I le toe faaauauina ai o le iloiloga a le Komiti Suesue a le Senate, le SSIC i le taeao ananafi, na faafofoga ai sui o le komiti i nisi o mataupu e faatatau i le falemai o le LBJ e faatatau i tagata faigaluega ua faamalolo ma faate’a, atoa ai ma nisi o tagata faigaluega ua faamavae.

O nisi o tagata faigaluega ua faamavae e aofia ai le loia fautua a le falemai o Kevin Kornegay, lea ua faamoemoe e faamuta lana tautua mo le falemai i le aso Faraile o le vaiaso nei, faapea ai ma tamaitai e toatolu ia e toafa i ai tagata sa tuuaia i le faaaogaina o le tupe e silia ma le $200,000 a le falemai.

Na taua e le pulesili o le falemai ia Michael Gerstenberger e faapea, ua maea ona tuuina atu le tusi faamavae a le alii loia i le pulega ma le komiti faafoe, ma ua latou sauni foi e taliaina lana tusi faamavae ma le fuafuaga, o le aso Faraile o le vaiaso nei e faamuta ai lana auaunaga mo le falemai.

Sa fesili Senatoa Velega Savali Jr pe o i ai se fuafuaga a le falemai e toe faa faigaluega se isi loia, ae na tali Gerstenberger, e le o mautinoa mai i le taimi nei lea fuafuaga e ui o loo i ai pea le manaoga i le tatau lea ona i ai se loia a le falemai.

Ae mo tamaitai faigaluega e toatolu ia na tuuaia i le faaaogaina o le tupe mai le falemai, ua taliaina foi e le pulega ma le komiti faafoe a latou faamavaega, ma ua i luma nei o le Ofisa o le Loia Sili faamaumauga e uiga i suesuega sa faia i lea mataupu.

E toatasi le isi tagata faigaluega i le Ofisa o le Tupe a le falemai na faamalolo i le lua vaiaso talu ai, e pei ona faamaonia e Moananu Va i luma o le komiti i le taeao ananafi, ma e le o i ai se tagi ua faia e lea tagata faigaluega faasaga i le faaiuga ua faia e le falemai ua oo atu i lona ofisa.

Na fesiligia e le afioga i le alii Senatoa ia Fuata Dr. I’atala le LBJ pe aisea ua taumafai ai e saili mai se foma’i faapitoa mo le faata ae o lea o loo i ai se tasi o alo o le atunuu ua faamaonia le faauu  mai i le matata o le vaaia lea o le  faaata i le falemai.

Na taua e Gerstenberger e faapea, o le faaiuga a le falema’i e toe saili mai ai se isi fomai faapitoa mo le faaata, na faia lea ina ua faate’a e le komiti faafoe le alo o le atunuu lea sa galue i le vaega o le faata, ina ua faamaonia lona faia o ni gaioiga e le talafeagai ma tulafono ma ta’iala a le falemai.

E lei taua le suafa o le fomai sa galue mo le faata peitai na saunoa Moananu e faapea, ina ua soli e le alii lea aiaiga ma tulafono o lana galuega, sa faia ai loa le faaiuga a le komiti faafoe e faamalolo mo le 2 masina ina ia aoaoina ai se lesona mai le gaioiga sa ia faia.

Ina ua maea le 2 masina na faamalolo ai lenei alii, sa toe valaauina i le galuega peitai e lei umi lava se taimi ae toe soli foi e le alii lea aiaiga ma tulafono o lana galuega, e ala i le fiu lea o fomai e faatali ni ripoti mo faata a nisi o gasegase e leai ma se mea, ae maua ane le ula lea o loo nonofo lelei lava i lona fale.

“O le taimi lea na ou faia ai loa le faaiuga faatasi ma le komiti, ina ia faamalolo loa le alii fomai lea, ma o le taimi nei, ua galue nei o ia i le Matagaluega o le Soifua Maloloina,” o le saunoaga lea a Moananu.

O loo i ai le fuafuaga a le falemai mo le toe faa faigaluegaina lea o nisi fomai e pei ona faamaonia e Gerstenberger i luma o le komiti, ma ua faamoemoe e faatupe mai avanoa faigaluega ia i le vaega tupe e $400,000 mai le Initeria, lea foi ua galulue faatasi ai le LBJ ma se tasi o Aoga Faafoma’i i Kalefonia mo le auina mai o ni fomai e fesoasoani i lenei manaoga.

O loo faaauau pea iloiloga a le komiti suesue i le taeao nei.