Ua maua i faasalalauga a le BBC faamaumauga a le faamasinoga e faapea, e tele se vaega tupe na totogi ai e le peresetene tuai o le FIFA o Joao Havelange e le kamupani ua gau o le ISL (International Sports & Leisure) mo le umi e 24 tausaga.

O le 2001 na gau ai le ISL peitai fai mai faamaumauga a le faamasinoga, e $1.5 miliona na totogi ai Joao, ae $12.74 miliona mo Ricardo Teixeira o se tasi o sui o le komiti faafoe a le FIMA, o le toalua lea o le afafine o Joao.

O le ISL e matele lava ina fa’akonekarate e le FIFA i le tele o ana oloa e fa’aaoga mo ausoka i toniga ta’alo mo ‘au eseese, peita’i, ua iloga atu nei e ala i su’esu’ega ma fa’amaumauga ua mautinoa ai, ona o lea e latou te togitupea le ali’i Peresetene ma le to’alua o lona afafine.

E ui la ina o lo’o i le falema’i i le taimi nei Joao mo togafitiga aua ua silia ma le 90 tausaga o lona soifua, ae ua fa’ailoa mai ua tula’i ese Teixeira mai lona tofiga sa i ai i le Komiti Fa’afoe ma ua le toe avea fo’i o ia ma Peresetene o le Asosi Soka a lona malo o Brazil, ma ua ia fa’ailoa mai le mafuaga - ona o tulaga tau lona soifua maloloina, ma isi fa’aletonu tau lona aiga.

Ua fa’ailoa mai o le ISL na gau i le tausaga e 2001 ma ua fa’apena fo’i ona, le mafai ai ona fa’auia mai le tele o konekarate sa fa’atulaga e taua’aoina mai e i latou mo le FIFA. Na latou taua’aoina lipoti lava nei i lea lava tausaga, ma ua taua’aoina nei fa’amaumauga uma i le tele o kamupani fa’asalalau, peita’i, ua latou fa’atulagaina le totogia i le fa’amasinoga o latou sala ina ia aofia ai ma le taofia o fa’asalalauga fa’alaua’itele o nei mea ua fa’ato’a tatala mai mo fa’asalalauga i le taimi nei.

Pau lava le ituaiga tala sa mafai ona latou fa’alauiloa i le lautele, ua lisia ai le to’atolu o sui maualuluga o le FIFA ua fa’amaonia ua togitupea e le ISL mai Suitiselani i le vaitausaga 1990 i ala o oloa gaosia, peita’i, i totonu o Suitiselani i lea vaitaimi, e le’i lisia ai lea ituaiga faiga o se solitulafono.

Na i ai se fa’amasioga tele sa fa’aulu e le BBC Panorama ina ia mafai ona fa’asalalauina nei fa’amaumauga uma o solitulafono sa faia e i latou e mautofi i le FIFA i lena vaitausaga, lea ua fa’ato’a mafai ona fa’amatu’u mai i lenei tausaga.

Mai fa’amaumauga ina ua o’o mai ia Oketopa 2011, ua fa’ailoa mai ai le peimeni e 5.5miliona francs ua toe totogia mai e Joao ina ua fa’amae’a ai le su’esu’ega ma ia taofia ai fo’i le fa’alauiloa ai o latou igoa, i latou ia e a’afia ai. Na fa’aalia mai e Sepp Blatter ia Oketopa 2011 lava, sa ia mana’o lava e fa’ailoa mai lea tulaga i le va o le ISL ma i latou sa latou togitupea, peita’i, sa le manana’o fo’i le FIFA e fa’alauiloa mai lea tulaga i lena lava vaitau. Peita’i, i le taimi nei, ua fa’ailoa mai e le FIFA ua fiafia tele i latou ua aumaia i luga lea mea fa’aletonu sa faia mai na tausaga ua mavae.

saunia: Leua Aiono Frost