Ads by Google Ads by Google

Maualuluga o totogi o le isi mafua’aga o fa’afitauli i le LBJ

Na taua e sui o le Pulega a le Falema’i o le LBJ i le taimi o le iloiloga sa faia i le maota o sui i le vaiaso na te’a nei, o le tulaga maualuluga o lo o i ai totogi mo ni isi o tagata faigaluega i totonu o le falema’i, o se tasi lea o mafua’aga o lo o fa’atupulaia ai pea le fetaia’i o le falema’i ma fa’afitauli tau tupe.

 

O le fesili la pe fa’apefea ona taofia lea fa’afitauli, na taua ai loa e le Ta’ita’ifono fou o le Komiti Fa’afoe a le Falema’i, susuga Rev. Filifa’atali M. Fuiava e fa’apea, o le auala lea ua vaavaai i ai le Komiti Fa’afoe, o le taumafai lea e amata ona faia ni auala e fa’aitiitia ai totogi o tagata faigaluega.

 

O lea faiga e pei ona saunoa Rev. Filifa’atali, e le o aofia ai totogi o foma’i, teine tausima’i, atoa ai ma i latou o lo o ofoina atu le auaunaga tau soifua maloloina mo le atunu’u.

 

“O le mea moni e pei ona ou fa’ailoa atu i luma o le Komiti mamalu, o lea ua manino uma atou i le mafua’aga o fa’afitauli o lo o tutupu mai i le Falema’i, ae o le fesili tele o lo o tula’i mai, afai e mafai ona foia fa’afitauli nei, fa’amata e uma ai le tutupu pea o fa’afitauli”, o le saunoaga lea a Rev. Filifa’atali.

 

Na taua e le afioga i le tama’ita’i faipule ia Vui Florence Saulo e fa’apea, o le isi lea mafua’aga o lo o taua i ripoti mai le falema’i o lo o mafua ai fa’afitauli tau tupe i le falema’i, o tulaga i totogi o ni isi o tagata faigaluega o lo o i ai.

 

O lea saunoaga na lagolagoina e le afioga i le ali’i faipule ia Larry Sanitoa, Vailoata E. Amituana’i ma Atalina Asifoa.

 

Saunoa Vailoata e fa’apea, afai e le foia e le pulega a le falema’i fa’afitauli tau i totogi o lo o tula’i mai i le falema’i, e le mafai ona foia fa’afitauli o lo o tutupu mai.

 

Saunoa Rev. Filifa’atali e fa’apea, ina ua mae’a ona la fa’asoa ma Taufete’e e fa’atatau i fa’afitauli o lo o tutupu i le falema’i, na la mauaina ai loa lea, o totogi lava le mafua’aga autu o le fa’afitauli tau tupe o lo o a’afia ai le falema’i mai le tele o aso.

 

Pau lana talosaga sa tu’uina atu i luma o le komiti a le maota o sui, e le tatau fo’i ona televave le pulega a le falema’i ma le komiti fa’afoe e saili se fofo o le fa’afitauli e pei o le fa’aitiitia lea o totogi, ina ne’i avea ma auala e tutupu mai ai ni isi fa’afitauli e ono toe a’afia ai le falema’i.

 

“O le isi auala lea ua naunau le falema’i e fa’amalosia, o le fa’amalosia lea o le aoina mai i totonu o aitalafu, ina ia fesoasoani ai i le fa’afitauli o lo o tupu pea i aso ta’itasi”, o le saunoaga lea a Taufete’e.

 

O se tasi o fa’afitauli na taua e Taufefe’e sa ia maitauina ina ua ulufale atu i totonu o le falema’i, o le fa’aaogaina lea e le pulega tuai sa i ai o ta’iala o lo o fa’atulaga ai totogi a le feterale e fa’atulaga ai totogi a le falema’i, ma mafua ai loa ona oso maualuga i luga totogi o tagata.

 

I le fa’aiuga o le iloiloga a le falema’i ma le maota o sui, ua malilie ai itu e lua ina ia fa’aauau pea ona latou galulue i auala e fesoasoani ai i le falema’i o lo o tausia le soifua maloloina o le atunu’u.