Ads by Google Ads by Google

MAUA SE TINA O MALIU I TOTONU O LONA FALE

O lo o faagasolo i le taimi nei suesuega a le Vaega o Leoleo Suesue a le Matagaluega o Leoleo, i le faalavelave na atu ai se tina o lo o maliu mai totonu o lona fale i Tafuna i le aso Gafua na te’a nei.

 

I se faatalatalanoaga ma le Komesina o Leoleo e faatatau i lenei mataupu, na faamaonia mai ai e le susuga William Haleck le maua atu e ni isi o aiga tuaoi o lea tina o lo o maliu mai totonu o lona fale aunoa ma ni ona laei o i ai (tulou).

 

Na taua e Haleck e faapea, ina ua maua e ni isi le tino o le tina, na vaaia ai ua amata ona manogi lona tino, ma o lo o masalomia o le aso Lulu o le vaiaso na te’a nei na maliu ai o ia, pe a fuafua atu i le tulaga sa i ai lona tino ina ua maua.

 

“E leai ni faailoga na maua i le tino o le tina e tau masalomia ai sa faia i ai e se tagata se gaioiga faasolitulafono ua mafua ai lona maliu, pau le tulaga o lo o i ai i le taimi nei, o lo o tumau pea lo latou tauaveina o lenei mataupu o se faalavelave matuia ua mafua ai ona maliu se tagata, ae faatoa manino le mafuaaga o le faalavelave pe afai ae maea suesuega a leoleo o lo o faagasolo i le taimi nei,” o le saunoaga lea a Haleck.

 

O le tina ua maliu e na o ia lava lona fale. O ni isi o ona aiga  tuaoi na agai atu e asi o ia i le aso na maua atu ai ua maliu, sa latou fiu e tuitui le faitoto’a o le fale pe’ita’i o lo o loka, ae ina ua latou vaavaai atu i totonu, sa iloa atu ai lona tino o lo o taatia mai i totonu o le fale, ma le moega o lo o pisia uma i le toto (tulou).

 

O le faatali le faia o se taotoga i le tino maliu o lenei tina ina ia sailia ai le mafuaaga o lona maliu, e pei ona faamaonia mai e le alii komesina o leoleo.

 

Na taua e se alii e nofo latalata i le nofoaga na tulai mai ai le faalavelave i le Samoa News e faapea, o le tina ua maliu e nofo lava na o ia i lona fale.