O se masini taugata ua mae’a fa’atauina mai e le National Marine Sanctuary  “SECHRIST” e mafai ona toe fa’apepe ai manu’a ogaoga o tagata ma’i suka, ina ia le faia se ta’otoga e ave’esea ai, ae maise o le toe fa’afo’i le lelei atoatoa o tino o e na maulu, ae ua malemo pe tupu ai fo’i se fa’alavelave a’o maulu.

O lea masini, ua fa’ailoa mai, e utufia ai le Okesene mama i le manu’a ina ia vave ona toe pe ma toe pe ai manu’a o tagata ma’i suka po’o le na esikegi a’o maulu i le sami.

O le tau o le masini lenei e $250,000. ma na fa’atauina fa’apitoa mai le masini sili ona tele ua mafai ona gaosia e le Kamupani a le Baromedical Services Inc. i North Carolina, US. O se tasi o aiaiga taua tele i lea fa’atauga na faia e le National Marine Sanctuary o Amerika Samoa, ina ua mafai ona auina mai ai le sui Inisinia fa’apitoa e fa’apipi’ia lenei masini, ma auina atu i fafo sui e to’afa, lua Foma’i lua Tausima’i, e a’otauina i le fa’aaogaina, ma iloa patino gaoioiga e ao ina faia mo gasegase fa’aaogaina i ai lea masini o le “Hyperbaric Oxygen Machine.”

O le tama’ita’i Tausima’i Fa’apitoa Zafe Talaga, sa avea ma sui o nei sui fa’apitoa ua a’otauina mo le masini lea e fa’amatala atili i sui o le DPS Marine Patrol, National Park of AS, DMWR, DOC, Coast Guard ma le NMSanctuary na asia le masini i le Potu Piliaki i le falema’i tele i Faga’alu.

“O se tasi lenei o masini o le a aoga tele mo togafitiga o gasegase e maua i le ma’i suka, ae faia taotoga ma ua faigata fo’i ona fa’ape o latou manu’a. E utufia i ai le Okesene mama i totonu o lea masini mo le taimi fa’atulaga, pe fa’afia fo’i ona faia i le masina, ona iloga mai lea o se suiga o latou manu’a ma toe malolosi ai.” O se fa’amatalaga lea a le tama’ita’i o Gene Brighouse o le NMS, lea na fa’atauina lea masini aoga.

E o’o fo’i ia Talaga, sa ia fa’ailoa mai, E13 ituaiga togafitiga ua fa’atulaga mai e mafai ona fa’aaoga i ai lea masini o le Sechrist. Ae o ituaiga gasegase o lo’o ua ta’atele i le tatou atunu’u e sili ona aoga i ai le masini lea, o e ma’i suka ma o latou manu’a ma le fa’apega o latou ta’otoga.”

Ona e seasea lava ona maua mai nisi e maulu ae a’afia i ni esikegi a’o maulu, o lea e mautinoa ai le moni o lea fa’amatalaga a Zafe Talaga. O lo’o i ai fo’i le avanoa e mafai ona fa’ape ai se mu ua ogaoga tele ua a’afia ai nisi, se tasi e mu le 50% o le tino po’o se itutino e tasi.

Mai le fa’amatalaga ua fa’ailoa mai, e tofu le ituaiga o ma’i e a’afia ai le tagata, ma le setiga o le masini e fa’aaoga ai. E taumafai muamua lava fo’i e ‘ave’esea mai le maualuga o le “ea o’ona” o lo’o i totonu o le tino o le tagata sa maulu ae ua mole pe malemo!

O le Okesene Mama o lo’o utufia i lea ituaiga o ma’i i totonu o le Sechrist, e ave’esea mai ai le ea o’ona lea mai le tino ae toe fa’afo’i le malosi i lea sui sa a’afia.  O le umi fo’i e nofo ai i lea masini e fa’atulaga fa’atasi ai ma le aofa’i o le Okesene e fanaina atu i totonu ia te oe.

O le okesene lava lea e vave pe ai manu’a ma mu i tino o e ma’i suka, po’o e fo’i ua mu i le afi po’o le kesi.

O le isi ituaiga o togafitiga e aoga i ai le Sechrist, o le tagata ua tau leai se toto ona ua tele le toto masa’a e afua i manu’a po’o taotoga, ae maise o le le lava o mea’ai tatau ma le paleni e fa’atupu toto.

O le fesili pito i mana’omia ona fesiligia o lenei tautua aoga pe fia le totogi e te fa’a-Okesene ai i totonu o le Sechrist. Ua fa’ailoa mai e Talaga, “E na’o le ta’i $20. e fa’a-okesene ai le tagata o lo’o ua tali lana Medicare i lenei masini i le taimi e tasi, ae matele lava togafitiga i le ta’i 10 taimi e nofo ai i totonu o le masina i le vaiaso ona mae’a lea ua e malosi fo’i.”

O le i si  mea lelei lava ua fa’ailoa mai, “E matele ina mua’i fesiligia e Turisi mai fafo, pe mata o i ai se tatou masini fa’apea, a iloa ua i ai, ona latou fiafia lea e totogia a latou malaga fa’apitoa e maulu i o tatou gataifale. O se tasi lea mea, e tatou te iloa ai, e aoga tele lea masini mo le fa’asaoina o le soifua o nisi e a’afia i fa’alavelave fa’afuase’i a’o maulu pe o ta’e’ele fo’i i le sami.” O se fa’amatalaga lea a le susuga Lelei Peai, sui fa’atonu o le Matagaluega o Fefa’ataua’iga a le tatou Malo.