Ads by Google Ads by Google

Masalomia se alii 21 tausaga i le ma’itaga a lona tausoga 14 tausaga

O se alii ‘overstayer’ mai Samoa na malaga mai i se pemita e 30 aso i le masina o Ianuari 2011, ua molia nei i moliaga mamafa e lua, o le faiaiga ma se teineititi e 14 tausaga le matua, atoa ai ma lona faia o ni uiga mataga faafeusuaiga i lea teineititi.

O lo o tuuaia foi o ia i le moliaga mama e tasi i lona faia o ni amioga e ono lamatia ai le saogalemu o fanau laiti.

E le mafai ona lomia e le Samoa News le igoa o i la’ua o lo o a’afia i lenei mataupu, ona o le puipuiga o le teineititi o lo o a’afia.

O ananafi na tulai ai le alii ua molia, e 21 tausaga le matua, i luma o le Faamasinoga Faaitumalo, ma ua faamoemoe o taeao nei o le a faatulagaina ai le aso e faia ai lana ulua’i iloiloga.

E tusa ai ma faamaumauga a le faamasinoga, ua ta’ua ai e fa’apea, e tausoga le alii ua molia ma le teineititi o lo o aafia.

O le mataupu lenei na tofu atu i le Ofisa o Leoleo i le Aso Faraile na te’a nei, Novema 23, 2012, ina ua masalomia e se tasi o le aiga ua ma’itaga le teineititi 14 tausaga, o le aso lava foi lea na fesiligia ai e leoleo le teineititi, ao i ai ma lona tina matua, o le tina o lona tina.

Sa teena e le teineititi faamatalaga sa la momoe ma le alii ua molia. Sa ia faamatala i leoleo e faapea, o ia e i ai lana uo tama sa la fetaui ia Mati 2012, ma o le alii lea sa la faiaiga amata mai ia Mati e oo mai ia Iuni 2012.

Ae ina ua tuuina atu le teineititi na aafia i lalo o le vaavaaiga a le Ofisa o le “Social Service”, o iina na faatoa ia faamatala ai i le sui o lea Ofisa le mea moni sa tupu, atoa ai ma le la mafutaga ma le alii ua molia nei, ma toe logo ai loa le Ofisa o Leoleo ma fa’amaonia ai loa e le tamaitai, o lona lava tausoga ua ma’itaga ai.

Sa ia taua e faapea, na amata ona o la faia tulaga faaleulugalii i le masina o Iuni seia o’o mai ia Aokuso.

Ua ta’ua i faamaumauga a le faamasinoga e faapea, i le faamatalaga a le teineititi, o ia lava na taulamua i gaioiga uma ua mafua ai lenei faalavelave.

Ina ua fesiligia e leoleo le ua molia, sa ia tautino ai e sa’o sa la faiaiga ma le teineititi na aafia, amata mai ia Iuni e oo atu ia Aokuso o le tausaga nei.

O le moliaga pito mamafa lea o lo o tuuaia ai le ua molia, e mafai ona faafalepuipui ai se tasi i le toese mai le 5 e oo atu i le 15 tausaga.

Talu ai o tulaga faaletonu i pepa nofomau a le alii ua molia, ua le mafai ai e le faamasinoga ona faatulaga se tupe e tatala ai o ia i tua.