E 41 aso ua fa’asala ai e le fa’amasinoga ia le ali’i 19 tausaga o Jack Banse, i le falepuipui, ona o lona fa’afoe o se ta’avale e le i fa’ataga ona fealua’i i luga o le alatele, a’o fa’asuaava, ma lavea ai le ta’avale ma manunu’a ai ni isi.Sa saunoa le alii faamasino o John Ward II, na ave’ese e Banse se laisene o le isi taavale ma fa’apipi’i i se ta’avale e lei fa’ataga ona fealua’i i luga o le alatele, ona alu ai lea ma piki ana uo mo se tietiega, a’o ia tagofia le ava malosi.O se vevesi na tulai mai i le va o Banse ma lana uo teine a’o alu le taavale, na mafua ai ona so’ona alu saoasaoa le ta’avale e pei ona saunoa Ward, ma iu ina lavea ai ma manunu’a ai i latou sa i totonu e aofia ai ma le ua molia.“E laki e lei oti se tasi i le faalavelave lea na mafua mai ona o lau gaioiga faatamala sa fai, aua o le mea moni lava, o le a e ala mai lava i le falepuipui i aso uma o lou ola ma e faapea ai, sa i ai se tagata na oti ona o oe,” o le saunoaga lea a le alii faamasino, ao lei tuuina atu le fa’asalaga a le faamasinoga.Na fa’ailoa e le faamasinoga ia Banse, o le fa’asalaga lea o le a tu’uina atu ia te ia, o le a a’oa’oina ai lona mafaufau mai le solitulafono sa ia faia.Na faailoa e Ward i le ua molia, e foliga mai sa fai tu’u tia’i lava o ia e fai toatasi ana fa’aiuga, e aunoa ma se fa’amalumaluga a se tagata matua, peita’i o le taimi lenei, o le a taumafai le fa’amasinoga e tulimata’i ana fa’ai’uga uma o le a faia, ina ia mautinoa o ia fa’aiuga o le a fesoasoani ai i le toe fa’atulagaina aemaise ai o le fa’aauauina o lana a’oga.E tusa ai ma faamaumauga a le faamasinoga na taua ai, o le 2008 na valavala ai matua o lenei alii talavou, ma avea ai loa lea o se mafuaga e lei faaumaina ai lana aoga, e lei faauuina foi lana vasega 12.“O lou avanoa mulimuli lenei e faailoa mai ai i le faamasinoga le suiga i lou olaga e pei ona e taua, afai ae toe molia mai oe, o le a le toe i ai loa se isi avanoa e tuuina atu mo oe,” o le lapataiga mulimuli lea a le faamasinoga na tuuina atu ia Banse.I lalo o se maliliega na sainia e Banse ma le malo, sa ia ioeina ai le moliaga mamafa o le ave taavale ‘ona lea na mafua ai ona oo ni manu’a ia te ia, ae solofua e le faamasinoga isi moliaga uma sa totoe ai.E 4 tausaga na manatu le faamasinoga e faasala ai Banse i le falepuipui, peitai ua faamalumalu lona tuliina o lea faasalaga, ae o le a faanofovaavaaia o ia mo le 5 tausaga i lalo o poloaiga a le faamasinoga.O nisi o ia poloaiga e aofia ai le faasa lea ona ia toe tagofia le ava malosi i totonu o le 5 tausaga, auai i ni aoaoga e fesoasoani ai i aafiaga o le ava malosi i lona olaga, ia lesitala lona igoa i le Kolisi Tuufaatasi mo le aveina o le mataupu o le GED, ina ia maua ai lana Tipiloma o le Vaega 12, e fesoasoani ai i le agai i luma o lona olaga aoaoina, ma saili ai se galuega e fesoasoani ai i ona matua.E 41 aso lea ua poloaina e le faamasinoga e loka ai Banse i le toese i Tafuna, ma o ia aso o le a toese mai ai aso e 11 ia ua uma ona ia tuliina, ona totoe ai loa lea o aso e 30, ma o le afiafi o le Aso Tofi na tea nei i le itula e 6:00 na amata tuli ai le faasalaga faasalaga.Ua poloaina foi o ia na te totogia le salatupe e $100.