Ads by Google Ads by Google

MAUA FBI $70,000 TOTONU FALE O SE ALI'I SAMOA

E tusa ma le $70,000 se tino i tupe ma ni vaega o le pauta o'ona o le 'aisa e tusa ma le 7 pauna le mamafa na maua e sui o le FBI i totonu o le fale sa nofo ai le ali'i Samoa o Fa'ata'oto Vaieli Mauga i le a'ai i Waikiki.

O Mauga na maua fa'atasi ai ma se isi fo'i ali'i Samoa e igoa ia Tapusilia Suliasi Vaifale, i se osofa'iga fa'apitoa sa faia e FBI i le setete o Hawaii, ina ua masalomia lo la auai i le fa'atauina atu o le pauta o'ona fa'asaina o le methamphetamine.

Ua molia fa'atasi ali'i ia e to'alua ma se ulugali'i e igoa ia Mayday ma Colonel Pakele, i tu'uaiga o le umia fa'asolitulafono lea o le pauta o le 'aisa e silia i le 50 kalama lona mamafa fa'atasi ai ma isi fuala'au fa'asaina, ma le fa'amoemoe e tulei ma fa'atau atu i isi tagata.

E tusa ai ma fa'amaumauga a le feterale o lo o ta'ua ai e fa'apea, na faia e le FBI sa latou osofa'iga fa'apitoa, e ala i le fa'atulaga lea o se leoleo sa 'ofu savili na te fa'atauina mai ni 'aisa mai le 'aualii lenei, i le vaega e paka ai ta'avale a le fale'aiga o le McDonald i Salt Lake Boulevard i Honolulu i le aso 17 Fepuari 2012.

Sa i ai fa'atasi Mayday Pakele ma lana fesoasoani o Vaifale i le taimi na faia ai le fa'atauga fa'apitoa lea i le nofoaga ma le aso e pei ona ta'ua e le FBI.

Na ta'ua le aga'i atu o Pakele ma Vaifale i le vaega sa fuafua e feiloa'i ai ma le tagata fa'atau, ma la tu'uina atu ai se taga pepa i'ila o lo o i ai vaega o le pauta fa'asaina o le 'aisa i totonu.

E $4,200 le tupe na ta'ua sa totogi atu e le tagata ia Vaifale mo vaega o le pauta o'ona sa la'ua tu'uina atu ma Pakele ia te ia.

O le isi fa'atauga sa faia lea i le aso 28 Fepuari lea fo'i sa fa'asoa atu ai e Pakele ma Vaifale vaega o le pauta fa'asaina e tusa ma le 4 'aunese le mamafa i le nofoaga lava lea e tasi.

I fa'amaumauga a le feterale na ta'ua ai e fa'apea, o le taimi lava na tu'uina atu ai e i la'ua nei vaega o le pauta fa'asaina i le ali'i leoleo savili, na fa'afuasei ai loa ona osofa'ia ma taofia i la'ua e FBI fa'apea ai ma leoleo mai le Ofisa o leoleo i Honolulu.

Sa faia se su'ega i pauta sa fa'atauina atu e i la'ua ia ma fa'amaonia ai, o le 'aisa o'ona lea o le methamphetamine.

E tusa ai ma fa'amaumauga a le fa'amasinoga na ta'ua ai e fa'apea, a'o le'i tupu le osofa'iga lea ua loka ai Vaifale ma Pakele, ua uma ona fa'atulaga le tupe e maua mai i le fa'atauga lea o le a tu'uina atu i le ali'i o Mauga i lona fale i Waikiki.

Na aga'i atu FBI e fa'ataunu'u se poloa'iga a le fa'amasinoga e sa'ilia ai le fale o Mauga i Waikiki, ma latou maua i ai se tino i tupe tusa ma le $70,000 fa'atasi ai ma se vaega o le 'aisa e tusa ma le 7 pauna lona mamafa.

Na ta'ua e le sui so'o'upu a le FBI mai Honolulu ia Tom Simon lona fa'afetaia o le vaega a le FBI fa'atasi ai ma le Matagaluega o Leoleo Honolulu ona o le tulaga manuia sa i ai la latou sa'iliga ma le osofa'iga e pei ona fa'ataunu'uina, lea ua mafua ai ona 'ave'ese mai pauta e 7 o le 'aisa mai luga o le 'auala, ae to'afa ua taofia nei e leoleo i le falepuipui.

fa'aliliu Ausage Fausia