E lua valaaulia ua tauaao e le afioaga o Vailoatai mo le fa’amanatuina o le fu’a a tagata Samoa o lo o alala ma aumau i le aai o ‘Los Angeles’ (LA) fa’apea ai ma le aai o ‘Seattle’, mo se avanoa e fa’afiafia ai i le fa’amanatuina o le latou fu’a i le amataga o le masina fou o Aokuso.

O le au siva a le afioaga o Vailoa o lo o valaaulia mai e le komiti o le fu’a i le aai o Seattle, ae o le au kirikiti a tama’ita’i o lo o valaaulia mai e le komiti o le fu’a a LA.

E pei ona silafia, o le au kirikiti a tama’ita’i mai Vailoatai na manumalo i le sailiina o le siamupini, i le ta’amilosaga o le fu’a sa fa’ai’uina i le masina o Aperila na se’i mavae atu nei, ina ua faiaina ai le au kirikiti a tama’ita’i mai Malaeloa i se ta’aloga finau.

Ina ua fesiligia le ta’ita’i o le itumalo, le afioga i le Alo o Salamasina ia Satele Galu Satele Sr. e tusa ai o valaaulia a lona afioaga, sa ia fa’amaonia mai ai le tauaao lea e le afioaga o valaaulia mai Amerika.

Ae ina ua toe fesiligia i tulaga o tapenapenaga mo le malaga atu e tali i ia valaaulia, na faamautu mai ai e le Alo o Salamasina le mae’a lea ona faia o le fa’aiuga, o le a le malaga le afioaga e tali i valaaulia ua tu’uina mai, ona o ni isi o mafua’aga tatau.

“Ua mae’a ona feiloa’i le afioaga ma ua tasi le filiga, o le a le malaga le nu’u e tali i valaaulia, ona o mafuaaga e pei o aoga a le fanau, aemaise ai o galuega a le to’atele o lo o auai i le au siva faapea ai ma le au kirikiti”, o le saunoaga lea a Satele.

“O le fu’a i L.A e faamanatu i le vaiaso muamua lava o Aokuso, o le taimi fo’i lea ua amata ai aoga a le fanau, ma ua manatu ai loa e le talafeagai le malaga o fanau e faafiafia i fafo ao lea ua a’e aoga, e sili atu ona taua i le afioaga aoga a le fanau nai lo fa’afiafiaga nei”, o le saunoaga lea a Satele.

Na taua e ni isi o le afioaga o Vailoatai i le Samoa News, e taua tele avanoa ua maua mai i Amerika mo au faafiafia a le afioaga, peitai o le faafitauli o aoga, galuega faapea ai ma pasese.

Na taua e le isi tina e auai i le au kirikiti e fa’apea, e manaia valaaulia pe ana faapea e totogi mai e L.A ma Seattle pasese e malaga atu ai le ausiva ma le au kirikiti a Vailoa.

Sa ia taua fo’i e fa’apea, manaia ae lafo e Vailoa le fa’aaloalo i le au kirikiti a tama’ita’i mai Malaeloa lea na latou maua le tulaga lua i le ta’amilosaga o le fu’a na se’i mavae atu nei.

Ae ina ua fesiligia Satele i sona finagalo pe le lafo loa le avanoa ia Malaeloa e malaga ai i le valaaulia, ae na saunoa Satele, o le fa’aiuga lea e fai e le komiti o le fu’a a L.A ma Seattle, o i latou na aumaia le valaaulia.

E ui ua le malaga le afioaga i le valaaulia, ae na faafetaia e Satele komiti o lo o tapenaina fu’a a faiganu’u Samoa i Amerika, i le amanaiaina lea o le afioaga o Vailoatai mo lana ausiva ma lana au kirikiti.