Maua se pomu i Fagatogo

E lata i le itula o poloka e leoleo se vaega o le auala tele i Fagatogo i le taeao ananafi, a’o faatali le vaega o le Ami Faaleoleo e o atu e aveese se pomu (morta) na maua i lalo o le auala laupapa lea e sosoo ma le maota fono a le atunuu.

 

E masalomia o se pomu lenei na faaaoga i le taimi o le taua lona lua o le lalolagi, ma o ni isi nei o a’upega sa totoe ma taatitia solo i vaega o le atunuu, e pei ona taua e se sui o le Ofisa o le Puipuiga o le Saogalemu Lotoifale.

 

O le pomu na maua e ni isi o le aufaigaluega a le Faletupe o Atina’e i le taimi na galulue ai e faamama le otaota i totonu o le taulaga ananafi, ae maua ai loa e se tasi o le aufaigaluega le pomu i lalo o le auala laupapa, ma logoina ai loa le Ofisa o Leoleo.

 

Na faateia le toatele o le atunuu ananafi aemaise ai ave taavale ina ua vaaia le pisi solo o taavale ma pasika a leoleo ananafi i le te’a laititi o le 11:40 i le taeao, ma vaaia ai le poloka e leoleo o le faasolo atu i luma o le maketi fou e aga’i atu i luma o le maota Fono a le atunuu.

 

O le toatele o le atunuu sa i ai i lea vaega o le taulaga na tuu fesili i le mafuaaga ua taofia faafuase’i ai e leoleo le auala ma taavale, ae ua atili ai le fia maua e tagata o le au o le paipa ina ua vaaia ni isi o alii ma tamaitai leoleo o lo o tau fetuli solo e foliga mai o lo o i ai se faalavelave matuia ua tula’i mai.

 

Ae ina ua fesiligia le taitai o le Vaega o le Traffic a le Ofisa o leoleo ia Muagututia John Cendrowski i le mafuaaga o le poloka o taavale, ae na faailoa mai e le alii leoleo se pomu na maua e ni isi i lalo o le auala laupapa, ma o lo o taatia i luga o le mutia i le isi tulimanu o le maota fono.

 

Na tumutumu solo alii ma tamaitai leoleo i le vaega o lo o i ai le pomu, ona o le taumafai e tutuli faamamao ese tagata e ui latalata atu i le vaega o lo o taatia ai le pomu, ao faatali ai le taunuu ane o sui o le Ami Faaleoleo mo le aveeseina o le pomu.

 

E lata i le toa sefulu sui o le Vaega Fuimu sa i ai faatasi ma le latou loli fuimu e tasi i le vaega sa maua ai le pomu, ona o le manatu lava i le puipuiga o le saogalemu i se faalavelave e ono tula’i mai.

 

A’o faatali ai le taunuu ane o sui o le Ami Faaleoleo mo le pikiina ese o le pomu, e lei umi ae vaaia loa e le Samoa News le isi sui o le Ofisa o leoleo ua alu atu ma se ato lanu uliuli, ona uu lea e le alii leoleo lea o le pomu i le isi ona lima ma tuu i totonu o le ato, ona ia tuu lea o le ato i totonu o le taavale ma alu ese loa ma ia.

 

O le fesili pe mafai ona pa le pomu pe ana umi ona taatia ma velasia, e le’i mafai ona maua se tali o lea fesili, pau le tulaga na mafai ona faamaonia mai e ni isi e i ai le tomai i a’upega faapenei, o lo o atoa uma le tino o le pomu ma e ono mafai ona pa i so o se taimi.

 

E le o se taimi muamua lenei ua maua ai ni pomu i totonu o le atunuu. I ni nai tausaga e lei mamao atu na maua ai foi se pomu i Alega, lea foi na agai atu ai leoleo mo le aveeseina mai.

 

O le isi pomu lata mai na maua i le atunuu e pei ona faamaonia mai e se sui o le ofisa o leoleo, o le pomu lea foi na maua i tua o le Falemeli i Fagatogo lava.

 

O le itu taua e pei ona taua e sui o le ofisa o leoleo, o le leai o se faalavelave na tula’i mai ai i lenei pomu.

Comment Here