E le’i umi lava ona galulue tagata faigaluega a le fale'oloa a le Manu’a Store i Nu'uuli e tau fa'amanino foliga ma gaoioiga uma sa maua i masini pu’eata a le fale'oloa, ae o latou mauaina loa tagata moni lava sa o latou talepeina le fale'oloa ma 'ave fa'agaoi le tele o meaaoga e aofia ai ma se tupe e silia ma le $900 sa i totonu o le masina tupe.

I ni ripoti na ta'ua ai e fa'apea, na fa'aaoga e le 'au talepe fale miti afu e ufi ai o la'ua foliga i le taimi na o latou fa'atinoina ai lenei osofa'iga, peita'i sa mafai lava e tagata faigaluega a le kamupani ona va'ai toto’a i gaoioiga uma sa faia ma faigofie ai loa ona iloa tonu i latou.

O le fa'ai'uga o le vaiaso na te'a nei o lo o masalomia na osofa'ia ai e le 'au gaoi le fale'oloa o Manu’a, e ala i lo la fa'aaogaina lea o se fa'amalama sa matala i le vaega fou o le fale lea ua toe soso’o nei, ma faigofie ai loa ona ulufale atu i totonu o le fale'oloa ma gaoi 'oloa sa i ai.

Na fa'amatala e le pule o le fale'oloa ia Manu’a Chen e fa'apea, e le'i umi se taimi na i ai le 'au gaoi i totonu o le fale'oloa ae o la toe tu'ua loa.

Fai mai le molimau a le ali'i pule, e foliga mai sa malamalama lelei lava le 'au ali'i ia i la gaoioiga o le a faia i totonu, e aofia ai lo la siakiina lea o masini tupe uma e tolu sa i totonu o le fale'oloa, peita'i e na o le tasi le masini tupe sa maua i ai le tupe e tusa ma le $962.53 ma la ave'eseina loa.

E 'ese mai i le tupe sa fa'apea fo'i ona la gaoia i ni isi o 'oloa e pei o taulima, uati ma USB speakers e 24 sa i luga o fata 'oloa.

E le'i maua mai se ripoti pe ua tu'uina atu lenei mata'upu i le ofisa o leoleo, pau le saunoaga a le susuga Manua, o lo o fa'aauau pea su'esu'ega a lana kamupani e uiga i lenei mata'upu, ma o se tulaga fa'anoanoa fo'i pe a va'ava'ai atu i le fa'atupula'ia o le solitulafono tau talepe fale ma le gaoi ua a'afia ai fanau.

E le o se taimi muamua lea ua mafai ai e masini pu’eata o fale'oloa ona maua gaoioiga uma a le 'au gaoi sa faia i totonu o fale'oloa.

O le osofa'iga lea na faia e ni ali'i se to'atolu i se fale'oloa i Tafuna i le tausaga na te'a nei, ina ua o latou fa'alala se fana i le fa'atau'oloa ma fao fa'amalosi se tupe ma ni 'oloa mai totonu o le fale'oloa na maua uma i masini pu'eata a le fale'oloa, ma faigofie ai loa i leoleo ona sa'ili le 'au gaoi.

E lua isi osofa'iga i ni fale'oloa se lua i Atu'u i le masina o Ianuari na te'a nei na mafai fo'i ona maua i masini pu'eata gaoioiga uma sa faia i totonu, ma faigofie ai fo'i ona maua e leoleo le 'au gaoi ma molia ai i le tulafono.