“Aisea ea ua le taua ai tagata? Pe e tatou te fa’atali se’i o’o i le amataga o le nofoa’iga a Lolo ma Lemanu?” O fesili nei ua vala’au mai sui mai Aua, o sui mai Fagaima, o sui mai Tafuna, Nuuuli ma Leone, e fa’ailoa mai ai lo latou fa’asea, ona ua le mafai ona maua ni latou pepa ulufale e maimoa ai i le Tausala Lalelei o le Pasefika i Saute.

O le tali ua mae’a fa’ailoa mai e le ali’i o lo’o fa’auluulu i ai le Ofisa o Turisi, David Vaiafe. “O le tatou fa’aaliga tausala lenei, o lo’o faia mo le vasega o e fai pisinisi, ae le o mo le maimoaga a tagata lautele!”

Ua mae’a ta’oto le faigamalo a Obama i Amerika atoa, e le fa’ailogaina fa’apea ni tagata, ae o lea ua folasia, aisea la e toe vala’au mai ai fo’i i ni fa’alapotopotoga e o atu e sapai lenei fa’amoemoe ma faia ta’avale teuteuina mo le fa’alauiloaina o tausala lalelei taitasi ua autova’a mai mo le sailiga o lenei tausa lalelei mo le atuvasa?

E fa’atemokalasi fo’i le tatou faigamalo, ae o le a ea ua le taua ai tagata e le gafatia ona totogia le $750. mo le laulau? Ua na’o le 50 laulau ua fa’atulaga, ia avea ia e outou matou mata matitiva leaga e le taulia.

Leaga fo’i nei mea, o le fa’ato’a toe pau lea o se tausala tatou te talimalo ai, ae uma ane e leai ni avanoa o isi “fia tausala” e maimoa ai.

Ulu i le Tuaoi!

Ua iloga e matagofie se avanoa o le a tatou maua pe afai ua mae’a tutu nai ou lava ulu i lou fanua, ae toe fa’ateleina la’ia, ia maua le avanoa lea ua tula’i mai, e aoga tele le falaoamata lea e gaosia mai le ma’afala.

Ia o lo’o tele fo’i isi ituaiga ulu, ae o le sini lea ua i ai o le gafa o Ma’afala. E mautinoa, e vevesi nei fo’i ni tagata i tuaoi o lo’o tutu ai ma’afala. O le isi sa mamao lava le manatu e o’o le sasa i le ma’afala, ae o lea ua amata ona teuteu le pogati o le ma’afala ia fua tele mai!

E i’u fo’i ina va’aia ni igoa aulelei i luga o lisi ale fa’amasinoga, ona o le naunau i le falaoamata a le auaiga o Ma’afala!

Lona lua e fiu e tatali le taimi e fua mai ai ma’afala pe afai o le a totoina i lenei tausaga! Laki o le olaola ia o lea auaiga i Amerika Samoa, e te’i lava fo’i le lotoa a le Koluse Mumu ua fa’atutu ai lou ae le’i fa’anoi!

Vave fa’amautu lau pa i le taimi nei, ae le’i o’o ina aumai se tau fa’atulaga o se ‘ato ma’afala!