Ads by Google Ads by Google

MEA PU’EATA FAITATALA

E leai se taimi e faia ai ni aso faamanatu i totonu o Samoa e le uma atu ae mapuna a’e ai ni ata pupu’u, e pei o nai ata pupu’u ia na alia’e mai i le taimi a’o pisi le atunuu i le faamanatuina o le 112 tausaga talu ona sisi le fu’a a le malo Meleke i ona laufanua.

Ata faamaela le isi olomatua na sau i le aumalaga a se tasi o ausiva mai Samoa ma faamatala i le Samoa News nisi o vaaiga malie sa tutupu i le latou api ao i ai le latou ausiva i le faamanatuina o le fu’a i lenei tausaga.

Fai mai le molimau a le tina i le Samoa News, na lilo i manatu o le latou aumalaga o le nofoaga lea sa latou nonofo ai, e tofu tulimanu o le fale ma le fanua ma mea pu’eata o loo faapipi’i ai, ai lava o ni gaioiga sa faia e le aiga e anaia le fale, mo le puipuia lea o le saogalemu o le latou fale mai tagata e ono osofaia i se taimi.

O le mea matautia muamua lava na tulai i totonu o le latou api, o le ato tupe a le isi fafine o le malaga na leiloa ae o loo i ai se tupe tele i totonu.

“Ga pei lava e su’e i pagoka o le koese le su’eiga o le ako a si fafige lea o le makou malaga, peika’i iga ua faailoa mai e le aiga sa makou api ai e mafai oga saili le ako pe afai e iloilo le mea pu’eaka, ga makou keke’i ai iga ua maua mai i kokogu o le mea pu’eata, le aka o le isi fafige o le au malaga ga ia gaoia le ako a si fafige lea,” o le pe’ape’a mai lea o le fofoga o le tina lea i le faamatalaina o mea na tutupu i le latou malaga.

“Ou ke fai aku foi o le faikakala o gei mea o mea pu’eaka alii, aga leai le mea pu’eaka lea, loga uiga e maua le pagota fasioki kagaka ae le maua le ula ga avea le ako kupe,” o le tala lea a le fafine lea na momoliina maia le tala lea i le Samoa News.

E ese mai ai i le ato lea na faitatala i ai le mea pu’eata, ae o isi mea na iloa uma e le mea pu’eata, o gaioiga uma a tagata o le nuu e faia i totonu o le api, aemaise lava le au inupia ia e sosola i tua e inu pia, ona tulioso mai lea i luga o le pa i le taimi e loka ai, e leai ma se gaioiga a le au ula ia e lei maua e le mea pu’eata.

Ga pau le mea e le’i mai mafai i le faitatala o le pu’eata ona ta’u i le aumalaga, o le au ao lavalava e pei o mitiafu ma ie solosolo, ina ua fiu isi tagata o le nuu e saili latou ofu ua le maua lava.

Fai mai le fafine lea, e i ai le au malaga e foi atu i Samoa ae fono le nuu ma faasala ai le au amio valea ia na le usitai i tapu a le nuu.

Toe lava o ni nai minute tini le tuuga fautasi i le aso Lulu o le fu’a ae tau vaovao loa fusuaga a nisi o fafine sa matamata i lalo o pulu tetele o loo i luma o le ASCO Motors i Pago Pago.

Na mafua ona tau vaovao fusuaga ina ua fesili atu le isi fafine i lona toalua e faaigoa mai fautasi ma latou tulaga i le tuuga lea o le a tini mai, ae faailoa atu i ai e le toeaina, o le Aeto mai Pago Pago lea o loo muamua mai, sosoo atu ai ma le Satani II mai Nuuuli, o le Matasaua mai Manu’a i le tulaga tolu, Fuao mai Vatia i le tulaga fa, ma le Tolotolo o le Tamauli mai Salelologa i le tulaga lima.

Na laulogo uma le vaipanoa lea o loo tumu ai le au matamata i le fesili leotele a le fafine ma faapea atu i lona toalua, “O le a le igoa o le vaa lea sa e fai mai gei ai lava,?” o le fafine lea i lona toalua.

“Se o le Kolokolo o le Kamauli mai Salelologa i Savai’i,” o le toe tali atu lea a le toeaina ma lona leo ua tau siisii i luga i le ita, ona o lea ua vaai atu ua tau fai autilo uma mai tagata matamata o loo i ai i le leotele o le olomatua, peitai na tei le toeaina ina ua faapea atu lona toalua, “kalosia ae aua gei maua se kulaga o le ga vaa.”

Na tei le toeaina ina ua ia faalogo atu i le alaga a le isi fafine agai i lona toalua fai mai, “Fai fuafua o isi foi Kamauli ia e ku ku aku i i e, vaai se fafige i uma miliga vaa ae vaai mai kagaka o loo mili aku ma le ma’a,” o le ita o le fafine lea na amataina le vevesi i le tali e leotetele o tagata i le tala a le tama’i fafine lea na fai atu ia te ia, na mafua ai ona tau vaovao mai peitai na vave ona toe faatoa filemu ina ua valaau atu i ai tagata, “oki a i leoleo ia ua o mai.”

E le’i umi ona tau vaovao fusuaga a fafine ia ae maua tala ua loka mai e leoleo ni alii laiti se toalua mai Nuuuli, ina ua la tauaia ni taavale ma laulauvavale solo i luga o le auala, ina ua maua le tala ua le mua le vaa a le latou nuu.

Na faaiu puta le sisiga fu’a a le au ula ia ina ua loka e leoleo ma tutulai ai i luma o le faamasinoga i le taeao na soso’o ai.