Ads by Google Ads by Google

Masi’i le aumalaga World Baptist Church fonotele i Samoa

Ua fa’atulaga le ‘aumalaga usufono a le Ekalesia Papatiso i le Lalolagi i Happpy Valley Tafuna mo le Malo Tuto’atasi o Samoa i le masina o Iulai, 2016. O se au usufono ua fa’ato’a fa’atolu ai lea ona usufono fa’atasi lala o le Ekalesia Papatiso i le Lalolagi, talu mai ona fa’atula’ia o latou lala e 11 i Amerika Samoa.

 

O le nofoaga fo’i lea e fa’aautu uma i ai a latou gaoioiga tu’ufa’atasi i Happy Valley, lea o lo’o fa’atula’ia ai le Samoa Baptist Academy.

 

“I le matou ‘au usufono ua faia fa’anoi i galulue mo le vaitau e usufono ai. O le fa’afaigofie atili lea ona fa’amatu’u mai le ekalesia e o atu i Samoa ina ia so’ofa’atasi lagona ma fetufa’i i ala e tautua i le Atua, ae maise o le fealofaniga o uso se mea o lo’o tulitulimatagau. E ese fo’i le matagofie o lea lagona pe a nonofo fa’atasi o uso ma talatala le alofa o le Atua ae maise o lana Upu,” o se tala lea a le Fa’afeagaiga o le Fa’atonu o le Galuega Papatiso i Amerika Samoa, Pr. Elise Tafao.

 

O le susuga le Fa’afeagaiga sa a’otauina lava i le Seminare a le 7th Baptist Thological Seminary i Kentucky i le 30 tausaga ua tuana’i. Soso’o lea o lana aoaoga ma galue i Kentucky mo le 4 tausaga ma lona tofiga e galue i le First Baptist Church i Pearl City, Hawaii.

 

O iina sa tofia mai ai loa ma lona faletua Lucy Nikolao Tafao mo le galuega i Happy Valley. Ua atoa le 23 tausaga o le la’ua auaunaga, ae e o’o mai i la’ua, ua mae’a fa’atuina le a’oga Samoa Baptist iinei.

 

O nisi o galuega ua mae’a ona fa’atuina talu mai ona avea lenei fo’i alo Faife’au Papatiso o le atunu’u ma Fa’atonu o lea Ekalesia i inei, ua mae’a fa’atuina ai i le lotoa lava i Happy Valley ma le Aoga mo A’oa’o e aga’i atu ina avea ma Seminare Fa’afaife’au a le Ekalesia Papatiso.

 

“O se taumafaiga lenei ina ia mautinoa ua alagatatau ona iai nisi faife’au fa’aopoopo mo le galuega tala’i ma fa’amautu le soifua fa’atuatua o le mamalu o totino o le Ekalesia. E le gafatia ona tupu ma lauolaola le galuega pe a le lava fo’i ta’ita’i,” o se isi lea toe saunoaga Pr. Tafao, o ia foi o le Director of Ministry a Amerika Samoa.

 

I le fonotaga i le tausaga na te’a nei, sa talimalo ai Niu Sila, sa matua iloga ona fiafia tagata uma na mafai ona masi’i ma usufono. Ua feutagai fo’i le Ekalesia Papatiso i le Lalolagi ina ia fa’atautaia fonotaga i tausaga uma lava, ma o le a fa’atolu nei ona faia fonotele nei, ae talimalo Samoa. Sa mua’i talimalo Amerika Samoa, se’e lea ia Niu Sila ae o le taimi lenei mo Samoa ua alofaiva atu nei i ai.

 

E le gata nei la i atunu’u nei e tolu sa fono ae o le a fono fa’apipi’i mai fa’atasi ma Alaska Baptist, Kalefonia ma Ausetalia e fa’atasia i Samoa. Mo lala i Alaska, Niu Sila, Ausetalia ma Kalefonia, o lo’o mo’omia e i latou ona fa’aliliuina lelei tusitusiga mo a’oga a Aoao i le Gagana Samoa.

 

Ua mafua lea fa’atuputeleina o lala o le Ekalesia Papatiso i isi setete ma Ausetalia, ona ua fa’ailoa mai e Pr. Tafao, “O lo ua mae’a nei ona so’ofa’atasi le Osanna Ministries ma le World Baptist Curches ma ua atili ai ona fa’afiafiaina e so’ofa’atasi fa’aletausaga ina ia nofo fealofani le fanau a le Atua.”

 

O le nofoaga e fa’atautaia ai fonotaga ma fa’atasia i ai uma lenei ekalesia o St Therese i Tuana’i  ma Le’auva’a, Samoa. Ua mae’a fo’i ona fa’atautaia lenei ekalesia i lana komiti fa’afoe o Fa’afeagaiga uma lava, peita’i, ua latou filifilia se tasi o tama fanau a Amerika Samoa, e avea ma latou Failautusi Aoao i le Lalolagi, le susuga Tamaaiga Pili Gaoteote, o le Chaplain mo le Falepuipui ma le Juvenile i Amerika Samoa mo le Ekalesia Papatiso. Ma ia fo’i o lo’o avea ma Fa’atonu sili o le Matagaluega o Paka ma Malae Ta’alo a le tatou Malo.

 

Fa’ailoa fo’i e le susuga Tamaaiga Pili e fa’apea, “O le auaunaga lava, afai ua tofia, e alu ma le fiafia e fa’atino. O le avanoa fo’i ua maua, pe pisi i le tele o tiute i le aiga, ma galuega i le Malo, aua le galo ai, e ao ina fai fo’i le galuega a le Atua ma le mata’u.”