Ads by Google Ads by Google

Maua se ali’i na tau sa’ili mai i le 2007

Ua i’u nei su’esu’ega a leoleo, ma ua loka nei i le to’ese i Tafuna ia le ali’i o Solomona Pati po o Simati Pati, lea na fiu e sa’ili mai lava i le 2007, se’ia o’o mai i le aso ananafi, ina ua pu’eina o ia i totonu o le fale o Fa’amasinoga Fa’aitumalo.O Pati na tu’ua’ia i lona a’afia i le fa’atau fa’anana o ni pusa albacore mai i le kamupani i’a a le Samoa Packing. Ma na pu’eina o ia ananafi, ina ua aga’i atu e piki sana kilia mai i le fale fa’amasino e toe fa’afou ai lona ID, ma maua ai i fa’amaumauga a le fa’amasinoga, o lo o i ai se tusi saisai ua leva ona saini ma ta’atia e pu’e ai lenei ali’i.Na pu’e lava Pati i le te’a la’ititi o le 9 i le taeao ananafi, ma ave atu ai lava i totonu o le potu fa’amasinoga, ma faia ai loa lona ulua’i iloiloga, lea na ia te’ena ai tu’ua’iga a le malo fa’asaga ia te ia.O lo o tu’uaia Solomona i moliaga o le gaoi, ave fa’agaoia o ni mea totino sa tu’uina atu i lalo o lana va’ava’aiga, fa’apea ai ma lona faia o fa’amaumauga tau fa’asese.O le mataupu lenei na alia’e mai ina ua maua e se ali’i sa galue muamua i le kamupani i’a o le Samoa Packing, ni pusa albacore i se tasi o faleoloa Asia. Ae o pepa na fa’apipi’i i fafo o le pusa, o lo o ta’u mai ai, o pusa wahoo, ae o apa sa i totonu, o apa albacore. e le gata i lea, sa ese numera na fa’anumera ai pusa ma apa, toe fa’apipi’i ai ma le igoa o le StarKist i pusa, ae o apa mai i le Samoa Packing.O le fa’aiuga o le tausaga e 2006 e o’o mai i le masina o Ianuari 2007, o lo o talitonu, na tula’i mai ai lenei fa’alavelave.O se tasi o molimau autu na mafai ona maua mai ai e leoleo nisi o fa’amatalaga e uiga i lenei mataupu, o le to’alua o se tasi o ali’i faigaluega i le kamupani na taofia ma molia i lenei mataupu, lea sa ia fa’ailoa i leoleo lona fa’alogoina o le to’atele o tagata faigaluega o le kamupani i’a, o lo o talanoa ma pisa ai i tala e fa’atatau i le fa’atau fa’agaoi o pusa wahoo e ni isi o tagata faigaluega i faleoloa tua.E to’atele isi tagata faigaluega na fesiligia e leoleo e uiga i lenei mataupu, e aofia ai ma i latou uma na molia ma tu’uaia.Na logoina nisi o ta’ita’i o le kamupani e tusa ai o le fa’afitauli ma talosagaina ai loa faleoloa Asia ina ia taofia le toe fa’atauina o pusa nei. Sa fa’apea fo’i ona aga’i atu sui o le kamupani i nisi o faleoloa Asia ma latou toe fa’atauina mai ai pusa nei mo a latou su’esu’ega, e aofia ai ma le tu’uina atu i le Ofisa o leoleo.O nisi o faleoloa sa fa’atau atu ai pusa wahoo nei e aofia ai ni faleoloa Asia i Aua, Pago Pago, Nu’uuli, Malaeimi, Vaitogi ma Iliili.Na taua e se tasi o molimau a leoleo lona va’aia o Solomona o lo o ia fu’eina ni apa i totonu o lana ato ma sau ma ia i fafo ma le lotoa a le kamupani, ae o le isi molimau sa ia taua i leoleo lo la aveina ma le ua molia o apa ma label i lo aiga, ma afai ae mae’a ona fa’atino le gaioiga o le fa’aigoa sese o apa, ona susunu lea o pepa sa fa’aaoga ina ia aua ai ne’i maua e leoleo pe afai ae su’esu’eina lenei mataupu.Na taua fo’i le galulue fa’atasi o nisi o tagata faigaluega na tu’uaia i lenei mataupu i le tu’u pusaina o apa, fa’aigoa sese ma fa’aaoga se lifi e la’u mai ai i fafo e fa’afoliga o lapisi, ma maua ai le avanoa e la’u atu ai i ta’avale mo le auina atu i faleoloa e fa’atau ai.O nisi na tu’uaia e le malo i lenei mataupu e le gata o tagata faigaluega sa galulue i le vaega o lo o tu’u pusa ai le apa wahoo, ae aofia ai fo’i ma ni ali’i leoleopo se to’afa.Na taua e le malo, e tusa ma le 313 pusa wahoo na gaoia ma fa’atau atu i le ta’i $28 pe $30 i le pusa e tasi, ma maua ai le tupe e tusa ma le $9,390, ae o isi apa sa gaoi ma fa’atau lusi e tusa ma le $6,260, ma o le tupe lea sa alu ia i latou e to’afa sa autu i ai lenei osofaiga lea e aofia ai ma le ua molia.Fai mai le malo, e tusa ma le $15,000 le tupe atoa na gau ai le kamupani o le Samoa Packing ona o lenei mataupu.E $5,000 le tupe lea ua fa’atulaga e le fa’amasinoga e totogi ona fa’atoa mafai lea ona tatala o ia i tua, ma ua fa’amoemoe o le itula e 8:30 i le aso Faraile nei o le a faia ai loa lana ulua’i iloiloga i luma o le fa’amasinoga fa’aitumalo.O nisi o vaega sa fautuaina ai e le fa’amasinoga le itu a le malo e ao ona silasila toto’a i ai, o le avanoa e mafai ai ona toe maua se feso’otaiga ma le ali’i leoleo lea sa ia faia le su’esu’ega o lenei mataupu, lea ua le o toe galue mo le matagaluega o leoleo, atoa ai ma le mafuaaga na ala ai ona tuai ona pu’e fa’apagota e le malo le ua molia i le taimi e fa’afouina ai lona ID i le Ofisa o Femalagaaiga i tausaga ta’itasi.