LOLO:  UA AMATA ONA OLA LE TAUPULEA FANAU I TAIMI NEI

O le fonotaga a ta’ita’i o le malo, sui o Ekalesia faapea ai ali’i mautofi sa faia ananafi e tau saili ai se fofo o le faafitauli i misa e pei ona aafia ai fanau aoga i le vaiaso na te’a nei, na faailoa ai e le Sui Komesina o Leoleo i totonu o lea fonotaga e faapea, ua maua e leoleo i latou sa tauaia pasi aoga i Leone, Fagaitua ma Aua, ma o lo o faaauau pea i ai suesuega a leoleo e faatatau i lenei mataupu.

Na taua e le kovana sili ia Lolo Matalasi Moliga i lana saunoaga i lea fonotaga e faapea, afai e malolosi pulega a alii ma faipule i so o se afioaga i le atunuu, e i ai lona talitonuga e le toe i ai se tupulaga po o se fanau aoga e soona toe ulavale i totonu o le nuu.

Saunoa Lolo e faapea, o le ogatotonu lava o nei mau faafitauli, ua le galulue faatasi matua ma le malo i le tauaveina o le tiute o le aoaoina lea o fanau, ona ua tusitusi lima matua fai mai e le o faia le tiute o le malo ma faiaoga o le aoao o fanau, ae ua tusitusi lima foi le malo fai mai ua faatamala matua i le aoaoina o fanau.

“Ou te talitonu, o le fofo o le faafitauli lenei o lo o ia te i tatou uma matua ma taitai o le atunuu, ia tatou tutu faatasi e aoao fanau ina ia latou iloa le taua o lo latou lumana’i, aua o i latou o lo o faalagolago i ai le manuia o aiga ma le malo,” o le saunoaga lea a le alii kovana.

Na unaia e Lolo matua uma ina ia faamalosi la latou pito laau i le aoaoina o fanau i totonu o aiga, sa ia unaia foi alii mautofi faapea ai taitai faaleaganuu ina ia faamalosia tulafono i totonu o nuu ina ia puipuia ai fanau mai le ola e leai se tapasa i totonu o nuu, ae faamalosia foi faiaoga ma le malo ina ia faatino a latou matafaioi ina ia mautinoa e fesoasoani tupulaga talavou a le atunuu.

Na faatepa e Lolo tulaga pau maualalo o lo o i ai aoaoga a fanau aoga i totonu o le kolisi i le taimi nei, e mafua mai o le faatamala o le malo ma matua e faatino o latou tiute i le aoaoina o fanau.

“Ua amata ona ola le tau pulea fanau i le taimi nei, o vevesi foi ma faafitauli ua alia’e mai i le taimi nei, e le o ni mea fou lea i le silasila a taitai, ae afai e lelei ona aoaoina fanau i totonu o aiga, lotu ma le nuu, e lelei foi o latou mafaufau pe a oo atu i totonu o fale aoga,” o le isi lea saunoaga a Lolo.

Na saunoa le Sui Komesina ia Leseiau Laumoli e faapea, o le faalavelave lea na tauai ai e ni tagata le pasi aoga i Leone i le Aso Gafua na te’a nei, e to’alua alii talavou ua taofia nei e leoleo i le toese i Tafuna ona o lea faalavelave.

Ae o le faalavelave lea na tauai ai le pasi aoga i le po o le Aso Lua na te’a nei i Fagaitua ma Aua, ua taofia e leoleo ni isi sa aafia i lea mataupu ma le faamoemoe o le a faaopoopo le aofa’i o i latou e taofia i lea faalavelave.

Na taua e Leseiau e faapea, o le tulaga lelei i le mataupu na tulai mai i Leone, e na o le tasi lava le nofoaga na togi mai ai ma’a ma faaleagaina ai le pasi aoga, o le itu fo’i lena na faa faigofie ai ona maua i laua o lo o aafia ai, ae o le faalavelave i Fagaitua ma Aua, e fai lava si faigata o suesuega o lo o faia ona e tele vaega eseese o le auala na tauai atu ai maa ma faaleagaina ai le pasi aoga.

O lo o faaauau pea ona fesiligia e leoleo i latou ua taofia ma le faamoemoe, o le a mafai ai ona maua tonu lava le tagata po o tagata na togiina le ma’a lea na lavea ai le pasi aoga, ina ia aua ai nei molia fua e le malo i latou e le i aafia i lenei faalavelave.

Ina ua saunoa le alii faifeau ia Rev. Siaosi Mageo e fai ma sui o le Aufaigaluega a le Atua i le fonotaga ananafi, na faamamafa ai e le alii faifeau le faatamala o matua e faatino latou tiute i le aoaoina o fanau, atoa ai ma le faatamala o Faifeau i le le ta’u sa’oina o le feau i tagata ekalesia i ituaiga amioga e tatau ona ola ai.

“E talitonu lo’u taofi ua mafua le tele o nei faafitauli ua tele le saolotoga ua maua e fanau ina ua faatamala matua e tautala ma a’oa’i fanau, ona ola ai lava lea faapenei o tama ma teine i ituaiga olaga e le fia silasila i ai le Atua, ma o le mea moni, o le olaga o lo o ola ai fanau i totonu i aiga o lo o vaaia lo latou ola ai i totonu o aoga ma le atunuu lautele,” o le saunoaga lea a le alii faifeau.

Saunoa Rev. Mageo e faapea, o le tele o faafitauli ua faitau i ai le toatele o tagata i luga o nusipepa i fanau ma tagata e molia ona o solitulafono eseese, e mafua mai ona o le faatamala o matua i le faatinoina o latou tiute.

“O isi matua ua fiafia lava e alu i le Bingo ae tia’i lava fanau teine i le fale, o le mea la ua tupu, e alu le tina e Bingo ae alu fo’i lana tama teine i lana ia fo’i Bingo, ona fo’i mai ai lea o le teineititi ma lana tama’i Bingo,” o le saunoaga lea a Rev. Mageo na tali e ai le aofia.

Na faamalulu le tofa a Paopaoailua J. Fiaui i le kovana faapea ai le mamalu o le fonotaga, ona o le faalavelave e pei ona taua ai tupulaga a lona nuu i Aua.

Na taua e Paopaoailua e faapea, ua maea ona faia le faaiuga a alii ma faipule a Aua i alii na aafia i lenei faalavelave, ma ua maea foi ona totogi e aiga sala i le nuu toe faatoese i le nuu e tusa ai o gaioiga a fanau.