Ua tu’u mai le avanoa matagofie i so’o se tagata Samoa e fia iloa ona tautala i le gagana a Korea, ia o’o ane i le Ofisa o Pisinisi Laiti i le Kolisi Tu’ufa’atasi ma Lesitala lou suafa, e le totogia, ma fa’amau sou avanoa e a’oa’oina ai oe, e le totogia fo’i, e le faia’oga mo lea gagana o Mr  Lee, Hyun-Hwi.

Ua fa’ailoa mai, ua toe pau ai lenei o le vasega e fa’atautaia mo le gagana Korea, e le toe faia i le tausaga a’oga o lumana’i, ae ua atoa fo’i le 8 tausaga o faia mai lenei vasega i ona afa tausaga ta’itasi.

I se tala mai le ali’i faia’oga, ua ia fa’ailoa mai ai, “Ua silia ma le 300 i latou ua mae’a a’oa’oina i lenei gagana, e aoga tele lou malamalama i gagana Korea, aua o lo’o i ai pea le so’otaga i le va o Korea ma Amerika Samoa, o lo’o tele fo’i fefa’ataua’iga o lo’o faia i le va o malo e lua, e aoga ai ona fa’aau’upega oe i lenei gagana.”

Ona ua limiti mai nofoa avanoa mo lenei vasega, ua fa’atulaga fo’i le aso 11 o Setama e fa’amuta ai le avanoa e lesitala ai lou suafa mo sou avanoa. O e uma sa auai i vasega muamua, ua fa’apea fo’i ona si’itia le lesona mo i latou i lenei vasega, ae ua le tu’ua ai le a’oa’oina fo’i ma e fa’ato’a amata ona tau a’oa’o i lea gagana.

O le tautua a lenei ali’i Faia’oga o Mr. Lee, ua fai si loa i le tatou atunu’u, ma ua iloga fo’i ana galuega i le tatou malo e ala i le fa’atula’ia o televise i le Malae Va’alele ma toe tu’u i ai ma le Cable Televise. O televise fo’i i le Maota Gasegase ma o latou Cable Televise e maimoa i ai le mamalu lautele a’o tatalia talavai. Lea fo’i ua faliu o ia e fa’atino lea sao matagofie i le a’oa’oina o lana gagana mo i tatou, ina ia tatou le pogisa, ae ia tatou malamalama i a latou talanoa mai, ina ia tatou ola feso’ota’i ma i latou a’o tatou o ola fa’atasi i Amerika Samoa, pe o latou laufanua fo’i i Korea.

Ona o ia o le faipisinisi, ae o lana taleni na tu’ua ai lona malo ae malaga mai i Amerika Samoa o le tusitala ma pu’eata, ina ua tatou malilie e fa’aaoga va’a i’a Korea e o tatou fale’ia tetele e lua i le vaitausaga 1950-60, o lea ua naunau ai o ia, ina ia le motusia lenei malamalama ae ia fa’apupula atili. Ua ia manatu ina ia fa’amaimoa i tatou i ata Korea, lea ua fa’amama’i i ai le vasega o tina o Samoa, ma fanau nofo fale. O se mea taua le fa’aali mai o le ata, ae ua e malamalama fo’i i a latou tala ua fa’agasolo mai mo lau maimoaga.

Peita’i, ua ia fa’ailoa mai, ua motusia mo sina vaitau polokalama sa tatou masani ai i le televise, ona ua si’itia e le malo o Korea le ituaiga fa’asalalauga fa’asatelite 3D lea ua faia nei, ae o’o mai i le tatou tautua fa’atelevise, e le’i si’itia i lea ituaiga, ona o lo’o tatou fa’aaoga se faiga tuai.

O lea ua tatalia nei le pusa o le televise 3D ua mae’a okaina e Mr Lee, Hyun Hwi i ana lava tupe, ina ia mafai ona feso’ota’i ai tatou fa’asalalauga ma Korea, ona fa’aauau atu ai lea i le vaiaso a sau, pe a tusa ai ma le meli, e toe amatalia ai fa’asalalauga o lana Alaata 51, ae le tau totogia fo’i sau Cable Televise mo lea alaata.

E tu’u mai pea se fesili, “Aisea e naunau ai lea faipisinisi e fa’apopoto i tatou i lana gagana, ma ia tatou ola feso’ota’i ma lona malo?” O lana tali, “E sili le malamalama nai lo le pogisa, ae maise lava i ala o feso’ota’iga, ae o sana fa’afetai fo’i lea ia i latou uma lava, fa’atasi ai ma le malo i lo tatou talisapaia pea o lana pisinisi e fa’atautaia ma tautuaina ai i tatou i Amerika Samoa nei.”