APIA, SAMOA - O le osofaiga a leoleo a Samoa i le aso Lulu o le vaiaso nei na maua ai i le nuu o Tuvao ni fana sa nana i lalo o ni lua tetele, o pulufana faapea ai ma le anoanoa’i o mariuana.

Na faamaonia mai e le Sui Komesina o Leoleo ia Leaupepe Fatu Pula i le Samoa News i le aso ananafi e faapea, o fana, pulufana ma mariuana na maua i le osofaiga a leoleo, ua i lalo nei o le latou vaavaaiga a’o faagasolo ai a latou suesuega i le taimi nei.

“O mea uma ia sa maua mai i le osofaiga a leoleo ua taofia nei i le ofisa mo suesuega o loo faaauau, ma e masalomia o nisi o fana nei sa maua mai o aupega sa masalomia le gaoia mai,” o le saunoaga lea a Leaupepe.

“O le taimi nei e leai se isi ua taofia pe masalomia sei vagana ai le faaauauina pea lea o suesuega a leoleo,” o le isi lea ana saunoaga.

Saunoa Leaupepe, o le tele o fana na maua ua tanu i pu sa eli ma e masalomia, o nisi o fana nei sa faaaoga i le taugafana lea sa faia i le va o leoleo ma nisi o le nuu o Faleatiu i le masina na te’a nei, lea na maliu ai se alii se toatasi ae manunu’a ai leoleo e toatolu.

O le nuu o Tuvao e i le va o Faleatiu ma Fasioto-uta i le itumalo o Aana.

O nisi o mea na maua i le osofaiga lenei a leoleo e aofia ai ni fana otomeki, fana faasaina, pulufana o aupega malolosi, atoa ai ma le anoanoa’i o sikaleti mariuana ua uma ona taai, ma lau mamao ua uma ona tuu pepa.

O le osofaiga a  leoleo i Tuvao na afua mai ina ua maea ona faia se leleiga i le va o leoleo ma alii ma faipule o Faleatiu i le lua vaiaso talu ai, ma malilie ai loa Faleatiu o le a faaauau suesuega a leoleo i nisi o aiga o loo masalomia o loo i ai fualaau faasaina.

O se tasi lenei o osofaiga tele a leoleo ua faia i lenei vaitau, i le tau sailiina lava o aupega ma fualaau faasaina o loo masalomia le taape solo i le atunuu.