Ads by Google Ads by Google

Matagofie faafiafiaga a Ausiva ma Aufaiese mo le faamanatuina o le Fu’a

LOLO:  AMERIKA SAMOA O LOU ASO FIAFIA LENEI

 

I le tatala aloaia ai o polokalama o le fu’a a Amerika Samoa i lenei tausaga i faafiafiaga mai Ausiva ma Aufaipese eseese i le atunuu, na tulei saunoa ai le afioga i le Kovana Sili ia Lolo Matalasi Moliga e faapea, o le aso lenei, o le aso fiafia mo Amerika Samoa uma lava o lo o aumau i le atunuu atoa ai ma soo se atuunuu o le lalolagi.

 

Na faatumulia le malae o le Su’igaula a le Atuvasa i Utulei i taitai o le malo, ausiva ma aufaipese, faapea ai le atunuu lautele i matua ma fanau na lolofi atu i le fia molimauina o faafiafiaga eseese sa tatalaina i le itula e 6:00 i le afiafi o le aso Gafua na te’a nei.

 

O le susuga i le Epikopo ia Su’e Brown mai le Uarota Muamua a Aua o le Ekalesia a Iesu Keriso o le Au Paia e Gata ai na taitaia le polokalama i le tatalo, ina ua maea le viiga o le Atua na lagiina e lana aufaipese.

 

O le saunoaga autu o le po na saunoa i ai le alii kovana sili, ina ua mae’a ona faalauiloa e le fofoga o le po, le tofa a Fagafaga Daniel Langkilde.

 

Saunoa Lolo e faapea, o le agaga o aso faamanatu faapenei i tausaga taitasi, ia mafai ai ona o mai faatasi le atunuu ma le malo latou te molimauina le taua o le aso na afua mai e tuaa ua lagomau mai tiasa, lea na latou osia ai se feagaiga mautu ma le malo o Amerika, ma ua manatu ai le malo e faaaoga le upu o le ‘Galulue Faatasi’ e avea ma manulauti o le faamoemoe o Amerika Samoa i lenei tausaga.

 

“Afai tatou te toe tepa i tua i le asaina mai o le faigamalo e nai matua, e leai se mea na taitaia ai i latou, ua na o le musumusuga a le Atua ma le agaga galulue faatasi o taitai, lea ua mafai ai ona tatou o mai faatasi i le afiafi lenei (afiafi o le aso Gafua na te’a nei) e sii le viiga ma le faafetai i le Atua ina ua mafai ona tatou aulia mai le 113 tausaga o le aso fiafia o Amerika Samoa i lenei tausaga,” o le saunoaga lea a Lolo.

 

O le manulauti na galulue mai ai matua i tausaga ua mavae e pei o le “tasi le loto, tasi le fatu ma ia maopoopo mea uma,” o le manulauti lea ua finagalo le alii kovana e autu i ai gaioiga uma a le malo ma le atunuu atoa.

 

“Mo tagatanuu uma o Amerika Samoa o lo o faafofoga mai i totonu o le atunuu, o lou aso fiafia lenei, mo tagatanuu uma o Amerika Samoa o lo o soifua i fafo atu o Amerika Samoa ma soo se itu o le lalolagi, o lou aso fiafia lenei, ma alo ma fanau uma o lo o tautua i le puipuiina o le saogalemu o le atunuu ma le lalolagi, matou te manatuaina outou i a matou tatalo, o lo tatou aso fiafia fai faatasi lenei,” o le saunoaga lea a Lolo na faalogoina ai le taufai pati o tagata sa i ai i le malae i lea taimi, ma faaiu ai loa lana saunoaga i lona tatala aloaiaina o faafiafiaga mo le fu’a a le atunuu i lenei tausaga.

 

E 8 ausiva na faafiafia i le ulua’i po o le polokalame, atoa ai ma se tasi o faafiafiaga na matua mataina i le silasila a le atunuu, lea na tapenaina e alii Tauaso toatolu mai Samoa ua faaigoaina o le ‘LU-SI-T, poo le amataina foi lea o latou igoa e pei o Lumana’i, Siona ma Talamotu..

 

E fa a latou pese na usuina, ma o ni pese na matua le nofonofo lelei ai le toatele i le malie o upu toe manaia le fati. O se tasi o a latou pese na lagiina i lea po, o le vii a Lolo ma Lemanu ina ua manumalo i le faiga palota tele a le atunuu i le tausaga na te’a nei, lea fo’i o lo o latou usuina i totonu o le latou CD ua faatauina nei i Samoa ma Amerika Samoa nei.

 

I faafiafiaga a ausiva eseese, sa maitauina le matagofie o a latou faafiafiaga, e le gata i pese ae o siva ma latou taga.

 

O se tasi o ausiva sa mataina o le aufaafiafia a le Star Kist Samoa, Inc lea na taualuga i ai faafiafiaga o le po.

 

E pei ona maitauina i le polokalame, o le itula e 4:00 i le afiafi e amata ai faafiafiaga mai tagata pepese taitoatasi, ae o le itula e 6:00 e amata aloaia ai le polokalame. E 8 isi ausiva na faafiafia i le po mulimuli anapo.