Ads by Google Ads by Google

Mata’ina Tautua Asosi a le Pualele

E mataina le tulaga ua oo nei i ai le tautua a le Asosi a le Pualele, lea e pei ona faavaeina mai i le 2005 seia oo mai i le tausaga nei.

O le poloketi e fa’asino tonu i pesega o fatuga tuai e fa’anofo filemu ai tiga o e uma e gasolo atu i le Potu e Fa’amama ai Toto o le tatou falema’i tele i Faga’alu.

Ina ua atoa le tausaga, sa faia se i’ugafono a le Sosaiete a le Pualele ina ia latou asia pe mata o fiafia le vasega o gasegase, ae maise le aufaigaluega ma le Pulega a le Potu Fa’amama Toto i lea tautua. O le vaega muamua lea o le latou “Poloketi o le Talitiga.”

O le aso Lulu 8 Ianuari, 2013, na fa’atino ai le latou tautua masani, ma ua avea ma se aso e fa’aopoopo ai sui o le Pualele e maimoaina ma pepese fa’atasi ma le faletua o Moana Hatcher, lea e na’o ia lava e faia le tautua i aso Lulu o vaiaso ta’itasi o le tausaga atoa 2012.

“O le matou fa’amua i lenei aso, ia toe va’ai toto’a po’o aoga, pe o fiafia i ai ma’i, ae maise le Ofisa ma le aufaigaluega i lea tautua ua ofoina e le Pualele! Oka se agaga fa’afetai ua fa’ao’o mai e le Pulega ma le Ofisa, ma ua iloga fo’i le naunau o ma’i e fia fa’alogo, pepese fa’atasi ma sisiva i nei fatuga matagofie a Samoa i aso ua te’a.” O se tala fiafia lea a le faletua Peresetene o le Pualele  o Lina Prendergast.

E toa 28 le aofai o tina o lo o avea ma totino o lenei Asosi, lea o lo o mafai ona fesoasoani atu i tama ma atina matutua e ala i le faatalanoa ma faafiafia i latou.

O le auupega lea o lo’o fa’atino ai e le Pualele a latou galuega, “Ia fa’afiafialoto i latou i tagata matutua, ma toe fa’afo’i ai le agaga fia mafuta pea ma aiga o e pele ia i latou, ae fai fo’i a latou asiga ma ala e fia mafuta i ai matua matutua!” 
I le taimi nei, ua maua se fale atoa o le Pualele mai le Administrative Department a le Malo i le atufalega i le Lua Street i le Paka Liona i Tafuna. Ua fa’ailoa mai, e ui ina e le o atoatoa le fale, ae o le fa’afetai ua i ai le latou lava fale e fa’aautu i ai a latou galuega tapena mo polokalama fa’atino.

O le fa’atupega o le Pualele o lo’o fa’amoemoe lava i le lima foa’i o latou sui totino i a latou lafoga fa’aletausaga, foa’i mai sui pe o’o ina mana’omia ae maise o latou sailiga tupe e masani ona faia e nai tina o le latou sosaiete.

Ua loto tetele i latou i lenei tausaga, ua auga atu ina latou talosagaina se vaega tupe toina mai vaega o le malo tele e talosaga i ai, ina ia fa’aauau ai latou galuega lelei, ae maise o le toe fa’aleleia o le latou fale fou ua i ai nei, ma ia fa’aleleia atili ai le latou auaunaga mo matua matutua ua tausia i aiga ona ua tino matutua.

Ina ua fesiligia le matutua o matua o lo’o asia e i latou ma fanau ua tausia i moega ona o gasegase fo’i, ua latou fa’ailoa mai, “O nisi ua i ai i le lisi e silia i le 85 tausaga e o’o atu i le 96 tausaga le matutua.”

O lenei galuega lelei ua aoga i matua matutua, ae maua ai fo’i se fa’amama avega i e o lo’o tausia matua matutua i tua i aiga!