Ads by Google Ads by Google

Masalomia seila Lady Naomi i le aumai faanana mariuana

E toatasi se seila o le vaa mai le malo o Samoa, le MV Lady Naomi ua taofia e leoleo i le toese i Tafuna ananafi, ina ua masalomia lona aumaia faanana o vaega o le laau faasaina o le mariuana i le teritori.

 

E le gata na taofia e le Vaega o lo o suesueina mataupu tau Fualaau Faasaina a le Ofisa o Leoleo le seila, ae sa i ai fo’i ma se alii na taofia, ona o lo’o masalomia o ia lea na tuu i ai e le seila o le va’a le afifi na sau ma ia, lea o lo o masalomia o se afifi mariuana.

 

Na taua e se sui o le Vaega a le ‘Vice & Narcotics Division’ i le Samoa News e faapea, o se faamatalaga faalilolilo na latou maua mai i ni molimau, na mafua ai loa ona faia la latou suesuega faapitoa lenei.

 

E taunuu le Lady Naomi mai lana malaga masani i le uafu i Fagatogo ananafi, ua leva ona i ai sui o le Vaega faapitoa lea a leoleo i luga o le uafu, mo le mataituina o gaioiga uma o lo o faia ai.

 

Na taua e se molimau i le Samoa News e faapea, ina ua maea uma i fafo le pasese a le vaa, ma ua toe fo’i atu foi sui o le Ofisa o le Tiute ma le Vaega o Femalagaaiga i o latou nofoaga masani, sa vaaia ai loa le eeila o le va’a ua masalomia nei, o savali mai i fafo o le vaa ma se afifi ma tuu i le alii lea ua taofia faatasi i laua.

 

Na taua e le molimau e faapea, ina ua maea ona tuu le afifi i le alii ua taofia faapagota i le taimi nei, sa vaaia loa le savali atu o lea alii ma oso i lana pikiapu Toyota lanu mumu ma aga’i atu loa i le itu o lo o i ai le maketi fou i Fagatogo, ma o iina na taofia ai loa o ia e leoleo, ma amata ai loa iina a latou suesuega e uiga i lenei mataupu.

 

Na toe faaauau le sailiina o le taavale a le alii lea i luma o le Ofisa Tutotonu a leoleo i Fagatogo seia oo atu i le 12:00, ae pe tusa o le 12:30, na auina atu ai loa e leoleo le seila o le vaa i totonu o le Ofisa mo a latou suesuega.

 

Ua taofia nei i laua nei i lalo o le vaavaaiga a leoleo e faatali ai le taimi e faila ai moliaga faasaga ia te i laua.