Ads by Google Ads by Google

Maua alii na talepeina faletupe Hawaii ma le Pizza Hut

E to’alua ni alii pagota o lo o tuli ni a la faasalaga faafalepuipui, ua masalomia i le faalavelave lea na osofa’ia ai le lala o le faletupe a Hawaii i Tafuna ma le faleaiga o le Pizza Hut, i le amataga o le masina nei, ina ua maea se osofaiga sa faatautaia e le Vaega o Leoleo Suesue (CID) a le Matagaluega o Leoleo i le Aso Faraile na te’a nei, i le toese i Tafuna.

E silia i le toa 20 alii ma tamaitai leoleo sa auai i le osofaiga, i lalo o le ta’ita’iga a le ta’ita’i o le CID, susuga Cmdr. Lavata’i Taase Sagapolutele.

Na faamaonia mai e le Sui Komesina o Leoleo ia Leseiau Laumoli i le Samoa News, o i laua e to’alua ua masalomia, o ni alii o loo tuli ni a laua faasalaga i le toese i Tafuna i le taimi nei, ma o loo faaauau pea ona taofia ai i laua i le toese e faatali ai suesuega o loo faagasolo a leoleo.

O le Aso Faraile na te’a nei na osofaia ai e le CID, i le mae’a ai ona maua e leoleo o ni faamatalaga e faatatau i pagota sa osofaia le faletupe ma le faleaiga.

O le faaiuga o lea osofaiga e pei ona faamaonia mai e Laumoli, e le gata na maua ai e leoleo le tele o mea molimau e lagolagoina ai tuuaiga faasaga i alii nei, ae ua faapea foi ona masalomia ai ma i laua i lenei faalavelave.

“O le taimi nei e le o mafai ona faalauiloa igoa o alii pagota ua masalomia, pau le itu e mafai ona faamaonia atu i le taimi nei, e to’alua pagota ua masalomia i le talepeina o le faletupe ma le faleaiga, ma o loo taofia pea i le toese i laua i le taimi nei, sa maua foi le tele o mau faamaonia e ono lagolagoina ai tuuaiga faasaga ia i laua nei,” o le saunoaga lea a Laumoli i le Samoa News.

O nisi o mea molimau na mafai ona aveese mai e leoleo mai le potu sa taofia ai nei ali’i e toalua, e aofia ai ni fagupia vailima se lima, telefoni feavea’i, televise,ma ni mea faigaluegama sa le tatau ona i ai i totonu o le potu o lo o taofia ai pagota.

O le vaveao o le Aso Faraile, Iulai 6, 2012, o lo o masalomia na osofaia ai e i laua ua taofia le faletupe a Hawaii ma le faleaiga a le Pizza Hut.

O faamalama i le autafa o le faletupe a Hawaii na tata’e ae tulioso ai i totonu le au gaoi, ae o le Pizza Hut sa tata’e se tasi o faitoto’a i le autafa ma mafai ai ona ulufale le au gaoi i totonu.

E faataunuu le osofaiga a leoleo i le toese i Tafuna, ae o le taimi foi lea o lo o faagasolo ai le lauina o faasalaga a ni alii pagota se to’alua, ona o le faalavelave lea na sosola ai i tua mai le toese i le masina o Ianuari 2010, ma o latou fasi faamo’amo’aina ai le leoleopo o le faletupe o le ANZ Bank i Tafuna ma manu’a tigaina ai.

E toafa alii pagota na aofia i le solaaga lea, ma ua maea nei ona lau faasalaga a David Maea, lea ua faaopoopo le isi 7 tausaga i lona faasalaga o loo tuliina nei, ma Gasona Mafiti lea foi ua faaopoopo le isi 5 tausaga i lana faasalaga o loo tuli, ae o isi alii e toalua o Sefo Lemalu ma Pati Lepou e le’i lauina a laua faasalaga.