

Saunoa lea tamalii e faapea, “toeititi leai se faalavelave matuia e tupu mai i le atunuu e le aafia ai le ava malosi, ae o lo o manino le Tusi Paia fai mai, o le uaina, o le faapisapisao lea, o i latou e fetagofi i ai e le popoto i latou.”

O le fautuaga a lea tamalii o le atunuu, e tatau ona toe tapu’e mafutaga ma olaga i totonu o aiga, ma vaai poo fea lea e afua mai ai faafitauli o lo o tutupu.

“Afai ua tau leai ni mafutaga i totonu o aiga, ua oo i le taimi ua tatau ai ona toe faaleleia ia tulaga, afai foi ua seasea faia ni lotu afiafi, ua tatau ona toe faaleleia lea tulaga, talatalanoa lelei matua i fanau ma toe tapu’e o latou olaga, ina ia aua nei toe tutupu mai nei uiga mataga i le lumanai,” o le fautuaga lea a lea tamalii.

I aso ua mavae i totonu o nuu ma aiga, e mamafatu le faasalaga o se mau paolo poo se tama tane na te faia ni uiga mataga faapenei.

Fai mai lea tamalii, tusa lava poo le tina o le fafine poo le tamaloa foi, e tatau lava ona faaaloalo i ai i latou o lo o mau paolo i totonu o aiga ma faaaloalo i matua o latou taitoalua, e pei lava foi o latou matua.

“O le mea e te faia i le isi tagata e toe fai e se isi tagata ia te oe,” o le saunoaga lea a lea tamalii.