Ads by Google Ads by Google

MATAINA AU TAITOA 7 A LE MANU SAMOA I DUBAI

E ui i le faiaina ai o le au taitoa 7 a le Manu Samoa ia Enelagi i taaloga o pool games i le po anapo, i le vae lona lua o le taamilosaga taitoa 7 a le IRB i Dubai i le faaiuga o le vaiaso nei, peitai na mataina le  taumafai a le au i lalo o le taitaiga a le susuga Afa Aiono, ma mafai ai loa ona sao atu i au e 8 pito i luga.

O le uluai taaloga a le Manu Samoa ma Portugal na vaaia ai le tau faaletonu o le tatou au, peitai i le faaiuga na manumalo ai le Manu Samoa i ai e 24-19 a Portugal, sosoo ai loa ma le taaloga ma Enelagi lea na faiaina ai i ai e 17-19 a Enelagi, ae manumalo ai i le taaloga faaiu ma Aferika i Saute i ai e 10-5.

O ni isi o tagata e fiafia i le tapuaiga o le Manu Samoa e lei momoe i le po atoa ona o le tapuaiga o le au, ma e i ai le manatu e faapena foi i le po anapo ao alo atu ai mo le sailia o siamupini o lenei taamilosaga.

O se tasi o fetu pupula o lo o i ai i le au a Samoa, o le aliai o Lio Lolo lea sa ia mauaina sikoa e 3 i le taaloga ma Portugal.

Na taua e le faiaoga a le au a le Manu Samoa ia Tauasa Faamaoni Lalomilo ina ua fesiligia e le au faasalalau, o nai faaiuga sese ma sasi laiti na mafua ai ona tau faaletonu le taumafai a le au, peitai o ia faaletonu o le a mafai ona toe talatalanoa i ai le au ao lumanai ai le aso faaiu o le taamilosaga i le aso ananafi.

Sa ia taua e faapea, o se tasi o suiga tele ua vaaia i lenei taamilosaga, o le tau fai lelei uma lea o tapenapenaga a au taitasi, e iloa lea i le maualalo o ai e malo ai le isi au i le isi au, pe a faatusatusa i taamilosaga ua mavae, lea e mafai lava ona oo atu i le tai 40 pe 50 foi ai e mafai ona maua e ni isi o au malolosi i au tauatia’e.

O le maea ai o le taamilosaga i Dubai i le faaiuga o le vaiaso nei,  ona sosoo ai loa lea ma le taamilosaga i Georgia i le faaiuga o le vaiaso fou, ma malolo ai loa au mo le taamilosaga i Niu Sila i le masina o Fepuari o le tausaga fou.

O Samoa o lo o avea ma siamupini i le taamilosaga i Las Vegas i le tausaga na tea nei, ina ua faiaina ai Niu Sila i se taaloga finau ma le faigata, ui o lea, ua valoia e le alii faiaoga o le au a le atunuu lona taumafai malosi e ausia le tulaga  maualuga sa oo i ai le Manu Samoa i tausaga ua mavae.

MANU SAMOA 15

O le tausaga fou lea ua faalauiloa mai e se tasi o kalapu lakapi i totonu o Aferika i Saute, le Lions, ua fuafua ai sana malaga taamilosaga i le pasefika ma le lalolagi, mo le faataunuuina o ana taaloga ma le au a Russia, Samoa, Farani ma Amerika.

O le aso 19 Ianuari 2013 ua faamoemoe e taalo ai le Lion ma Russia, sosoo ai ma le la taaloga ma Namibia i le aso 23 Fepuari, ae faaiu i le la taaloga ma Samoa i le aso 1 Iuni 2013. Na aveese mai le kalapu a le Lion ma le taamilosaga lakapi a Iuni i totonu o Aferika i Saute, ina ua pito lava i lalo o le lisi o au sa tauva lona tulaga sa i ai.

I se pepa o faamatalaga na tuuina mai i le Iuni Lakapi a Samoa (SRU), ua taua ai le fuafua o se fonotaga a le Iuni lakapi e talanoaina ai le malaga taamilosaga mai a le au a le Lions i le tausaga fou.

Ae mo le taimi nei i le faatulagaina o au a le IRB mo le Ipu o le Lalolagi i Enelagi i le 2015, ua faamoemoe ai o le aso Gafua o le vaiaso fou o le a faalauiloa aloaia ai loa pool mo lea taamilosaga, pe a maea taaloga faaiu lea ua alo atu i ai ni isi o au i le faaiuga o le vaiaso nei.

O Wales o le a taaalo ma Ausetalia ao Enelagi o le a taaalo ma le All Blacks a Niu Sila. O le taimi nei o lo o tumau pea Samoa i le tulaga 8 i le faasologa o au a le IRB.

O le i ai o Samoa i le tulaga 8, ua atagia mai ai le avea o ia ma uluai au mai le Pasefika ua ausia lea tulaga.

O le vaiaso na tea nei na toe taliu atu ai i Samoa le au a le Manu Samoa mai lana malaga taamilo i Europa, ae o ni isi o tama o lo o taalo kalapu i fafo ua toe foi atu mo le faaauauina o a latou konekarate.

I ni ripoti mai Samoa ua taua ai le faaauau pea lea e le malo o lana folafolaga sa faia, i le maua lea e le au ma le pulega o ponesi tupe mai le latou malaga taamilo sa malaga atu ai i Europa.

O lea ponesi tupe o lo o faaopoopo i ai ma le ponesi e $50,000 na foai atu e le kamupani telefoni a le digicel lea o lo o avea ma lagolago malosi mo le Manu Samoa.