Manu'a se teineititi ina ua tauai e ni isi le pasi na malaga ai

E to'atasi se teineititi aoga na manu'a ina ua lavea i se ma'a na togi atu e se tagata aga'i i le pasi aoga i le aso To'ona'i na te'a nei, ina ua mae'a le ta'aloga e sailia ai le siamupini i le va o le 'au a le Aoga Maualuga a Tafuna ma Fagaitua, ma manumalo ai Fagaitua i 'ai e 24-22 i se ta'aloga mataina ma finau.

Na fa'amaonia mai e le tama'ita'i loia ia Terri Bullinger o lo o gafa ma le taulimaina o mataupu a fanau laiti i luma o le fa'amasinoga fa'aitumalo e fa'apea, e to'atasi le tama'ita'i aoga na manu'a ina ua togi e se tagata se ma'a aga'i i le pasi aoga, ma o lo o fa'aauau pea i le taimi nei su'esu'ega e tusa ai o lenei fa'alavelave.

O le fa'aiuga o lenei fa'alavelave na taofia fa'apagota ai e leoleo ni ali'i talavou se to'afa i le toese i Tafuna i le fa'aiuga o le vaiaso na te'a nei, ma tu'uaia isi i le fa'ao'olima ae o isi i le faia o gaioiga e save'u ai le nonofo filemu o tagata lautele.

O i latou e to'afa na taofia e leoleo e aofia ai ni ali'i se to'atolu e laiti i lalo o le tulafono, ma le to'atasi e 19 tausaga le matua, o ia lea o Kapetli Lasalo, lea ua molia i le fa'ao'olima i le tulaga tolu atoa ai ma le fa'atupu vevesi i nofoaga faitele.

O le fa'alavelave lenei na tula'i mai i le aso To'ona'i na te'a nei pe tusa o le itula e 12:15 i le aoauli, i le vaega tonu o lo o i ai le fale'aiga a le McDonalds ma le Pizza Hut i Tafuna, ina ua tauai e ni tagata le pasi sa momoli atu ai le au ta'aalo Football a Fagaitua.

I fa'amaumauga a le fa'amasinoga o lo o taua ai e fa'apea, na maua e le ofisa o leoleo i Tafuna le tele o ni telefono mai ni isi o tagata sa maimoa i le ta'aloga, i lo latou vaaia lea o le to'atele o tamaiti aoga ma paaga a le aoga maualuga a Tafuna, o lo o laulau tutu i luma o le fale'aiga a le McDonalds fa'apea ai le Pizza Hut, e tofu ma ma'a i o latou lima, e foliga mai o lo o fa'atalitali i le taimi e ui ane ai le pasi aoga o lo o momoli atu ai le au ta'aalo a Fagaitua.

E le i umi se taimi ae toe taunu'u se isi telefoni i le ofisa o leoleo i Tafuna, ma fa'ailoa i ai e le molimau lona iloaina o le tagata na ia togiina le ma'a aga'i i le pasi la'u pasese lea na momoli atu ai isi sui ma tagata matamata a le au a Fagaitua.

Na toe aga'i atu leoleo i le vaega tonu sa telefoni atu ai le molimau, ma fa'asino ai loa e le molimau i leoleo le ali'i tonu sa ia togiina le ma'a aga'i i le pasi na manu'a ai le teineititi na a'afia, e le gata o lo o u'u ni ma'a i lona lima, ae o lo o latou fa'atasi fo'i ma isi tamaiti aoga mai Tafuna sa masalomia lo latou tauaia o le pasi ma ta'avale a tagata sa lagolagoina le au ta'aalo a Fagaitua.

Na taua i fa'amaumauga a le fa'amasinoga e fa'apea, na togi e le ali'i o Lasalo le ma'a aga'i i le pasi la'u pasese na malaga ai isi tagata matamata mai Fagaitua, ma alu atu ai le ma'a ma manua ai le teineititi na a'afia.

Na teena uma e i latou e to'afa tu'uaiga fa'asaga ia te i latou e tusa ai o lenei mataupu, ma ua toe tolopo ai loa le isi a latou iloiloga i le fa'aiuga o le vaiaso nei, lea ua fa'amoemoe e tatau ona o o atu i ai ua mae'a su'esu'ega fa'aopoopo a leoleo o lo o faia fa'asaga i lenei mataupu.

Na taua e Bullinger i le Samoa News e fa'apea, o se tasi lenei o mataupu o lo o maitauina pea le tula'i mai i taimi o ta'aloga a fanau aoga, o le tauai lea e isi tamaiti aoga o pasi e momoli ai fanau aoga pe a uma ta'aloga.

O le ali'i o Lasalo, o le taimi muamua lenei ua tu'uaia ai o ia i se solitulafono, sei vagana ai le isi to'atasi o ali'i talavou e to'atolu na molia muamua fo'i i le fa'atupu vevesi i taimi o ta'aloga a fanau aoga.