Ads by Google Ads by Google

MAUA ‘AI’AIGA O PAGOTA NA ‘FACEBOOK’

O alii pagota uma lava ia na maua o fai a latou tifiga o le ta pu’e o latou ata mai totonu o le falepuipui ma tuu i luga o fesootaiga tau initaneti e taua o le “facebook”, ua faamaonia mai e le Sui Komesina o Leoleo le tuu atu i ai o nai fautuaga ma aoaoga laiti e tusa ai o lo latou faia o nei uiga ao tuli ai a latou faasalaga.

O le mataupu e uiga i pagota ia na ta pu’e a latou ata ma faasalalau i luga o le facebook, na mapuna a’e ina ua faasalalau i se ripoti a se tasi o vaega faasalalau i le atunuu ma mafua ai loa ona taunuu atu i luma o le maota maualuga i le vaiaso na tea nei, ma faatulaga ai loa se iloiloga a le Senate e fesiligia ai le Komesina o Leoleo i le mafuaaga o lenei faafitauli.

O le vaiaso nei na fuafua e faataunuu ai lea iloiloga,  peitai o le pisi o galuega a le maota ua toe faatulaga ai loa i le vaiaso fou.

Ina ua fesiligia e le Samoa News le Sui Komesina i le vaiaso na tea nei e uiga i lenei mataupu, sa ia taua ai e faapea, o alii pagota uma lava ia sa aafia i faiga e pei ona taua i ripoti, ua tuuina atu nei i latou i lalo o le vaavaaiga faapitoa a le pulega o le toese i Tafuna, ina ia mautinoa e le toe tulai mai se mea faapenei i le lumanai.

E oo foi i meatotino uma a alii pagota uma nei, ua aveese uma e pei ona faamaonia mai e le sui komesina, ona o le naunau lava ia malu puipuia le  saogalemu o tagata uma i totonu o le toese.

Na faamanino mai e le tofa ia Leseiau Laumoli e faapea, o le  mataupu e pei ona taua i pagota sa tuu o latou ata i luga o le facebook, e le o se faalavelave na faatoa tulai mai i se taimi lata mai, ae na amata mai lava i le tausaga na tea nei.

“E le o mama i le vaavaai a  le Matagaluega le mataupu e pei ona tulai mai, o le mafuaaga foi lena ua matua mautinoa ai le saogalemu o soo se gaioiga e faia i totonu o le toese, aemaise ai o le mataupu oe na faapefea ona oo atu laptop i totonu o le toese.

Sa ia taua, e le o se taimi muamua lenei  ua alia’e mai ai ni faafitauli i totonu o le toese i Tafuna, e ui o loo silafia lelei e le atunuu ma le matagaluega, e le o malu puipuia le nofoaga o loo i ai le toese i le taimi nei, pe afai e silasila i le tulaga o lona atu falega e aofia ai le pa o loo siomia ai le lotoa, faapea ai isi ona vaega.

Na taua e Laumoli ina ua fesiligia foi i le mafuaaga na sao ai i totonu fualaau faasaina lea sa maua i totonu o potu o loo loka ai pagota i le tausaga na tea nei, e i ai le avanoa e mafai ai ona faaauala atu mea nei i luga o le pa lea o loo siomia ai le toese, e ui e le o se tulaga e faamaonia lea, peitai o mafaufauga ia e mafai ona tutupu pe afai o loo malu puipuia le vaega a leoleo i luma o le faitotoa’a tele lea e ulufale atu ai tagata uma i totonu o le toese, i taimi o asiasiga atoa ai ma isi lava taimi e tatala ai le  avanoa i le atunuu.

Fai mai Laumoli, e toatasi le isi alii pagota sa ia tautino o ia e ana ia le laptop lea sa faaaoga e tuu ai ata i luga o le facebook, ma mafua ai loa ona faia faamatalaga a isi pagota e faatatau i ata sa pueina i totonu o le toese.