Ads by Google Ads by Google

MASALOSALO AULOTU TEU FAIFEAU TUPE TAGA LANA PELAUE

E muliga fo’i le va a atunuu Arapi i le va lea ua fai nei a se tasi o aulotu i le itu i Sisifo o le atunuu, ina ua manino le mata o le vai i tagata ekalesia, o a latou saoga tupe uma sa faia mo se latou fale lotu fou talu mai le 6 masina talu ai, e le o tofu i le faletupe ae o loo tofu lava i totonu o le taga o le pelaue a le latou faifeau.

I se isi faaupuga, o loo masalomia e le aulotu ua ai ma faaaoga e le alii faifeau a latou tupe, ae ina ua fesiligia le alii faifeau i sona finagalo e tusa ai o lea mataupu, sa ia taua ai e faapea, “E le faapena se faifeau ua faauu e le Alii i lana galuega, o lona aia lea o tupe ma le afu o lana aulotu.”

“O le tagata na te faia upu e faamaasiasi ai le auauna a le Alii, o lona uiga o le malaia i luga o le ala,” o le saunoaga lea a le alii faifeau i luga o le telefoni ina ua fesiligia e le Samoa News.

O le vevesi a le aulotu na mapuna a’e i le taimi o le fonotaga e faamanino ai le tala o le tupe, ina ua masalomia e le aulotu e pepelo le ripoti o le tupe a le alii faifeau.

“Aga o oe e le o se auauga na faauu e le Alii ua maua lou iuga i le aso legei eh, “ o le alaga atu lea a le isi toeaina matua o le ekalesia i le faifeau e pei ona faamatala e le molimau.

Na taua e le molimau e faapea, talu mai le masina o Tesema na amata mai ai teugatupe a le aulotu seia oo mai i le masina na te’a nei, e leai ma se masina o masina uma nei na manino faamaumauga o tupe sa maua ai.

Fai mai le molimau, e lei maea le fono ae ua taape le toatele o le aulotu ma o latou loto le toe talitonu i le alii faifeau ona o le mea ua tupu.

O le aulotu lenei e pei ona taua e se tasi o a latou sui faalilolilo e le’i manatu e faalaua’itele le mataupu, na amata mai i ni aiga se to’a 5 sa nonofo i nofoaga eseese i le atunuu, peitai ua maua fanua e nonofo lisi ai i oganuu o Tafuna, ma latou faavaeina ai loa le ekalesia fou lenei i le 5 tausaga talu ai.

Na mafai ona fesootai atu le aulotu laititi lenei i se tasi o aulotu tele ma avea ai loa i latou o se totino o lea aulotu e oo mai lava i le taimi nei.

“Talu mai le 5 tausaga talu ai, sa a’e ai loa se tofa i le aulotu e sili pe a faaputu se tupe mo le fausiaina o se malumalu tapua’i, o le mafuaaga lena na amata ai loa a matou sailiga tupe i le masina o Tesema 2011 seia oo mai lava i le taimi nei,” o le molimau lea a le sui o le ekalesia.

“O sailiga tupe a le aulotu na amata mai i faleaiga vaisalo, o BBQ e faasavali solo, atoa ai ma lafoga ta’i $30 a aiga i aso Sa taitasi, ona o le naunau lava ia vave ona tu le mauga o le Atua, peitai e foliga mai e tuai ona tu le mauga o le Atua, ae muamua tu le fale fogafalelua o le alii faifeau,” o le tala ata lea a le molimau.

Fai mai le molimau, o masina uma lava e faia ai fonotaga a le ekalesaia mo le faamalamalamaina o le tala o le tupe, peitai soo se fonotaga lava, e leai ai lava ni ripoti o le tupe e tuu atu i le aulotu, sei vagana ai otootoga o tupe sa maua ma tupe ua faaaoga, ae leai se faamaumauga mai le faletupe.

“O fea ni ripoti e tau lagalaga mai i totonu o taga o lona ofu, e oo lava foi i nisi o tupe pe a fesiligia, e iloa uma atu lava e le aulotu le tau autago solo o le faifeau i taga o lana pelaue e tau laga mai ai ni tai $20 o loo i ai ma lana faaupu, o isi tupe ia sa maua atu ae ua galo ona tuu i lana ripoti,” o le tala ata lea a le molimau.

O le aso Sa lona tolu o Iuni na masalomia ai loa e le aulotu le faifeau ina ua soso’o lava malaga a le faletua ma le la pepe e 2 tausaga i Niu Sila e asi le tina o le faifeau o loo sii ma’i ai, atoa ai ma le faalua lea ona tipi le pili o le eletise ma le vai a le ekalesia, ma mafua ai loa ona talosaga se tasi o tama matua o le aulotu i le faifeau ina ia faapupula atoa le tupe a le aulotu ua i ai, talu mai lava le uluai taimi o ana sailiga tupe seia oo mai i le taimi nei.

O le vaiaso nei lea ua faamoemoe le aulotu e faia ai la latou fonotaga faapitoa e faamanino ai le tala o le tupe, ae afai loa e le manino lava, ua sauni le ekalesia e fai la latou faaiuga i le alii faifeau, ona o isi taimi, e le gata e tautala i upu malolosi, otegia le aulotu ma fai e pei lava o lana fanau, ae o lea foi ua oo i tupe ua matua nenefu ai lava le ekalesia.

Na taua e le faifeau, o malaga a lona toalua ma lona afafine i Niu Sila e asi lona tina, sa faatupe uma e lona aiga, ae augapiu ma se sene eleelea a le aulotu na alu ai, peitai fai mai le molimau, e fiu lava le alii faifeau e nana le tama’i moa i totonu o le ula, ae ioio mai lava.