Ads by Google Ads by Google

Mataalia Ofisa Soifua Maloloina tulimataia pisinisi faatau taumafa

Ua faalauiloa e le Faatonusili o le Matagaluega o le Soifua Maloloina e faapea, ua o latou uia ta’iala ma tulafono uma o lo o moomia ina ia mautinoa o lo o tulaga lelei ma saogalemu le soifua maloloina o le atunuu, mai taumafa o lo o faatau i faleoloa ma soo se pisinisi i le atunuu.

 

O se vaega lea o le tali a le afioga i le alii faatonusili ia Motusa Tuileama Toatolu Nua, ina ua fesiligia e tusa ai o le mataupu e pei ona tuuina atu ai e taitai komiti a le senate ma le maota o sui ni tusi ia te ia i le amataga o le masina nei.

 

O luma o le senate na fesiligia ai e le alii senatoa ia Faagata Mano le saogalemu o le taumafa o le ‘sushi’ o lo o faatau e ni isi o faleoloa Asia i le atunuu, ona o le faalavelave na onana ai ni fanau se to’afitu ma taofia ai i le falema’i i le amataga o le masina nei.

 

Ae i luma o le maota o sui, na fesiligia ai e le alii faipule ia Vaamua Henry Sesepasara le saogalemu o gaioiga o lo o faia e ni isi o faleoloa Asia, i le toe utu pepa o taumafa e pei o vaemoa ma alaisa, ona o ni isi o taimi e molimau ai e ni isi o le atunuu le faaaoga o samala e talepe ai pusa vaemoa, ae o fatu alaisa afai e toulu i luga o le sima e toe salusalu ma toe tuu i totonu o le tama’i taga pepa iila.

 

Na taua e Motusa e faapea, o lo o faaauau pea asiasiga a le Vaega o le Soifua Maloloina o le gafa ma le mataituina o le saogalemu i faleoloa ma pisinisi i le atunuu, ina ia mautinoa o lo o faatinoina galuega uma e tusa ai o ala o le tulafono.

 

E le gata o lo o vaavaaia vaega o lo o kukaina ai taumafa ma faatau atu, ae o lo o asiasia foi oloa o lo o faatauina atu i le atunuu ina ia mautinoa e le o faatauina ni oloa ua maea le aso e aoga ai.

 

E le’i manuia taumafaiga mo le tau sailia o se ripoti e faatatau i tamaiti na taofia i le falema’i ae na taua e se foma’i e le faataga ona talanoa i mataupu faapenei mai le Soifua Maloloina e faapea, e ova ma le toa 7 tamaiti na taofia atu i le mataupu lenei.

 

Sa fesiligia ni isi o fanau nei ma iloa ai, e eseese uma taimi na o latou faatauina ai le ‘sushi’ lea na ‘onana ai, ma e i ai foi le talitonuga o ‘sushi’ nei e eseese taimi na kukaina ai.

 

I se pepa o faamatalaga na tuuina mai i le Ofisa o le Soifua Maloloina, o lo o taua ai le faamalosia pea o le tulafono e aveese ai taumafa sa kukaina i le taeao mai luga o fata o faleoloa pe a tuana’i le aoauli, ona o le talitonuga, e le tatau ona silia ma le 4 itula e faatau atu ai taumafa vela nei i le atunuu.

 

Ua maea ona asia e le Vaega a le Soifua Maloloina faleoloa na aafia i lenei mataupu ma ua uma foi ona fautuaina i ni isi o vaega o lo o moomia le toe faaleleia, ma o lo o faaauau pea a latou suesuega i ni isi o vaega e moomia le faaleleia.

 

Ao le’i tapunia le ulua’i tauaofiaga a le Fono Faitulafono i le lua vaiaso talu ai, na tuuina atu ai e taitai komiti o le Soifua Maloloina a le senate ma le maota o sui ni a la tusi i le Faatonusili o le Soifua Maloloina, e fesiligia ai sa latou gaioiga ua faia e foia ai faafitauli e pei ona faaalia e ni isi o sui o le fono.

 

Na taua e le afioga i le alii Senatoa ia Mauga Tasi Asuega i lana tusi e faapea, e fia malamalama le komiti i ta’iala ma tulafono o lo o faaaoga e le Soifua Maloloina, e faamalosia ai tulaga o puipuiga i taumafa mo le soifua maloloina o le atunuu, atoa ai ma le mataituina lea o oloa ua maea le taimi e aoga ai ae o lo o faatau pea i totonu o faleoloa.

 

Fai mai Mauga, e fia vaai le komiti i auala o lo o faaaoga e le matagaluega e faamalosia ai le tulafono, atoa ai ma gaioiga o lo o faia pe afai ae tula’i mai mataupu nei i totonu o faleoloa ma pisinisi o lo o faatauina ai taumafa.

 

Ae o le tusi na tuuina atu e le alii faipule ia Maugaoalii Leapai Tusipa Anoai i le alii faatonu o le soifua maloloina, o lo o ia talosagaina ai le tatau ona silasila totoa le matagaluega i le saogalemu ma le lelei o taumafa o lo o taulimaina e faleoloa ma pisinisi i le atunuu.

 

Saunoa Maugaoalii e faapea, soo se atunuu e faataua lava le soifua maloloina o tagata i soo se taimi, ina ia mautinoa o lo o ola maloloina tagata uma.