Na toe maua i le poloka a leoleo i le 9:00 i le po o le Aso Gafua ia se alii pagota na sola mai i le Fale Faamasino i Fagatogo i le aoauli o le Aso Gafua lava lea.  

I se faatalatalanoaga a le Samoa News ma le afioga i le Sui Komesina o Leoleo ia Leseiau Laumoli i le aso ananafi, sa ia faamaonia mai ai le toe maua e leoleo o Faafetai Siaulaiga, ma ua toe taofia nei i le toese i Tafuna.

Saunoa Leseiau, pe tusa o le itula e 9:00 i le po o le Aso Gafua na te’a nei, na toe maua ai Siaulaiga i le poloka a Leoleo o lo o faia i luma o le CBT i Nu’uuli, ao tietie atu i le taavale a le isi tamaloa na lifi atu ai ina ua oso atu i Faganeanea.

O le alii na sola o Faafetai Siaulaiga, o ia lea e to’afa i ai alii ua molia i le faalavelave lea na maliu ai Sio ‘Chico’ Faumui o Iliili, lea na maua lona tino maliu i Malaeimi i le aso 3 Iuni 2011.

O isi alii e toatolu na uluai molia e le malo i lenei faalavelave e aofia ai le tausoga o Siaulaiga o Raponi Siaulaiga, Neemia Poamo ma Migo Misa. Ua maea ona tali ioe i latou i le moliaga o le faatalama faaletulafono ua mafua ai ona oo le maliu ia Faumui, ma ua faamoemoe o le masina fou e lau ai a latou faasalaga.

Ae o le alii o Siaulaiga, na faatoa molia e le malo i le aso Gafua na te’a nei, ina ua maua ni isi faamatalaga e faatatau i lona aafia lea i le faalavelave lea na maliu ai Faumui, ma tulai ai loa i luma o le faamasinoga faaitumalo mo le taimi muamua.

Ina ua maea le iloiloga a Siaulaiga, sa poloaina loa e le faamasinoga le toe taofia o ia i le toese i Tafuna, sei vagana ua ia totogiina le $25,000 ua faatulaga ona faatoa mafai lea ona tatala o ia i tua.

O le maea ai o mataupu a i latou sa faia i luma o le faamasinoga, na sauni ai loa alii leoleo o le toese e toalua na o mai i le momoliina mai o pagota e toe foi atu i Tafuna, mo le toe momoliina atu o pagota e lei tatalaina i tua lea e aofia ai ma Siaulaiga, peitai ina ua faitau atu pagota, na iloa ai e toatasi le pagota ua leai, o ia lea o Faafetai Siaulaiga, o lea na logoina ai loa le Ofisa o Leoleo e tusa ai o le mea ua tupu.

Na taua e se molimau e faapea, o le pasi lea na latou o atu faatasi ai ma Siaulaiga i le afiafi o le aso Gafua na te’a nei, na taofi e se taavale a leoleo i Faganeanea.

Fai mai le molimau, (na te iloaina lelei lava Siaulaiga), e lei iloa e Siaulaiga lea o lo o la nonofo faatasi i le nofoa umi o le pasi o le taavale a leoleo lea o lo o mulimuli atu i tua, ae o le taimi lava na valaau atu ai le leoleo i le sipika faaleotele leo i le ave pasi e tuutuu teisi i luma lana pasi, na faatoa iloa ai e Siaulaiga o leoleo ia o lo o mulimuli atu ia te ia.

E lei toe faatali Siaulaiga, ae na tu loa i luga ma tamo’e agai i fafo o le pasi, ma ui atu ai i tafatafa o fale o aiga i le pito i uta o Faganeanea, ma tamo’e aga’i atu ai lava i luga o le mauga.

E pogisa ane lava le afiafi o le aso lea o lo o i ai pea leoleo i Faganeanea i le tau sailiina lea o le ua molia.

E tusa ai o faamaumauga a le malo e faatatau i le moliaga lea ua tuuaia ai Siualaiga o le faatamala faaletulafono ua mafua ai ona maliu se tagata, o lo o taua ai e ni molimau lo latou vaaia o Siaulaiga i le po lea na tupu ai le faalavelave, o tamo’e agai atu i le isi itu o le auala, ma ona lima e pisipisia uma i le toto.

Na faamatala e Poamo i leoleo lona vaaia o Faafetai Siaulaiga ma lona tausoga o Raponi Siaulaiga o la faaaogaina ma’a ma le fagupia e faaoo ai manu’a ia Faumui.

O le taeao nei lea ua faamoemoe e toe tulai ai Siaulaiga i luma o le faamasinoga faaitumalo, mo le faatulagaina lea o le aso e fai ai lana uluai iloiloga.